Saakyan yenə də dilənir
Dağlıq Qarabağ probleminin həlli ilə bağlı danışıqların intensivliyi
artdığı bir müddətdə küncə sıxılan separatçı ermənilər Avropaya ayaq açmağa
başlayıblar. Belə ki, Qarabağdakı separatçı rejimin rəhbəri Bako Saakyan
Fransaya gedib. Erməni mənbələrinin verdiyi məlumata görə, Saakyanın Fransada
olduğu müddətdə "Hayastan” ümumerməni fondunun təşkilatçılığı ilə fondun yerli
əməkdaşları və ianə toplanışına cəlb olunan yeni könüllülərlə görüşüb.
Maraqlıdır ki, bir müddət əvvəl İspaniyada Kataloniya hadisələri baş
verərkən Avropa birmənalı şəkildə muxtar vilayətin separatçı rəhbərliyinin
keçirdiyi referendumu tanımadı. Ardınca isə Kataloniya rəhbəri Karles Puçdemon
və onun rəhbərlik etdiyi hökumətin bir sıra üzvləri həbs edildilər. Amma Dağlıq
Qarabağın separatçı rejiminin rəhbəri Bako Saakyan Fransada istədiyi kimi
gəzir, görüşlər keçirir. Bu baxımdan, Avropa İttifaqının separatçı rejimlərlə
bağlı ciddi addımlar atmaq niyyəti, heç də səsləndirilən fikirlərlə üst-üstə
düşmədi. Çünki faktiki olaraq, bir separatçı rejimin rəhbəri həbs edirlər,
digərinə qucaq açırlar. Dağlıq Qarabağ münaqişəsi Avropanın içərisində olmadığı
üçün onun həllinə köməklik göstərilmir, əksinə Azərbaycana qarşı laqeydlik hələ
də davam edir. Bu baxımdan, separatçı Saakyanın səfəri Avropanın, xüsusilə
Fransanın Kataloniya və Dağlıq Qarabağ məsələsinə, burada mövcud olan rejimlərə
ikili yanaşması deyilmi?
Mövzu ilə bağlı "Kaspi” qəzetinə açıqlamasında Siyasi İnnovasiya və Texnologiyalar Mərkəzinin rəhbəri, politoloq
Mübariz Əhmədoğlu bildirdi ki, Avropanın bugünkü siyasəti ikili standartdan
o yana keçmir: "Təsəvvür edin ki, Kataloniyanın rəhbəri Puçdemon kimi savadlı,
nümunəvi bir şəxsi məhz separatçılığa görə həbs edib. İndi müzakirələr gedir
ki, onu təkadamlı, yoxsa çoxadamlı kameraya yerləşdirsinlər. Amma heç bir
savadı olmayan və cinayətkar, quldur olan, Rusiya xüsusi xidmət orqanına
çalışan Bako Saakyan sərbəst şəkildə Avropanı, Fransanı gəzir. Bundan böyük
ikili standart ola bilməz. Hesab edirəm ki, Fransa özünün siyasətinə səmimiyyət
gətirməlidir. İndi başa düşürəm ki, nəyə görə Fransa böyük potensialı, tarixi
və resursu ilə dünya, Avropa miqyasında elə də rol oynaya bilmir. Amma nə
edirlər etsinlər, dövlət başçısının dəfələrlə dediyi kimi, Azərbaycan
torpağında heç vaxt ikinci erməni dövlətinin yaradılmasına icazə verilməyəcək”.
M.Əhmədoğlu əlavə etdi ki, əgər Fransa özünə hörmət edirsə, B.Saakyan
həbs edilməli və Azərbaycana ekstradisiya edilməlidir: "Amma əksinə, onun
səfərinə və "Artsax” günləri keçirilməsinə şərait yaradılır. Fransanın bu
addımı ikili standartdan başqa bir şey deyil”.
Politoloq Natiq Miri bildirdi ki,
separatçı rejimin rəhbərinin bu səfəri Avropanın güclü dövlətlərindən biri olan
Fransadakı erməni lobbisinin təşkilatçılığı ilə baş tutub: "Saakyanın Fransaya
səfəri yalnız dilənmək üçün təşkil olunur. Görünür Qarabağ erməniləri, xüsusilə
hərbiləşmiş mafiya yenidən pulsuzlaşıb və bu maliyyə dəstəyini də Ermənistandan
ala bilməyincə, üzünü Rusiyaya deyil, Avropaya çevirib. Çünki Rusiyadakı erməni
lobbisi əvvəlki illərdə olduğu kimi Qarabağdakı erməni xuntanı "yemləyə”
bilmir. Bu baxımdan düşünürəm ki, Saakyanın səfəri Fransadakı güclü erməni
lobbisinin bilavasitə təşkilatçılığı ilə baş tutub. Eyni zamanda onu da qeyd
edim ki, Avropa İttifaqı kimi Fransada ikili standartlarla çalışan bir ölkədir.
Bütün addımlar yalnız Fransa dövlətinin geosiyasi maraqları çərçivəsində atılır.
Bu nöqteyi-nəzərdən düşünürəm ki, Fransa hakimiyyəti bütün seçkilərdə güclü
erməni lobbisinin dəstəyinə ehtiyac duyduğu üçün zaman-zaman onların bu yöndəki
fəaliyyətinə və istəklərinə qırmızı xətt çəkmək istəmir. Ona görə də rəsmi
Paris bu kimi məsələlərə ikili standartlardan yanaşır”.
N.Mirinin sözlərinə görə, Dağlıq Qarabağdakı separatçı rejimin
rəhbərinin Fransaya səfəri geosiyasi strateji əhəmiyyətə malik deyil. O qeyd
etdi ki, bu səfər çərçivəsində hansısa ciddi siyasi nəticələrin olacağını
gözləmək də əbəsdir: "Bu səfər qeyd etdiyim kimi, erməni lobbisinin
təşkilatçılığı ilə baş tutub. Bako Saakyan isə növbəti dəfə dilənmək üçün
Avropaya turist səfərinə çıxıb”.
Bəxtiyar MƏMMƏDLİ