Rusiya miqrantlarla bağlı qaydaları sərtləşdirir
Rusiya hakimiyyət orqanları yaxın və uzaq xaric ölkələri ilə
potensial miqrantların yığımı barədə danışıqlar aparır. Rusiya nəşrləri yazır
ki, bundan əlavə, ölkənin Daxili İşlər Nazirliyində qanunları pozan əcnəbilərin
ölkədən çıxarılması ilə bağlı plan hazırlanıb. Yeni qaydalara görə, qastarbayterlərdən
ölkələrinə qayıtmaq üçün vəsaiti ödəmək tələb olunacaq, əks təqdirdə onlar məcburi
işlərə cəlb olunacaqlar. Artıq Dövlət Dumasına DİN-in səlahiyyətlərinin
artırılmasını nəzərdə tutan "Gəlmələrin deportasiyası ilə bağlı təşkilatın
səlahiyyətləri” adlanan qanun layihəsi daxil olub. Güc strukturu dəfələrlə ölkə
qanunlarını pozan şəxslərin geri qaytarılması üçün vəsait çatışmazlığından
şikayət edib. Yeni təklif olunan dəyişikliklər də bu sahədə yaşanan
problemlərin aradan qaldırılmasına xidmət etməlidir. Məsələn, xırda qanun
pozuntularına yol verən əcnəbilərin öz hesablarına ölkədən çıxarılması təklif
olunur. Onlar müstəqil şəkildə bilet alıb, polislərin müşayiəti ilə ölkədən
çıxa biləcəklər. Hüquq-mühafizə orqanları əməkdaşları həmin şəxslərin təyyarə
və yaxud qatara minib sərhədi keçib ölkəni tərk etməsinə və bir də qayıtmamasına
nəzarət edəcəklər. DİN həmin şəxslər barədə məlumatları ümumi bazada
saxlayacaq. Bununla da miqrantlar aylarla həbsxana şəraitini xatırladan
yerlərdə nə vaxt deportasiya olunacaqları günü gözləməyəcəklər. Dövlət də bütün
bunlardan az vəsaitə qənaət etməyəcək. Belə ki, bir şəxsin saxlanılması və
deportasiyası 90 min rubla başa gəlir. Miqrantlara alternativ variant kimi
məcburi işlərə cəlb edilməsi təklif oluna bilər. Məmurların qənaətincə, ölkədən
çıxarılacaq şəxslər müvəqqəti saxlanc yerlərində qalmaqdansa, məcburi işlərə
cəlb edilib cərimələrini ödəsələr yaxşı olar. Daxili İşlər Nazirliyi bununla
yanaşı, miqrantlarla bağlı qaydaların sərtləşdirilməsini də planlaşdırır.
Əsas məsələlərdən biri də miqrantların öz vətənlərində yığılması
prosesidir. Yaxın və xaric ölkələrində bu məqsədlə xüsusi mərkəzlər
yaradılacaq. Orada yerli sakinlərin hazırlanması, təhsili və Rusiyaya
göndərilməsi prosesi həyata keçiriləcək. Ən əsası, onların məhkəmə ilə bağlı problemlərinın
olub-olmadığı da əsas götürüləcək. Artıq bu cür razılaşma Özbəkistanla
imzalanıb. Digər yaxın xaric ölkələri ilə də analoji sazişlərin imzalanması
nəzərdə tutulub. Bu saziş çərçivəsində rusiyalı sahibkarlar öz işçilərini
yerlərdə evlə təmin edəcək, eləcə də, təhlükəsizliyini, təmin olunan əmək haqqı
ilə bağlı problemlərini həll etməli olacaqlar. Əgər onlar bütün bunları
etməsələr, onda məsuliyyətə cəlb olunacaqlar. Məlumat üçün bildirək ki, artıq
dünyanın bir çox yerlərində miqrantlar üçün belə qaydalar mövcuddur. Məsələn, həmin
ölkələrdə işləmək üçün gələn miqrantların yaşı 40-dan yuxarı olmamalı, təhsil
minimum orta olmalı və geriyə biletləri mütləq olmalıdır. Yeri gəlmişkən, artıq
Rusiya əyalətlərində əmək miqrantları arasında "təmizləmə” işlərinə başlanılıb.
Prokurorluq və İstintaq Komitəsi qastarbayterləri müəyyən edir, onlara verilən
qanunsuz iş sənədlərini üzə çıxarır. Tək Sverdlovsk vilayətində 202 belə hal
müəyyən olunub. Rusiya baş naziri Dmitri Medvedyev isə bu günlərdə əcnəbilər və
vətəndaşlığı olmayan insanlar üçün müvəqqəti yaşayış üçün verilən kvotaların
azaldılması barədə qərar qəbul edib. Gələn il 90 min belə sənədlərin verilməsi
nəzərdə tutulub. Bu da əvvəlki illə müqayisədə 20 min azdır. Hökumətdən bildiriblər
ki, ilbəil Rusiyaya gələn miqrantların sayında azalma müşahidə edilir. Bu ilin
səkkiz ayı ərzində də 37 min azalma var. Rusiya əmək və sosial müdafiə naziri
Maksim Topilin bildirib ki, miqrasiya axının azalması ölkənin əmək bazarına
təsir etməyib. Əksinə, onun qənaətincə, vəziyyət yaxşılaşıb. Belə ki, bir çox
sahələrdə xarici işçilərin ruslarla əvəzlənməsi prosesi yaşanıb.
Azər