Sarkisyan rəqiblərinə qarşı təzyiqləri gücləndirir
Ermənistanda parlament seçkiləri yaxınlaşdıqca siyasi gərginlik
güclənir. Aprelin 2-də keçiriləcək seçkilər ərəfəsində hakimiyyətə qarşı çox
güclü müxalif bloklar formalaşmaqdadır. Hakimiyyəti qorxudan əsas məsələ odur
ki, ona qarşı keçmiş məmur, nazir və biznes dairələri birləşir. Müxalif
qüvvələrin parlamentdə səs çoxluğunu ələ keçirmək üçün daha aktiv fəaliyyətə
keçməsi hakimiyyəti sərt addımlar atmağa məcbur edib.
Bəlli olduğu kimi, bir vaxtlar Serj Sarkisyanın komandasında yer
alanlar indi daha çox fəallıq göstərirlər. Bu xüsusda "Ohanyan-Raffi-Oskanyan”
bloku daha çox seçilir. Qeyd edək ki, keçmiş müdafiə naziri Seyran Ohanyan,
keçmiş xarici işlər nazirləri Vardan Oskanyan və Raffi Ovannisyan blok
yaradılması ilə bağlı razılaşma imzalayıblar. Hakimiyyət də bunu cavabsız
qoymaq istəməyib. Ermənistanın keçmiş xarici işlər naziri Vardan Oskanyanın
oğlu və qardaşı oğlu ötən gecə Yerevanda saxlanılıblar. Bu barədə erməni
nəşrlərinə Ermənistan İstintaq Komitəsi sədrinin müşaviri Sona Truzyan məlumat
verib. Onun sözlərinə görə, saxlananlar ifadə verməkdən imtina ediblər. İstintaq
komitəsinin məlumatına görə, onlar cinayət törətməkdə şübhəli bilinirlər.
"2017-ci il fevralın 17-də bir nəfər şəxsin məlumatı əsasında polisə
materiallar daxil olub ki, G.Sirafaryan və onun əmisi oğlu A.Oskanyan bir
nəfərdən borcun qaytarılmasını tələb ediblər. Onlar həmin şəxsin maşından
çıxmasına imkan verməyib və onu sağlamlığa zərər vura bilən zorakılıqla
hədələyiblər. Materiallarda cinayət əməlinin olduğunu nəzərə alaraq, qanunsuz
azadlıqdan məhrum etmə, bir qrup şəxsin sağlamlıq üçün təhlükəli olan zor
tətbiq etməyi planlaşdırması və ya onu tətbiq etməklə hədələməsi ilə bağlı
cinayət işi açılıb”, - deyə məlumatda bildirilir. Hüquq-mühafizə orqanlarının
məlumatına görə, həmin şəxslər Yerevanın Leninqradyan küçəsində zərərçəkmiş
N.Berberyanı maşına otuzduraraq Abovyan şəhərinə aparıb və onu hədələyərək 1,5 milyon
dramın (3 min dollardan çox) qaytarılmasını tələb ediblər. İstintaq Komitəsi
hazırda faktla bağlı araşdırma aparıldığını bildirir. Sona Truzyanın məlumatına
görə, cinayət barədə xəbər verən Suriya ermənisidir.
Seçkilərdən söz düşmüşkən, son məlumatlara görə, aprelin 2-də
keçiriləcək parlament seçkilərinə 5 partiya və 4 seçki bloku qatılacaq. Həmin
partiya və bloklar artıq sənədlərini Mərkəzi Seçki Komissiyasına təqdim edib. Proporsional
sistem üzrə deputatlığa namizədlərin siyahısını təqdim edən partiyalar
bunlardır: hakimRespublikaçılar Partiyası, "Daşnaksütyun” erməni inqilabi
federasiyası, "Azad demokratlar”, "Erməni dirçəlişi” və Ermənistan Kommunist
partiyaları.Hakim Respublikaçılar Partiyasının siyahısında birinci sırada
müdafiə naziri Vigen Sarkisyan gəlir.
Proporsional sistem üzrə deputatlığa namizədlərin siyahısını təqdim
edən bloklar isə bunlardır:"Çıxış Yolu” bloku (təsisçi – "İşıqlı
Ermənistan” partiyasının rəhbəri Edmon Marukyandır), "Tsarukyan” bloku ("Çiçəklənən
Ermənistan” partiyasının sədri Qaqik Tsarukyan) "Ohanyan-Raffi-Oskanyan” bloku
(keçmiş müdafiə naziri Seyran Ohanyan, keçmiş xarici işlər naziri Vardan Oskanyan
və "İrs” Partiyasının lideri Raffi Ovanisyan) və "Erməni Milli Konqresi” - Ermənistan
Xalq Partiyasının bloku (rəhbəri keçmiş prezident Levon Ter-Petrosyandır).
MSK sədri Tiqran Mukutsyan bildirib ki, ümumilikdə 1539 deputatlığa
namizəddən 1191 nəfərin namizədliyi irəli sürülüb. MSK sədri deyib ki, ən çox
Kotay, ən az isə Araqotsot və Tavuş bölgələri üzrə namizədlər var. Konstitusiyaya
dəyişikliklərə görə, parlamentdə, azı, 101 deputat təmsil olunacaq. MSK sədri
deyib ki, təqdim olunan bütün sənədlər araşdırılacaq. Fevralın 26-a qədər
seçkilərdə iştirak edən partiya və blokların qeydə alınması prosesi başa
çatdırılacaq. Qeydiyyat bitəndən sonra martın 5-də partiya və blokların seçki
kampaniyası başlanacaq. Prezident Serj Sarkisyanın rəhbərlik etdiyi hakim
Respublikaçılar Partiyasının seçkilərə hansı şüarla gedəcəyi, hələlik bəlli
deyil. Hakim partiyanın təşkilat komitəsinin sədri Ruben Tadevosyan bildirib
ki, partiyanın şüarı var. Amma onlar, hələlik bunu açıqlamırlar.
Qagik Tsarukyanın rəhbərlik etdiyi "Tsarukyan” bloku seçkiyə "Vaxt
dəyişiklik və quruculuq vaxtıdır” şüarı ilə qoşulur. Qagik Tsarukyan partiya
təmsilçilərinin qarşısında blokun 15 maddəlik proqramını təqdim edib. Tsarukyan
deyib ki, ölkə iqtisadiyyatı çox ağır durumdadır: "Bunu tək mən yox, baş nazir
də deyir. Bu gün iqtisadiyyatımız dəhşətli durumdadır. Tədricən uçuruma gedirik”.
Levon Ter-Petrosyanın rəhbərlik etdiyi Erməni Milli Konqresi seçkiyə "Sülh,
barışıq, mehribanlıq” adı altında gedir. Ermənistanın sabiq müdafiə naziri
Seyran Ohanyanın, "İrs” partiyasının lideri Raffi Ovnesyanın və "Birlik”
partiyasının lideri Vardan Oskanyanın yaratdığı blokun da şüarı belədir:"İrs,
birlik, qələbə”.
"Çıxış Yolu” bloku” seçkidə özünə"Seçki, dəyişiklik və qələbə”şüarı
götürüb.
"Azad demokratların” şüarı bir az tanış səslənir –"Biz
bacaracağıq”.
"Daşnaksutyun”un şüarısa"Yeni başlanğıc, ədalətli Ermənistan”dır.
Milli Təhlükəsizlik Şurasının keçmiş katibi Artur Baqdasaryanın "Erməni
Dirçəliş” partiyası isə seçkiyə"Dəyişikliklər naminə səs ver, dirçəliş
naminə səs ver”şüarı ilə gedir.
Onu da qeyd edək ki, 2 aprel seçkisi prezident Serj Sarkisyanın
ikinci səlahiyyət müddətinin bitməsinə bir il qalmış baş tutur.
Azər