Sarkisyan sabiq müdafiə nazirini həbs etdirmək istəyir
Ermənistanda aprelin 2-də keçiriləcək parlament seçkiləri ərəfəsində
maraqlı proseslər yaşanır. Müxalifət partiyalarının bloklaşması, hakimiyyətə
qarşı sərt bəyanatları, iqtidarı sərt addımlar atmağa məcbur edir. Nəticədə,
müxalifət cəbhəsində təmsil olunanların yaxınları həbs edilir, fiziki
təzyiqlərə məruz qalırlar. Sabiq xarici işlər naziri Vardan Oskanyanın yaxın
qohumlarına qarşı həyata keçirilən həbslər buna misaldır. İndi isə bəlli olub
ki, hakimiyyət sabiq müdafiə naziri Seyran Ohanyanı hədəfə alıb. "Ermənistan
hakimiyyəti 2015-ci ildə paytaxtın Nork Maraş dairəsində zərərsizləşdirilmiş
silahlı qrupa dair iş üzrə bir sıra faktları açıqlamağa hazırlaşır, bu faktlar
sabiq müdafiə naziriSeyran Ohanyanın adı ilə bağlıdır”. Bu barədə
Ermənistanın "Aykakan Jamanak” qəzeti yazır. Qəzet xatırladır ki,
araşdırma zamanı bu işin arxasında Ohanyanın dayandığına dair məlumat əldə
edilib.Hazırda Ohanyanın müxalifət blokuna rəhbər olması və hakimiyyətə
qarşı tənqidi çıxışlar etməsi sonuncunun sabiq nazirə aman verməməsi qərarına
səbəb olub. Qəzetin mənbəyi işin Ohanyanın həbsinə qədər gedib çıxa biləcəyini
istisna etməyib."Heç nədən qorxmuram və hesab edirəm ki, mənim vəzifədə
olarkən pozuntulara yol verməm barədə xəbərlər fərziyyədir”. Bunu Seyran
Ohanyan xəbər saytlarının sualını cavablandırarkən deyib. Məlumatlara görə,
Ohanyanın adı ifşa olunmuş silahlı qrupla da əlaqələndirilə bilər. Amma keçmiş
nazir deyir ki, nə vaxtsa hansısa problem olubsa, bunu onda qaldırardılar, indi
yox.
Qeyd edək ki, aprelin 2-də keçiriləcək parlament seçkisinə birlikdə
gedən "Ohanyan-Raffi-Oskanyan” blokunun seçki siyahısına keçmiş müdafiə naziri
başçılıq edir. Hədəfin məhz nəyə görə Ohanyan olduğuna gəldikdə keçmiş nazir
deyib ki, onların bloku nəzarət altında olmayan, sərbəst, ideya və xalqın
maraqları əsasında hərəkət edən yeganə qüvvədir və fəaliyyətlərini sonadək
davam etdirəcəklər.
Xatırladaq ki, keçmiş müdafiə naziri Seyran Ohanyan 2016-cı il
aprelin 2-5-i arası Dağlıq Qarabağdakı cəbhə xəttində gedən döyüşlərdən az
sonra vəzifədən kənarlaşdırılıb. Həmin döyüşlərdə erməni tərəf yüzlərlə itki
verib. Azərbaycan həmin döyüşlərdə 2 min hektar ərazinin işğaldan azad edib. Ohanyan
bundan sonra siyasi fəaliyyətə başlamaq və qarşıdan gələn parlament seçkisində
mübarizə aparmaq qərarına gəldi. Ohanyan prezident Serj Sarkisyanla hər hansı
probleminin olmadığını desə də, dövlət idarəetməsində fərqli görüşləri olduğunu
bildirir. Onun sözlərinə görə, xalqın əksəriyyəti kimi bugünkü hakimiyyətə
qarşıdır. S.Ohanyan prezident Serj Sarkisyanla hər hansı probleminin olmadığını
desə də, dövlət idarəetməsində fərqli görüşləri olduğunu bildirib. Onu da qeyd
edək ki, Seyran Ohanyan "hökumət islahatları” adı altında yeni baş nazir Karen
Karapetyanın təşəbbüsü ilə postundan uzaqlaşdırıldı və heç bir sərəncama
göndərilmədi. Məhz bundan sonra erməni mediasında Ohanyanın Sarkisyandan qisas
alacağı barədə fikirlər səsləndirildi. "Birləşmiş Ermənistan” hərəkatının
yaradılması isə sabiq müdafiə naziri tərəfindən atılan ilk addım kimi
qiymətləndirilə bilər. Maraqlısı odur ki, S.Ohanyan ən çox sosial şəbəkələr
vasitəsilə müraciətlərini edir. "Hakimiyyətə qarşı ictimai etimadsızlığın
yüksəlməsi ordunu arxadan zəiflədir. Kasıblığın dərəcəsi milli təhlükəsizliyə
təhdid törədəcək həddə gəlib çatıb. Qanun qarşısında qeyri-bərabərlik,
ədalətsizlik, gündəlik mənafelərdən hərəkət edilməsi və bundan irəli gələrək
tüğyan edən korrupsiya bütün problemlərin əsasını təşkil edir”, - deyə Ohanyanın
son müraciətlərindən birində belə deyilir.
Yeri gəlmişkən, seçkilərdə uğur qazanmağın yolunun Moskvadan
keçdiyini gözəl bilən prezident Serj Sarkisyan Moskvaya hazırlaşır.
"Sarkisyan Moskvaya hakimiyyətini qorumaq üçün gedir”. Bu sözlər
erməni analitik Musa Mikayelyanın "1in.am” saytında dərc edilən məqaləsində yer
alıb. Politoloq bildirib ki, hələlik Serj Sarkisyanın Moskvaya nə zaman səfər
edəcəyi bəlli deyil: "Ermənistan və Rusiya liderlərinin görüşü işgüzar
prosesdir, ona görə də burada təəccüblü heç nə yoxdur. Lakin Sarkisyanın
budəfəki səfəri ölkənin daxili inkişafı baxımından mühüm ola bilər. Səfərin
parlament seçkisindən öncə və ya sonra olması önəmli deyil. Burada əsas məqam
bu səfərin daxili siyasi və hakimiyyətdaxili status-kvo üçün mühüm rol
oynayacağıdır. Sarkisyanın bu dəfəki səfəri baş nazir Karen Karapetyanın
yanvardakı Moskva səfərinə cavab olacaq”.
Mikayelyan Sarkisyanın Karapetyanı varis kimi görməməsinə də toxunub:
"Məsələ ondadır ki, Karapetyan Moskvada həm Rusiya hökuməti, həm də erməni
biznesmenlər tərəfindən çox isti qarşılanıb. Bütün bunlar, şübhəsiz,
Karapetyanın hökumət daxilindəki dayaqlarını gücləndirib. Karapetyanın
mövqelərini gücləndirməsini Sarkisyan özünün hakimiyyətini qorumaq məsələsində
əsas problem kimi görür. Sarkisyan heç bir halda Karapetyanı özünün xələfi
saymır. Görünür, Moskva üçün Karapetyan xələf kimi görünür. Sarkisyan Moskvada
məhz Karapetyanın nüfuzunu salmağa çalışacaq. Hazırda Sarkisyan üçün əsas varis
müdafiə naziri Vigen Sarkisyandır”.
Azər