Sabir Rüstəmxanlının görünməyən tərəfi
Xalq şairi Sabir Rüstəmxanlının "Astar” adlı kitabı nəşr olunub.
Kitabda iki roman, doqquz hekayə yer alır. Hansı ki, bu kitabdakı təkcə
hekayələr romandan böyük məna yükü daşıyan ciddi ədəbi nümunələrdir. Romanlar
isə Sabir bəyin görünməyən yazıçı tərəfi kimi tarixin yaddaşında öz izini
qoyacaq.
Elşad Barat
Sabir Rüstəmxanlının bu günə qədər
iyirmi iki kitabı işıq üzü görüb. Həmin kitabların hər biri ayrı-ayrılıqda
ədəbiyyat tarixində iz qoymuş ədəbi hadisələrdir. Xüsusi olaraq "Ömür kitabı”,
"Qan yaddaşı”, "Difai fədailəri” kitablarının adını çəkmək və "Astar” romanı
haqqında düşüncələrimi bölüşmək istəyirəm.
Əslində, "Astar” romanı haqqında
danışmaqdan çox susmaq lazımdır. Çünki nə lazımdırsa hamısını roman özü
danışır. Bu günün dünya oxucusu məhz belə roman istəyir. Sadə dillə hər
səhifədə sözlə şəkil çəkmək, hadisələri bütün təbəqəli oxucuların qavraya
biləcəyi tərzdə vermək və insan düşüncəsini, bəlkə də ağılı taleyə, qismətə
təslim etmək "Astar” romanının həyatın dərinliklərindən süzülüb gəlməsinə
işarədir. Romanda əhvalatın içindən qəfildən peyda olan dərin psixoloji
məqamlar oxucunu düşünməyə və əsərlə birlikdə yaşamağa məcbur edir.
Həqiqətdir ki, bu gün dünya insanı
özünü müasir texnoloji inkişaf prosesinin qoynuna ataraq tənbəlləşir. Qısa bir
müddətdə daha çox informasiya qəbul etmək istəyi ən passiv və yenilikçi olmayan
oxucularda da mövcuddur. Bir çox dünya klassiklərinin yazdığı və bizim də
dilimizdə əzbər olan bəzi romanlar var ki, bu günün təlabatı deyil. Çünki texnalogiyanın
dadını bilən oxucu filmdən yarım saata izləyə biləcəyi hadisəni 600 səhifəlik
romandan oxumaq istəmir. Buna görə də şəkilləşdirilmiş və ya filmləşdirilmiş
romanlar dünya oxucusunun kütləvi şəkildə arzusudur deyə bilərik. Sabir
Rüstəmxanlının "Astar” romanı daxili mahiyyətini şəkilləşdirə və müəyyən qədər
də filmləşdirə bilməklə öz oxucularını sevindirməyi bacarıb.
"Astar” romanını oxuyandan sonra
təxminən bir saata yaxın bu əsər haqqında düşündüm və bu fikirlərə gəlib çıxdım
ki, bütün kitablar cansızdır, səhifələrinə səliqəylə düzülmüş hərflər isə daha
çox cansızdır. Digər tərəfdən baxsaq deyə bilərik ki, təbiətdə canı və ruhu
olan bütün varlıqlar canlı varlıqlardır. Canlı varlıqlar isə müəyyən bir ömür
yaşayırlar. Əgər bir yerdə yaşantı, yaşamaq varsa, deməli, orada həyat da var.
Həyat olan hər yerdə biz özümüz, yəni oxucular da var. "Astar”ın əsər olaraq
uğuru odur ki, oxucu romanı oxuduqca özünü hadisələrin arasında hiss edir. Bu
isə o deməkdir ki, Sabir Rüstəmxanlı elmi cəhətdən mümkünsüzü ədəbi cəhətdən
mümkün edib, cansız vərəqlərə can verib, dilə gətirib, danışdırıb. Həqiqətən də
"Astar” romanı müəllifinin qələminin mürəkkəbindən cana gəlib yenidən ağac
olmaq istəyən varaqların ədəbi fəryadıdır.
Sabir bəy bu romanda Azərbaycanın
ucqar kəndində yaşayan və həyat eşqi ilə dolu olan bir gənci şəhərə gətirir və
onun diliylə, eyni zamanda, qarşılaşdığı hadisələrlə müəyyən bir dövrün
həqiqətlərinə güzgü tutur. Elbəy adı verdiyi həmin gənc oğlan romanın baş
qəhrəmanı olaraq təhsil almağa başlayır. Onun təhsilini bitirənə qədər daxili
aləmində vuruşması, psixoloji problemlərlə qarşılaşması, öz-özünə danışması və
bütün bunlarla yanaşı inadkarlıq göstərməsi, sonda isə həyatın axınına düşüb
taleyə təslim olması birbaşa müəllifin ustalığından xəbər verir. Hətta romanı
oxuduqca bəzən adama elə gəlir ki, Elbəy Sabir Rüstəmxanlının özüdür.
"Astar” romanının astarı, yəni iç
üzü həm də insanın, taleyin, həyatın astarı və ya iç üzüdür. O yazıçı həmişə
oxucu üçün maraqlı olur ki, onun görünməyən tərəfi çoxdur. Hər bir əsər
müəllifin görünməyən tərəfinin müəyyən bir hissəsini görünən edir. Görünməyən
tərəf bitəndə isə yazıçı da bitir. Məncə, "Astar” romanı Sabir bəyin görünməyən
tərəfidir. Onun bu kimi görünməyən tərəflərinin hələ çox olduğuna inanıram.
Dünya ədəbiyyatı tarixində onlarla
nümunə saymaq olar ki, yazıçı və ya şairlər gəncliyində maraqlı əsərlərlə çıxış
edir, müəyyən bir yaş həddinə çatdıqda isə tükənir, bitir. Yazdığı əsərlərdən
də görünür ki, qələminin mürəkkəbi qurtarıb. Sanki öncəki əsərləri özü,
sonrakıları başqası yazıb. Sabir Rüstəmxanlının isə bu günə qədər çap
elətdirdiyi əsərlərə, onların oxucular tərəfindən qarşılanma dərəcəsinə,
ictimai-siyasi və ədəbi yükünə baxanda əmin oluruq ki, onun qələminin mürəkkəbi
bitmək bilmir, həmişə təzə qalmağı, yeniliyə can atmağı ilə seçilir. Zarafat
deyil ki, əsrin böyük bir hissəsini yaşamış Sabir Rüstəmxanlı bu gün romanlar
və hekayələr çap etdirir və günümüzün təlabatı, oxucuların istəyi ödənilir.
Buna görə də biz gənc yazarlar Sabir bəydən bəhrələnib öz yaradıcılığımıza
yenidən baxmağa, ədəbi zənginlik kataqoriyalarını gözdən keçirməyə can atırıq. "Astar” kitabında ciddi redaktə səhvləri
vardır. Mən həmişə, hər yerdə çəkinmədən qeyd edirəm ki, ixtiyari bir əsərdə
redaktor yazıçı ilə yarı-yarıya məsuliyyət daşımalıdır. Ancaq deyəsən, "Astar”
kitabında redaktor zərrə qədər də məsuliyyət hissi yaşamayıb. Bütün bunlara
görə müəllifin heç bir günahı yoxdur. Lakin ciddi əsərlərə ciddi redaktorlar
müəyyən olunsa, daha yaxşı olar. "Astar” romanı təcrübəsiz redaktor əlinə
veriləsi əsər deyil.
Hər bir yazıçının, şairin
əsərlərində onun daxili aləmindən, qəlbinin dərin qatlarından süzülüb gələn
müəllif həqiqətləri olur. Əslində, o həqiqətlər müəllifin öz dilindən demək
istədiyi ayrı-ayrı mətləblərdir ki, müxtəlif obrazlara köçürülür.
S.Rüstəmxanlının bütün əsərlərində müəllifin daxili aləmini, dərin
düşüncələrini yəni, astarını təmsil edən bir obraz mövcuddur. Həmin obraz
əsərdə daha çox baş qəhrəmana çevrilir. Və baş qəhrəman olaraq öz millətinin,
torpağının, milli-mənəvi dəyərlərinin keşiyində dayanaraq bütövlüyə, tamlığa
can atır. S.Rüstəmxanlının "Astar” kitabında
toplanmış doqquz hekayədən biri də "Qurban” hekayəsidir. Kiçik bir əsərdə böyük
Azərbaycanın ucqar bir kəndinin paklığı, saflığı, təmizliyi göstərilmiş,
müəyyən qədər təbiətin sirri açılmış, sadə insanların həyat tərzi
şəkilləndirilmişdir. Eyni zamanda, ömrü böyü ömrünün astarını yaşamış, həyatını
içdən sürmüş insanların inanc yerinin müqəddəsliyi, paklığı göstərilmişdir.
Gənc yazar olaraq Sabir bəyin əsərlərində o qədər yaşaya bilmişəm ki, artıq
onun yazıçı təxəyyülünün harada bitəcəyini təxmin etmək məni sevindirir.
Məsələn, "Qurban” hekayəsində kəndə yağış yağsın deyə qurban kəsildiyi gün dağa
gedən Yusif obrazının oxucu təfəkküründə formalaşdığı hissədə təxmin etdim ki,
hekayənin sonunda Yusif öləcək, yəni qurbana çevriləcək və bununla da yağış
yağacaq. Həqiqətən də, sonluqda leysan yağdı və Yusifi sel apardı. Bunları
yazmaqda məqsədim budur ki, Sabir müəllim bir yazıçı kimi öz əsərlərində həm
oxucular, həm də gənc yazarlar üçün öyrəniləcək, mənimsənilib öz təcrübəsində
istifadə edilə biləcək kifayət qədər bilgilər qoyub. Onun yazıçı qələmi mətni
hiss edə bilən adamın iliyinə qədər işləyir.
İstər yazıçı, istər heykəltəraş,
istərsə də başqa ixtiyari peşə sahibi olsun, hər kəsin sənətindən öncə
şəxsiyyəti olmalıdır. Əgər şəxsiyyət yoxdursa, sənət bəlli bir yerə qədər
yüksələr və dayanar. Ümumiyyətlə, şəxsiyyətini formalaşdıra bilməyən insan
sənət üzərində heç nəyi formalaşdıra bilməz. Sabir Rüstəmxanlının
tərcümeyi-halına nəzər salanda görürük ki, o, gəncliyində özünü şəxsiyyət kimi
formalaşdırıb, tamlaşdırıb, sonra ilham mənbəyi olaraq aydın və pak olan
"xalq”, "millət”, "torpaq” kimi müqəddəs anlayışlara söykənib və bütün
əsərlərində xalq birliyinə, torpaq bütövlüyünə can atıb. Bu isə Sabir bəyin
milli ruhundan və bəşəri düşüncəsindən xəbər verir.
Elşad Barat