Bakı 27°C
Saakaşvili Ukraynaya dönməkdə israrlıdır
Gürcüstanın sabiq prezidenti Mixail Saakaşvilinin başı üzərində qara
buludlar əsməkdə davam edir. Bu dəfə Gürcüstan prokurorluğu onun ekstradisiyası
ilə bağlı Ukraynaya rəsmi sorğu göndərib. Bu barədəQərb nəşrləri Gürcüstanın
"İmedi” televiziya kanalına istinadla xəbər yayıblar. Məlumatda bildirilir ki,
Gürcüstan prokurorluğu Ukrayna tərəfinə Saakaşvilinin ekstradisiyası ilə bağlı
rəsmi sorğu göndərib və Gürcüstanın baş prokurorluğu hazırda Ukrayna
prokurorluğu ilə bu məsələ ilə bağlı yaxından əməkdaşlıq edir. Qeyd edək ki,
Ukrayna prezidenti Petro Poroşenko iyulun 26-da Saakaşvilini vətəndaşlıqdan
məhrum edib. Saakaşvili həmin vaxt Vaşinqtonda idi. O, avqustun əvvəllərində
Vaşinqtondan Polşaya, sonra isə Litva və Macarıstana gedib. Qeyd edək ki, Saakaşvili
həm də Ukraynanın Odessa vilayətinin keçmiş qubernatorudur. O, bu günlərdə
bəyan edib ki, sentyabrın 10-da Ukraynaya dönmək fikrindədir. M.Saakaşvili
vətəndaşlığını geri almaq üçün mübarizə aparacağını bəyan edib. M.Saakaşvili
2003-cü ildə "Qızılgül inqilabı” nəticəsində Gürcüstanda hakimiyyətə gəlib və
iki müddət prezident olub. Amma sonradan populyarlığı getdikcə azalıb. Nəticədə
parlament seçkilərində onun lideri olduğu "Vahid Milli Hərəkat” məğlub olub.
Bundan sonra isə o, ölkəni tərk edib. 2015-ci ildə Ukrayna prezidenti Petro
Poroşenko ona Ukrayna vətəndaşlığı verəndən sonra Gürcüstan vətəndaşlığı
əlindən alınıb. Ötən il Odessa vilayətinin qubernatorluğundan istefa verdikdən
sonda Poroşenko ilə də münasibətləri pozulub və korrupsiya ilə mübarizə aparmaq
üçün yeni partiya yaradaraq siyasi mübarizəyə girişib.
Yeri gəlmişkən, M.Saakaşvili dünən bəyan edib ki, Ukraynaya dönməkdə israrlıdır. Siyasətçi ümidvardır ki,
sərhəd-buraxılış məntəqəsi yaxınlığında onu minlərlə tərəfdarı qarşılayacaq.
Lakin Ukrayna baş prokurorunun müavini Yevqeni Yenin bildirib ki,
M.Saakaşvilini yalnız Ukrayna vizası olacağı təqdirdə ölkəyə buraxa bilərlər.
"Mənim Ukraynada evim var və ora mənim daimi yaşayış yerimdir, Polşaya isə
polyak dostlarımın dəvəti ilə gəlmişdim”, - deyə eks-prezident bildirib. O,
əlavə edib ki, Varşavadadır və oradan Ukraynaya dönməyi planlaşdırır: "Mən həm
də bura ona görə gəlmişəm ki, Polşa Ukraynadan uzaqda deyil”. M.Saakaşvili
hesab edir ki, Ukraynaya gəlmək üçün tam ixtiyarı var. "Sizin diqqətinizə
çatdırım ki, hətta vətəndaşlığım olmasa belə, Ukrayna Konstitusiyasına görə mən
bütün hüquqlara malikəm. Ukraynaya qayıdıb, hüquqlarımı məhkəmədə müdafiə
etməyə hazırlaşıram”.
"Rux- yeni qüvvələrin birliyi” partiyasının lideri Ukrayna hakimiyyət
orqanlarının onu Gürcüstana ekstradisiya edə biləcəklərini istisna edir.
Facebook yazdığı statusda o bildirib ki, əgər Poroşenko onu Gürcüstana təhvil
vermək istərsə, bu, onun Rusiyaya təhvil verilməsinə bərabər olacaq: "Mən
siyasi hərəkatın lideriyəm. Hansı əsasla məni sərhəddən buraxmalı deyillər.
Düzdür, onlar nə istəsələr edə bilərlər. Lakin qanun onların tərəfində deyil”.
M.Saakaşvili Ukraynanın hakimiyyət orqanlarını dönüşünü sirk mərasiminə
çevirməməyə çağırıb. Onun sözlərinə görə, bu yaxınlarda kütləvi informasiya
vasitələrində Gürcüstan daxili işlər naziri Georgi Mqebarişvili ilə özünü
Ukrayna daxili işlər naziri Arsen Avakov kimi təqdim edən şəxs arasında gedən
telefon danışığının mətni yayılıb. Həmin danışıq zamanı gürcü məmur bildirib
ki, Gürcüstan eks-prezidentin ekstradisiyasında maraqlı deyil. Batumidə
dincələn gürcü nazirin içkili vəziyyətdə olduğu iddia edilir. "Bu şəxs
(Saakaşvilini nəzərdə tutur-müəl) bizə lazım deyil. O, yalnız və yalnız
avantüra ilə məşğul olur. Mən baş nazirlə də söhbət etmişəm. Baş nazir məndən
onun sözlərini çatdırmağı xahiş edib. "O dedi ki, bu axmağı bizə göndərməyin.
Qoy bomj həyatı yaşamaqda davam etsin”. Odessa vilayətinin keçmiş
qubernatorunun mətbuat katibi Darya Çij də sərhədçilərin bəyanatlarına
baxmayaraq, Saakaşvilinin Ukraynaya dönmək planından əl çəkmək istəmədiyini
bildirib.
Xanım bildirib ki, Saakaşvili artıq Ukrayna pasportu ilə Macarıstan,
Litva və Polşada səfərdə olub və yerli sərhədçilərlə onun hər hansı bir problemi
olmayıb. Mətbuat xidmətinin rəhbərinin sözlərinə görə, əgər onun pasportunu
Ukrayna ilə sərhəddə əlindən alsalar, onda o öz hüquqlarını məhkəmədə qorumağa
çalışacaq. Bəs görəsən, Ukrayna hakimiyyət orqanlarının, konkret olaraq
prezident Poroşenkonun birdən-birə antisaakaşvili mövqeyində durmağa nə məcbur
elədi? Bu ilk növbədə qarşıdan gələn prezident seçkiləri ilə bağlıdır. Məsələ
ondadır ki, hazırkı prezident Mixail Saakaşvlini və onun rəhbəri olduğu yeni
hərəkatı özünə ciddi rəqib görür. Hazırkı hakimiyyət sadə ukraynalılar arasında
Odessanın sabiq qubernatorunun nüfuzunun durmadan artmasından narahatdır. Rəsmi
Kiyevin Saakaşviliyə qarşı Qərbdən də ciddi dəstək və razılıq aldığı
bildirilir. Məsələ ondadır ki, artıq Qərbin özündə də Saakaşviliyə qarşı ciddi
rəğbət hiss olunmur. Belə ki, hər iki ölkə - Ukrayna və Gürcüstanla bağlı
Avropa İttifaqının planları həyata keçib. Həm Tbilisi, həm də Kiyev ilə vizasız
gediş-gəliş barədə sənədə imza atılıb. Belə olan halda Avropa İttifaqı bu
ölkələrlə Saakaşviliyə görə münasibətləri pisləşdirmək istəməzdi. O ki qaldı
Birləşmiş Ştatlara, okeanın o tayındakı strateqlər hələ ki, gözləmə mövqeyində
durmağa üstünlük verirlər.
Azər
