“Sarkisyan küçə söhbətləri edir”
Ermənistan
prezidenti Serj Sarkisyan yenə sərsəm bəyanatlar səsləndirməkdən çəkinməyib. O,
könüllülər şurasındakı çıxışı zamanı deyib ki, Xankəndində çay içəcəyik deyənlər,
indi heç Kəlbəcərə yaxın düşə bilmir: "Yadınızdadırsa, 90-cı illərdə Azərbaycanda
həftədə bir müdafiə naziri dəyişirdi. Onların da hamısı qısa zamanda "Xankəndində
çay içəcəyik” deyirdi. Reallıq göstərdi ki, onlar nəinki Xankəndində, bu gün Kəlbəcər,
Ağdam, Füzuli, Cəbrayıl, Qubadlı və başqa ərazilərdə belə, çay içə bilmirlər.
Qarabağ məsələsi Azərbaycanın daxili işi olmamaqla yanaşı, bütün ermənilərin məsələsidir.
Cəbhədə təxribata əl atsalar, onlara güclü cavab zərbəsi vurulacaq”.
Onun bu
sərsəm bəyanatı isə cavabsız qalmayıb və Azərbaycan Xarici İşlər Nazirliyi
(XİN) bu bəyanata cavabında deyib ki, Ermənistan rəhbərliyinin regionu və erməni
xalqını yeni müharibələrə sürükləyən çıxışı hərbi diktatorlar və hərbi xuntalar
üçün xarakterik haldır. XİN mətbuat xidmətinin
rəhbəri Hikmət Hacıyev Trend-ə açıqlamasında deyib ki, bu çıxışı ilə Ermənistanın
hərbi xunta rejiminin rəhbəri hələ səhra komandiri psixologiyasından ayrıla
bilmədiyini və 90-cı illərin əvvəllərinə aid illüziyalarla yaşadığını bir daha
sübut edir.
XİN rəsmisi bildirib ki, dərin siyasi-iqtisadi, maliyyə və
demoqrafik böhran şəraitində olan dövlətin başçısı kimi bu şəxs seçki öncəsi
dövrdəki çıxışında ölkəni tənəzzüldən çıxarmaq və qonşu dövlətlərlə əlaqələri
normallaşdırmaq barədə tezislər təqdim etmək əvəzinə, erməni xalqına yalnız
yeni müharibələr vəd edir: "Hər kəsə açıq şəkildə aydın olsa da, Ermənistan
rəhbərliyi bir daha dövlət başçısı səviyyəsində Azərbaycanın Dağlıq Qarabağ
regionu və ətraf rayonların Ermənistan tərəfindən işğal edildiyini və viranəyə
çevrildiyini etiraf edir. Bu gün Azərbaycan Cəbrayıl rayonunun işğaldan azad
edilmiş Cocuq Mərcanlı kəndinin bərpası ilə post-konflikt reabilitasiya və
regionda davamlı sülhün təmin olunmasının unikal modelini ortaya qoyduğu halda,
Ermənistan rəhbərliyi özünün işğalçılıq və destruktiv siyasəti ilə "fəxr edir”.
İndi beynəlxalq ictimaiyyət özü bir daha görməli və dərk etməlidir ki,
qoşunların təmas xəttində gərginliyin, erməni əsgərlərinin ölümü ilə nəticələnən
hərbi avantüraların, o cümlədən aprel hadisələrinin, Ermənistan-Azərbaycan dövlət
sərhədindəki təxribatların arxasında duran səbəbkar kimdir. Beynəlxalq
ictimaiyyət, xüsusilə ATƏT-in Minsk Qrupunun həmsədrləri görməlidirlər ki,
münaqişənin danışıqlar yolu ilə həlli üçün Azərbaycanın tərəf müqabili kimdir və
hansı təfəkkürə malikdir. Ona görə də regionda vəziyyətin gərginləşməsinə görə
bütün məsuliyyət mənəvi-etik və hüquqi əsaslardan məhrum olan Ermənistanın
cinayətkar hərbi-siyasi rejiminin üzərinə düşür".
H.Hacıyev
qeyd edib ki, Azərbaycan beynəlxalq hüququn norma və prinsiplərinə uyğun
olaraq, özünün ərazi bütövlüyü və suverenliyini təmin edəcək: "Buna əsla
heç kimin şübhəsi olmasın. Ermənistan rəhbərliyi nə qədər tez bunu dərk edərsə,
bir o qədər də tez regionda davamlı sülh təmin olunar və ilk növbədə, erməni
xalqı yaranmış regional əməkdaşlıq imkanlarından faydalana bilər".
Göründüyü
kimi, işğalçı prezident yenə də arxasında duranlara arxayın olub ürəyi nə istəsə,
danışır. Bu cür fikirlərlə isə işğalçı olduğunu, Azərbaycan torpaqlarını zəbt
etdiklərini açıq şəkildə etiraf etməkdən çəkinmir və ölkəmizi müharibəyə təhrik
etmək istəyir. Ekspertlərin fikrincə, o, nə beynəlxalq təşkilatlardan, nə də həmsədr
dövlətlərdən sərt təpki görməyəcəyini bildiyi üçün belə edir. Bundan əlavə,
nüfuzu xeyli aşağı düşdüyü üçün aprel ayında baş tutacaq seçkilərə bu cür
populist çıxışları ilə təsir etmək istəyir.
Bu haqda
fikirlərini "Kaspi” ilə bölüşən politoloq
Fikrət Sadıqov dedi ki, Sarkisyanın dedikləri reallığa uyğun deyil və əyalətçi
düşüncəsinə uyğun bəyanatdır: "Əvvəla, biz gec-tez öz torpaqlarımızda çay da içəcəyik,
çörək də yeyəcəyik. Bunu nə Sarkisyandan soruşmayacağıq, nə də başqa birisindən
icazə almayacağıq. Sarkisyan sadəcə, növbəti dəfə sərsəmləyir. Adını prezident
qoyan şəxs belə söhbətlər etməməlidir. Çünki bu, küçə söhbətləridir. Onun
reytinqi o qədər aşağıdır ki, belə ifadələrlə aprel ayında baş tutacaq
parlament seçkilərinə hazırlaşır. Düşünür ki, bu, ona kömək edəcək. Amma əslində,
ermənilər ondan imtina edir. Hətta onun keçmiş tərəfdaşları ona qarşı siyasi
blok, partiyalar yaradırlar. Seçkilərdə onu udmağa çalışırlar. Camaat
Sarkisyandan bezib. Sülh uğrunda platformaya qoşulan ermənilərin sayı artır.
Faktiki, ermənilər Ermənistandan qaçırlar, bu platformaya imza atırlar. Başa
düşürlər ki, orada gələcək yoxdur. Dalana dirəniblər”.
F.Sadıqov
qeyd etdi ki, Sarkisyan bu cür fikirlərlə işğalçı olduqlarını bir daha açıq
göstərir: "O gah deyir ki, o torpaqlar bizim torpaqlarımızdır, gah da deyir ki,
o torpaqları ona görə işğal etmişik ki, orada təhlükəsizlik zonası yaransın.
Faktiki olaraq, işğalçı siyasət apardığını təsdiq edir, Azərbaycan torpaqlarını
işğal etdiyini etiraf edir. Sonuncu imkanlardan istifadə etməklə, bu cür
üsullarla hakimiyyətdə qalmaq istəyir”.
Politoloq
beynəlxalq təşkilatların, həmsədr dövlətlərin Sarkisyanın sərsəmləmələrinə
susqun yanaşmaları haqda da danışdı: "Doğrudur, onlar bizim ərazi bütövlüyümüzü
tanıyırlar. Amma faktiki, Ermənistana təzyiq etmirlər. Bu kimi məqamlar isə belə
bəyanatların verilməsinə səbəb olur. Sarkisyan kimi adamların hakimiyyətdə
qalmasına şərait yaradılır. Həmçinin separatçı rejimlərin "referendum” adlı
tamaşa təşkil etmələrinə imkan verilir. Bəli, buna sırf imkan yaradılır.
Halbuki beynəlxalq təşkilatların da, həmsədr ölkələrin də mövqeyi sərt
olmalıdır. Sərt, həmçinin birmənalı mövqeləri olsa, işğalçıya təzyiqlər edilsə,
Sarkisyan və onun ətrafı bu cür davranmaz”.
Politoloq Elxan Şahinoğlu da Sarkisyanın fikirlərini təxribatçılıq kimi qiymətləndirir:
"Bu cür təxribatlarıyla da deyirlər ki, Azərbaycan sülh istəmir, atəşkəsi daima
pozur. Elə atəşkəsə ona görə riayət etməməliyik ki, Ağdamda, Kəlbəcərdə, Şuşada
və digər işğal altındakı məntəqələrimizdə rahat çay içəcəyimiz günü
yaxınlaşdıraq. Separatçıların yaydıqları xəbərə görə, Dağlıq Qarabağdakı
"referendumu” Rusiyadan, Bolqarıstandan, Boliviyadan, Almaniyadan, hətta Avropa
Parlamentindən 100-ə yaxın müşahidəçi izləyir. Əlbəttə istisna etmirəm ki, rəqəm
şişirdilib. Ancaq əgər bu ölkələrdən həqiqətən kimlərsə bu "referendumda”
müşahidəçi qismində iştirak ediblərsə, onların adları və statusları müəyyənləşdirilib,
adı keçən hər bir ölkəyə nota göndərilməlidir. Bu, Aleksandr Lapşinin Azərbaycana
ekstradisiyası qədər prinsipial məsələdir”.
Politoloqun
fikrincə, Sarkisyanı cəzalandırmaq lazımdır: "Cəzanın yolu isə işğalçıların
itkilərini artırmaqdan keçir ki, ağılları başlarına gəlsin. Erməni
separatçılarının Dağlıq Qarabağda keçirdikləri "referendumu” özləri kimi
separatçı bölgələrdən olan Abxaziya və Cənubi Osetiyadan izləyənlər oldu. Məsələn,
onlardan biri Abxaziya "parlamentinin sədr yardımçısı” Emma Qamisoniyadır.
Abxaz separatçılarının nümayəndəsi Xankəndidə elə belə də deyib: "Əhali
referendumda böyük həvəslə iştirak edir. Yeni konstitusiya insan haqlarının
qorunmasına (?!) böyük töhfədir”. Separatçıların qardaşlığını anladıq. Ancaq
bunu o separatçı qurumun nümayəndəsi deyir ki, ərazisi tamamən Rusiyanın
siyasi, iqtisadi və hərbi nəzarəti altındadır. Rusiya Abxaziya və Cənubi
Osetiyanı öz əlavəsinə çevirib, bu iki bölgədə qoşun birlikləri yerləşdirib, hələ
prezident Vladimir Putinin müşavirlərindən biri tamamən bu iki bölgənin nəzarətinə
məsuldur. Yəni sözümün canı odur ki, Abxaziyada və Cənubi Osetiyada Kremlin bir
sözünü iki edən yoxdur. Əgər Kreml istəsəydi, əlinin altındakı separatçıların
nümayəndələrinə deyərdi ki, "Dağlıq Qarabağdakı referendumu izləməyiniz məsləhət
deyil, oturun yerinizdə”. Deməyib. Dağlıq Qarabağdakı "referendumu” izləyən
müşahidəçilərin əksəriyyətini abxaz və osetin separatçılarının təşkil etməsi
Rusiyanın özünün də bu "referendumda” marağından irəli gəlir, məqsəd Azərbaycana
təzyiq göstərmək, Ermənistan kimi vassal etməkdir. Amma hamı bilir ki, bü
mümkün olmayacaq”.
Şəfa Tapdıq