Rusiya mediası Ermənistanı “vurur”
Son günlər
Rusiyanın aparıcı informasiya saytları ard-arası kəsilmədən Ermənistanın baş
naziri Nikol Paşinyanın Brüssel səfərini ən müxtəlif formada şərh edir. Əksəriyyət
yazılarda baş nazir ən ağır formada təhqir olunur, aşağılanır. "1in.am”
saytında dəc olunan meterialda müəllif yazır ki, rusların bu təhqirlərinin arxasında
Paşinyanın antirusiya ritorikası durur. Məsələn, "Regnum.ru”, "Lenta.ru”,
"Gazeta.ru” və s informasiya-analitik saytlarda dərc olunan materialların əksəriyyəti
bir-birini təkrarlayır. Erməni saytı əminliklə yazır ki, kremlyönlü saytlarda
antierməni ritorikanın bir mərkəzdən idarə olunması heç kimdə şübhə doğurmur.
"Bu tənqid və təhqir dolu materiallar Rusiyanın rəsmi təbliğat maşınının tərkib
hissəsidir”, - deyə müəllif yazır. Paşinyanın NATO-nun Brüssel sammitində
iştirakı, keçirdiyi görüşlərin Rusiyada sərt qarşılanacağı gözlənilənidir və
belə də oldu. Bu səfərin ardınca, bütün Ermənistanı şoka salan insident baş
verdi.
Rusiyanın bu ölkədə dislokasiya olunmuş hərbi bazasının əsgərləri yaylım
atəşləri ilə bütöv kəndi stressdə saxladılar. İnsident Ermənistanda antirusiya əhval-ruhiyyəni
daha da gücləndirmiş oldu. Hətta siyasətdən başı çıxmayanlar belə gözəl bilirlər
ki, həmin gülləboran birbaşa Paşinyana ünvanlanan atəşlərdi. Yəni, sən bizim
forpostumuz ola-ola, necə olur ki, belə bir antirusiya sammitində iştirak edirsən
xəbərdarlığı. Sayt yazır ki, Paşinyan ilk gündən bəyan edib ki, xarici siyasətdə
hər hansı bir dəyişiklik baş verməyəcək. Hətta Brüssel aeroportunda keçirdiyi mətbuat
konfransında Moskvaya müəyyən bir mesajlar da ünvanladı. Rəsmən bəyan etdi ki,
ölkə nə Kollektiv Təhlükəsizlik üzrə Müqavilə Təşkilatından, nə də Avrasiya
İqtisadi İttifaqından çıxmağa hazırlaşmır. Lakin məhz bu sözlərdən sonra Rusiya
kütləvi informasiya vasitələrində görünməmiş şəkildə antierməni təbliğatı start
götürməyə başladı. Rusiya KİV-ləri mərkəzdən gələn tapşırıqlar əsasında
Paşinyan hökumətinin sərt tənqidlərinə başladılar. Və müəyyən mənada əllərində əsas
da var. Məsələn, Paşinyan hökumətinin tərkibini analiz edən "Lenta.ru” saytı
yazır ki, onların əksəriyyəti Rusiyaya nifrət bəsləyən şəxslərdən ibarətdir. Məxməri
inqilabdan əvvəl və inqilab gedişində onlar Rusiyanı ittiham edən fikirləri ilə
yadda qalıblar. Elə Paşinyanın özü də onlardan geri qalmayıb. Bu şəxs deputat
olanda təmsil olunduğu "Çıxış” blokunun adından Ermənistanın Avrasiya İqtisadi
İttifaqından çıxması barədə qanun layihəsi ilə çıxış etmişdi.
"1in.am” saytı da
yazır ki, Moskvanın ən böyük problemi ondadır ki, Yerevanda tamam yeni bir
keyfiyyətdə dövlət formalaşır. Bu komanda ilə Rusiya hakimiyyəti heç cür işləyə
bilməz. Yəni ermənilərin yeni nazirləri başda baş nazir olmaqla, artıq forpost
kimi görünmək istəmirlər. Adi bir misal. Rus hərbçilərin törətdikləri insidentdən
sonra Paşinyanın sərt bəyanatını götürək. Halbuki, vaxtilə Permyakov bütöv bir
erməni ailəsini qətlə yetirəndə o vaxtkı prezident Serj Sarkisyan səsini də
çıxarmamışdı. İndi isə belə baxanda, ilk baxışda adi bir atışma baş verib.
Lakin məsələ böyüyür - baş nazir, xarici işlər naziri və s. rəsmilər məsələyə sərt
reaksiya verir. "1in.am” saytı daha sonra maraqlı bir şərh verir. "Əslində, Rusiyanı
Ermənistan daxilində baş verən köklü dəyişikliklər narahat etməməlidir. Çünki
bizim strateji tərəfdaş burada total etibara malikdir. Lakin biz yaddan
çıxarmamalıyıq ki, bu total etibar, tərəfdaş münasibətlərə deyil, gizli müdaxilələrə,
korrupsiya elementlərinə, oliqarxik seqmentlərə əsaslanır”, -deyə müəllif
yazır. Müəllif iddia edir ki, Paşinyanın antikorrupsiya siyasəti Rusiyanın
bütün təsir imkanlarını heçə endirir. Rəsmi Yerevanın təşəbbüsləri Moskvanın
ümid etdiyi bütün əsasları məhv edir. Kreml Ermənistanda ən böyük dağıdıcı
resursdan məhrum olur. Həmin vasitə istənilən vaxt Ermənistanı "partlatmaq”
imkanlarına malik idi.
Yeri gəlmişkən,
erməni kəndində yaşanan insident böyüməkdə davam edir. Ermənistanın müdafiə
naziri David Toroyan bəyan edib ki, Rusiyanın Ermənistandakı sərhəd
qoşunlarının statusu təkrar gözdən keçiriləcək. "Bunlar daşda yonulmuş sənədlər
deyil və vaxt ötdükcə problemlər yaranır. Hansılar ki, hüquqi və müqavilə dəyişiklikləri
tələb edir. Və bu, əlbəttə, ediləcək”,- deyə nazir Yerevanda jurnalistlərə
bildirib. Nazir konkret nə kimi dəyişikliklərin ediləcəyini dəqiqləşdirməyib.
Amma izah edib ki, Şirak əyalətinin Panik kəndində Rusiya hərbi qulluqçularının
iştirakı ilə törədilən hadisə dəyişiklikləri sürətləndirə bilər. Dərhal da
Rusiyanın "Kommersant” qəzeti yazıb ki, Rusiya Federasiyasının Ermənistandakı sərhəd
qoşunlarının statusuna yenidən baxılması haqda müdafiə naziri David Toroyanın bəyanatı,
bu ölkənin müstəqilliyinin ilk illərindən bəri respublikada olan Rusiya hərbçilərinin
ünvanına səslənən ən sərt fikirdir. Bütün bunların ardınca, Rusiya forpost ölkədə
planlaşdırılmayan hərbi təlimlərə başlayıb. Bu haqda məlumatı Rusiya Müdafiə
Nazirliyinin Cənub Hərbi Dairəsinin mətbuat xidməti yayıb. Təlimə 3000-dən
artıq hərbçi cəlb edilib. Mətbuat xidməti təlimin bu həftənin sonuna qədər
davam edəcəyini bildirib. Ümumilikdə 500 hərbi texnika təlimə cəlb olunub.
Azər