“Sarkisyan hansı ölkə barəsində danışır?”
Ermənistan prezidenti Serj Sarkisyan növbəti sərsəmləməsi ilə yenidən
ölkə ictimaiyyətinin, media, qeyri-hökumət təşkilatları və müxalifətin lağlağı
obyektinə çevrilib. Hərbi xuntanın rəhbəri utanmaz formada bəyan edib ki, aprel
ayında parlament seçkiləri demokratik standartlara uyğun formada keçirilib.
Eləcə də, ölkə korrupsiyaya qarşı mübarizədə effektli nəticələr əldə edib. Xüsusi
İstintaq Xidməti əməkdaşları ilə görüşən prezident onların fəaliyyətini yüksək
qiymətləndirib. Xüsusən də istintaq orqanının seçkilər zamanı yol verilən qanun
pozuntularının araşdırılmasındakı fəaliyyətini yüksək qiymətləndirib. "Mən
Xüsusi İstintaq Xidmətinin bu cəbhədəki fəaliyyətini effektiv hesab edirəm. Siz
göstərdiniz ki, istənilən narahatçılığa reaksiya verməyə qadirsiniz. Siz nəinki
reaksiya verdiniz, həm də başladılan cinayət işlərini məntiqi sonluğa
çatdırmağa imkan tapdınız”, - deyə Sarkisyan bəyan edib.
Dərhal da Sarkisyanın bu gülünc açıqlamalarına erməni müxalifəti və
vətəndaş cəmiyyəti təşkilatlarından reaksiya daxil olub. "Serj Sarkisyan hansı
ölkə haqqında danışır”, - deyə "Transparensi interneşnl” antikorrupsiya
mərkəzinin proqram rəhbəri Varujan Oktanyan Ermənistan prezidenti Serj
Sarkisyanın çıxışına münasibət bildirərkən bəyan edib. "Mən bilmirəm, belə bir
şeyin şahidi olmamışam. Görəsən Sarkisyan hansı ölkəni nəzərdə tutub danışıb?
Onların keçirdiyi seçki yox, imitasiya idi. Bununla bildirmək istəyirlər ki,
bizdə demokratik qaydalara uyğun seçki keçirilib. Əksinə, ölkə növbəti seçki
saxtakarlığının şahidi oldu”, - deyə erməni eksperti vurğulayıb. "Ohanyan-Raffi-Oskanyan”
blokunun üzvü, rəsmi məlumatlara görə, seçkilərdə 2 faiz səs toplayan "İrs”
partiyasının sədr müavini Armen Martirosyan isə Sarkisyanın diqqətinə "SAS Grup”un
qalmaqallı audio yazısı ilə bağlı başlanılan cinayət işinə son qoyulmasını
xatırladıb. Bundan əlavə, məktəb və bağça müdirlərinin səs yazıları və
hərəkətləri ilə bağlı qaldırılan cinayət işlərinə son qoyulmadığını xatırladıb.
Onun sözlərinə görə, Sarkisyanın açıqlaması başdan-ayağa yalan üzərində
qurulub. "Bunlar o qədər reallıqdan uzaqdır ki, adam söz tapa bilmir. Bir
ətrafa baxın, miqrasiya, insanların həyat səviyyəsi, inflyasiya hansı
həddədir”, - deyə o bildirib.
Bu arada hakimiyyət ötən gün siyasi baxışlarına görə həbs etdiyi
Samvel Babayana hökm kəsib. "İrs” Partiyasının sədr müavini hesab edir ki,
Babayana qarşı siyasi hökm çıxarılıb. Onun sözlərinə görə, Babayana qarşı
hücumlar sonuncunun siyasi fəallığından, eləcə də, onların blokuna dəstək
verməsindən sonra başlayıb.
Qeyd edək ki, tanınmamış "Dağlıq Qarabağ Respublikası”nın sabiq
müdafiə naziri Samvel Babayan barəsində 6 il müddətinə həbs qərarı çıxarılıb.
Babayan "İqla” tipli zenit-raket sistemi əldə etməkdə və qeyri-qanuni yolla
əldə edilmiş pulların yuyulmasında ittiham olunur. İkinci ittihama əsasən, o,
Rusiyada dövriyyədən çıxarılmış və boya ilə kirlənmiş avro banknotlarını
Ermənistanda "tədavülə buraxılmaq məqsədilə təmizlətməyə çalışıb”. Cinayət işi
üzrə ittiham olunan daha 6 nəfər barəsində 2 il şərtidən 3 ilədək həbs cəza
tədbiri seçilib. S.Babayan bu il mart ayının sonunda parlament seçkiləri
kampaniyası əsnasında Ermənistanın müdafiə naziri Seyran Ohanyanın başçılıq
etdiyi müxalif seçki blokunu dəstəklədiyi dövrdə həbs edilib. Lakin bu günədək
həbsinin siyasi xarakter daşıdığı barədə heç bir söz deməyən S.Babayan özünün
son sözündə bəyan edib ki, qeyri-qanuni silah əldə etmək ittihamı ilə tutulub
saxlanıldığı ilk gündən hüquq-mühafizə orqanı nümayəndələri onunla "İqla”
barəsində deyil, "siyasətdən söhbət ediblər”.
O, bu işin arxasında kimin
dayandığı barədə məlumatlı olduğunu desə də, ad çəkməyib. Onun sözlərinə görə,
tutulandan sonra onunla bir-iki dəfə siyasət haqqında söhbət edərək, nəyə görə
tutulduğunu izah ediblər: "Bu mərhələdə mən buma toxunmaq istəmirəm. Lakin
faktlar mövcuddur, şahid var, söhbət zamanı vəkil də olub... Utanın!”. Mən bunu
özümə bəraət qazandırmaq üçün demirəm. Mən o adam deyiləm ki, sifarişin”. Bəzi
Ermənistan KİV-ləri Ermənistan Milli Təhlükəsizlik Xidmətinə istinadən
sözügedən daşınan zenit-raket qurğusu ilə prezident S.Sarkisyanın vertolyotunun
vurulmasının planlaşdırıldığını bildirmişdilər. Lakin ittihamda bu müddəa yer
tapmamışdı. Yeri gəlmişkən, erməni mediası yazır ki, Sarkisyanın bəyanatı
Qərbdən daha çox maliyyə almağa xidmət edə də bilər. "Böyük ehtimalla belədir,
lakin tək çıxışlarla səsi əzizləmək mənasızdır. Brüssel və Vaşinqton da qəti
şəkildə bildiriblər ki, boş çıxışlar yerinə konkret nəticələr gözləyirlər”, -
deyə 1IN.AM saytı yazıb.
Azər NURİYEV