Rusiyalı alimin Xocalı soyqırımı ilə bağlı hazırladığı petisiyaya səs verək
Rusiyalı tarixçi alim Oleq
Kuznetsovun Xocalı soyqırımının tanıdılması üçün hazırladığı petisiyaya qısa
vaxtda 15 mindən çox imza toplanıb. Rusiya Dövlət Dumasının üzvlərinə
ünvanlanmış petisiyaya reaksiyanın verilməsi üçün ümumilikdə 25 min imzanın
toplanması zəruridir.
Bununla bağlı mayın 3-də Bakıda tədbir təşkil edilib. Milli
Məclisin regional məsələlər komitəsinin sədri Arif Rəhimzadə bildirib ki,
Rusiyanın tanınmış tarixçisi və siyasi təhlilçisi Oleq Kuznetsovun Xocalı faciəsinin
soyqırımı cinayəti kimi tanınması ilə bağlı tərtib etdiyi petisiyada 1992-ci il
fevralın 25-dən 26-na keçən gecə Xocalıda dinc sakinlərə qarşı amansız cinayətin
törədildiyi, bunun hazırda Ermənistan hakimiyyətində təmsil olunan şəxslər tərəfindən
gerçəkləşdirildiyi vurğulanır. İnsanlığa qarşı törədilən Xocalı faciəsini bir
sıra dünya dövlətləri soyqırımı aktı kimi tanıyıb. Petisiyada eyni addımın
Rusiyanın Dövlət Duması tərəfindən atılmasının vacibliyi əsaslandırılır.
Azərbaycan gənclərini Xocalı faciəsinə hüquqi
qiymətin verilməsi istiqamətində həyata keçirilən tədbirlərə dəstək göstərməyə,
bununla əlaqədar müvafiq təbliğat işləri aparmağa və petisiyaya imza atmağa
çağıran Oleq Kuznetsov az vaxtda petisiyaya minlərlə internet istifadəçisinin
qoşulduğunu qeyd edib. O deyib ki, Rusiya Dövlət Dumasının üzvlərinə
ünvanlanmış petisiyaya reaksiya vermək üçün change.org saytına daxil olmaqla
imza sayını daha da artırmaq mümkündür: "Bu sənəd qətliamın soyqırımı kimi qəbul
edilməsində, onu törədən cinayətkarların hüquqi məsuliyyətə cəlb edilməsində
mühüm əhəmiyyətə malikdir”.
Hər kəsi xalqımız və dövlətimiz üçün çox önəmli olan change.org saytına daxil olmaqla, aşağıda təqdim olunan şəkildə göstərilən qaydadabu petisiyaya səs
verməyə çağırırıq.