S-400-lər Akıncı bazasında yerləşdiriləcək
Rusiya ilə Türkiyə arasında S-400 raket sövdələşməsi deyəsən
reallaşmaq üzrədir.
Türkiyənin "Yeni şafak” nəşri yazır ki, artıq sistemin Türkiyəyə çatdırılması
prosesi sürətlənib. Danışıqlardan sonra bu sistemin Türkiyənin Akıncı bazasında
yerləşdirilməsi qərara alınıb. Bununla əlaqədar bazada iki iri anqar və raket
buraxılış meydançaları yaradılacaq, raket sistemlərinə xidmət də burada həyata
keçiriləcək. S-400-lərin Ankara yaxınlığındakı Akıncı bazasına gələn il
çatdırılması nəzərdə tutulub.
Məlumat üçün bildirək ki, bu baza ötən ilin iyulunda FETÖ
qiyamçılarının əsas bazası hesab edilirdi. Qiyam yatırıldıqdan sonra oradakı
birləşmələr Merzifon və Əskişəhərə evakuasiya olundu. İndi isə məlumat verilir
ki, seçimdə Akıncı bazası üzərində dayanılıb: "Səbəb də odur ki, ölkənin
təhlükəsizliyi, onun hava hücumundan müdafiəsinə paytaxtdan başlanılır. Eyni
zamanda bu baza əlverişli şəraitə - anqar, uzun uçuş-enmə zolağına, geniş
əraziyə malikdir. Raket sistemlərinin Akıncı bazasına çatdırılması ərəfəsində
burada gərgin işlərə başlanılıb”. Qəzet yazır ki, artıq Rusiyanın dövlət
şirkəti bu sistemləri çatdırmaq üçün türk tərəfindən anqar və raket-buraxılış
meydançası istəyib. Türkiyənin bütövlükdə iki batareya S-400 alacağı
bildirilir. Hər iki batareya Akıncı bazasına gətiriləcək. Həmin sistemlərin adıçəkilən
bazada yerləşdirilməsi ondan xəbər verir ki, onlar sülh dövründə burada
saxlanılacaq. Bununla yanaşı, ekspertlər diqqəti Türkiyənin "Roketsan”
şirkətinə yönəldirlər. Məhz bu şirkət Türkiyədə uzaq məsafəli hava hücumundan
müdafiə sistemlərinin istehsalında iştirak etməlidir.
"Hərbi obyektlərin yerləşdirilməsi müxtəlif kriteriyalarla, ən vacibi
nəqliyyat şəbəkəsi ilə müəyyən olunur. Bununla əlaqədar Akıncı bazası ön plana
keçir. Bu baza İstanbulun cənubu ilə Ankaranı birləşdirən kəsikdə yerləşir. Bu
baza Çinlə raket alınması sahəsində aparılan danışıqlarda da uzaq mənzilli raketlərin
yerləşdirilməsi üçün əsas yer kimi nəzərdən keçirilirdi. Həmin illərdə baza
seçilmədi, çünki orada 141 və 142-ci bazalar yerləşirdi”, - deyə qəzet yazır.
Baş nazirin müavini Bəkir Bozdağın sözlərinə görə, Rusiya ilə S-400 barədə
razılaşma imzalandıqdan sonra bu sistemlər ölkə ərazisinə gətiriləcək. Bu
raketlər əldə olunduqdan sonra isə texnologiyalar da Türkiyə tərəfinə təhvil
veriləcək. "Türk mühəndis və alimlərinin bu cür raket istehsal etmək imkanları
və qabiliyyətləri inkişaf etdiriləcək”, - deyə baş nazirin müavini bildirib.
"Biz özümüzün hava hücumundan müdafiə sistemimizi yaratmalıyıq. İndi özümüzün
hava hücumundan müdafiəmizi başqalarından aldığımız "Patriot” sistemi ilə
həyata keçirə bilirik. Əgər sabah onlar olmasa, nə edəcəyik? Dövlətin
təhlükəsizliyinə hədə varsa, biz buna müvafiq addımlar atmalıyıq”, - deyə B.Bozdağ
bildirib.
Yeri gəlmişkən, bəlli olub ki, Rusiya və Türkiyə prezidentləri -
Vladimir Putin və Rәcәb Tayyib Ərdoğan sentyabrın 28-də şam yeməyində bir araya
gələcəklər. Rusiya prezidenti ilə bazar ertəsi günü telefon əlaqəsi
saxlayacaqlarını bildirən Әrdoğan: "Cümə axşamı şam yeməyi yeyəcəyik. Suriya
məsələsini müzakirə edəcəyik” deyib. Dövlət başçısı görüşdə, həmçinin
Türkiyənin Rusiyadan almağı planlaşdırdığı S-400 zenit-raket kompleksi
məsələsini də müzakirə edəcəklərini vurğulayıb.
Bir faktı da qeyd edək ki, Türkiyənin bu cür sistemlər almasına NATO-dan
özünəməxsus reaksiya gəlib. "Türkiyə lideri Rəcəb Tayyib Ərdoğan NATO-ya sadəcə
sözləri ilə deyil, davranışları ilə də bağlıdır”, - deyə NATO-nun baş katibi
Yens Stoltenberq AP-yə açıqlamasında deyib. O bildirib ki, Rusiyadan S-400
zenit-raket kompleksləri alan Türkiyə Fransa və İtaliyadan da bənzər sistemlər
alınması üçün danışıqlar aparır: "Ötən gün Ərdoğanla görüş keçirdim. SAMP/T
havadan müdafiə sistemlərinin alınması üçün danışıqlara start verdik. Bu
görüşdən hansı nəticələrin çıxacağına baxmalıyıq. Ümid edirəm, qənaətbəxş
nəticə əldə edəcəyik. Türkiyə İraq və Suriya ilə sərhəddə yerləşməsindən dolayı
açar ölkədir”.
Qeyd edək ki, ötən gün Türkiyə prezidenti bildirmişdi ki, Ankaranın
NATO üzv dövlətləri ilə zenit-raket komplekslərinin əldə olunması ilə bağlı
danışıqlar aparmasına baxmayaraq, alyansın heç bir üzvü Türkiyəyə bu imkanı
təqdim etməyib: "Suriyada S-400 varkən, mən S-400, S-500, hətta S-600-ə də
sahib ola bilərəm. Bunlar özümüzü qorumaq üçün atılan addımlardır. Ballistik
raketlərlə də bağlı görülən işlərimiz olacaq. 80 milyonluq Türkiyəni qorumaq
bizim vəzifəmizdir. A-dan Z-yə nə lazımdırsa, onu da edəcəyik”, - dövlət
başçısı bildirib.
Azər