Saakaşvili Ukraynanın “xilaskar”ı olmaq iddiasındadır
Qalmaqallı hərəkətləri ilə gündəmi tutan Odessa vilayətinin sabiq
qubernatoru Mixail Saakaşvili Ukrayna rəhbərliyini hədələməkdə, ölkədə siyasi
gündəmi dəyişmək kampaniyası aparmaqda davam edir. O, xüsusən də Qərbdən aldığı
dəstəkdən sonra daha da pərvazlanaraq özünü Ukrayna siyasətinin lideri hesab
etməyə başlayıb. Xatırladaq ki, ABŞ-ın Ukrayna üzrə xüsusi nümayəndəsi Kurt
Volker Ukrayna prezidenti Petro Poroşenkoya Mixail Saakaşvilini sakit buraxaraq
başqa məsələlərlə məşğul olmağı məsləhət görüb.
Volkerin bu sözləri M.Saakaşvilinin Facebook səhifəsində
yerləşdirilib. "Əgər Ukrayna hüquqi dövlət qurursa, Mixail Saakaşviliyə öz
vətəndaşlığını məhkəmədə müdafiə etməsi üçün imkan yaradılmalıdır. Poroşenko
Saakaşviliyə daha az dramatik yanaşmalı və ölkənin inkişafı, korrupsiya ilə
mübarizəyə diqqət etməlidir”, – deyə o bildirib. Bu sözlər Saakaşvili tərəfindən
dəstək kimi qəbul edilib.
Ötən gün itdiyi barədə mediada məlumatlar gedən Mixail Saakaşvili
qəfildən ölkənin qərbində peyda olub və burada bir sıra bəyanatlar səsləndirib.
Çıxışında deyib ki, ölkədəki "siyasi böhran”ın həllinə köməkdən ötrü qayıdıb və
gələn həftə Kiyevə getmək fikrindədir. Gürcüstanın keçmiş prezidenti həm Ukrayna
dilində, həm də rusca danışıb. O, Çernovtsı şəhərində tərəfdarlarına deyib ki,
bu həftə ölkəyə qayıdışının məqsədi "sadəcə” Ukrayna vətəndaşlığının ləğvini
mübahisə mövzusuna çevirmək deyil. "Sizinlə birlikdə Ukraynaya əsas məsələnin
həllindən ötrü qayıtdım: hazırda ölkədə mövcud olan siyasi böhrandan necə
çıxmalı”, - deyə o bildirib. O,
Çernovtsıda deyib ki, sentyabrın 19-da Kiyevə getməmişdən öncə digər şəhərlərə
də dəstək toplamaq məqsədiylə baş çəkəcək. O, paytaxtın "təcili xilas edilməli
olduğunu” vurğulayıb. Ukrayna siyasətinə yenidən qoşulmağa və Kiyevdə
müxalifəti birləşdirməyə ümid edir. "Demək istəyirəm ki, bu, savaşımın
başlanğıcıdır”, - Saakaşvilisöyləyib. "Mən korrupsiyaya, oliqarxların
Ukraynaya faktiki nəzarət etməsinə, Maydana xəyanətə qarşı vuruşuram. Ölkəmizdə
demokratiya olmalıdır, oliqarxların diktəsi işləməməlidir”, - deyə əlavə edib.
Saakaşvili iddia edib ki, BMT-nin qaçqınlar üzrə agentliyi – UNHCR onu
"dövlətsiz” kimi tanıyıb və Ukrayna məhkəməsinə vətəndaşlığının alınması barədə
müraciət edəcək. O, Ukrayna vətəndaşlığının vaxtilə müttəfiqi olan Ukrayna
prezidenti Petro Poroşenko tərəfindən alındığını deyib, çünki fikrincə,
Poroşenko ona təhlükə kimi baxır. Ancaq onu da bildirib ki, özü üçün
prezidentlik deyil, bu posta yeni, gənc siyasətçinin gətirilməsini istəyir.
Çıxışın videosunuUkraynanın TSN televiziyası Facebook
səhifəsində yerləşdirib. Vətəndaşlığı ləğv edilən Saakaşvili sentyabrın 10-da
yüzlərlə tərəfdarının müşayiəti ilə Polşadan Ukraynanın Lvov şəhərinə keçib.
İki gün sonra Lvov rəsmiləri Saakaşviliyə rəsmi bildiriş veriblər, onun sərhədi
qanunsuz keçdiyi, bir neçə sərhədçinin insident zamanı xəsarət aldığı
bildirilir. Yerli medianın yazdığına görə, o, sentyabrın 18-də insidentlə bağlı
məhkəmədə olmalıdır.
Gürcüstan hökuməti Saakaşvilinin həbsini və ekstradisiyasını istəyir.
O, 2004-2013-cü illərdə prezident olanda mənimsəmə və vəzifəsindən
sui-istifadədə ittiham olunur. Özü isə ittihamları rədd edir, deyir ki,
Gürcüstanın ekstradisiya xahişi onun Ukraynada olmasından qorxan oliqarxların
adından verilib.
Öz növbəsində Ukraynanın baş naziri Volodimir Qroysman Facebook
səhifəsində bu insidenti Ukrayna dövlətçiliyinə hücum adlandırıb. Ukraynanın
daxili işlər naziri Arsen Avakov Saakaşvilinin sərhədi keçməsini "ölkənin əsas
institutlarına hücum” adlandırıb. Poroşenkoisə deyib ki, Saakaşvili
Ukrayna vətəndaşlığının alınmasıyla bağlı qərarla razılaşmırsa, onu məhkəmə
müstəvisində həll etməlidir.
Xatırladaq ki, Saakaşvili 2015-ci ildə Ukraynaya gedib və Odessa
vilayətinin qubernatoru kimi işləməyə başlayıb. Ötən il Odessa vilayətinin qubernatorluğundan
istefa verdikdən sonda Poroşenko ilə də münasibətləri pozulub və korrupsiya ilə
mübarizə aparmaq üçün yeni partiya yaradaraq siyasi mübarizəyə girişib.
Bir faktı da qeyd edək ki, Saakaşvili sərhədi keçəndə keçmiş baş
nazir, Ukraynanın ən böyük müxalifət partiyalarından birinin lideri
olanYuliya Timoşenkoona qoşulub. O, hazırda rəy sorğularında Poroşenkodan
öndə gedir. İslahatçı deputat, Maydan etirazlarının liderlərindən biri olmuş,
parlamentdə Poroşenkonun fraksiyasının üzvü Mustafa Nayyem də Saakaşvili ilə
birlikdə gəzib və Kiyev hakimiyyətini opponentlərini susdurmaq cəhdində ittiham
edib. "Biz Maydanda qalanda istədiyimiz ölkə bu deyildi. Biz opponentlərin, o
cümlədən siyasi opponentlərin istədiklərini dilə gətirdikləri bir ölkə istəyirdik”,
- Nayyem deyib.
Beləliklə, proseslər çox maraqlı bir məcraya yönələ bilər.
M.Saakaşvilinin Qərbdən açıq dəstək aldığını görən Poroşenko hökuməti baş
verənlərin qarşısında aciz bir duruma düşüb. Qərblə münasibətləri prioritet
hesab etdiyindən, hər hansı bir sərt addım atmaqdan çəkinir. Zaman isə hazırda
Saakaşvilinin xeyrinə işləyir.
Kamran