Risk etməyə dəyərmi? - Polemika

Bəzən etdiyimiz cəsarətli risklər həyatımızı tamamilə dəyişə bilir. Ümumiyyətlə, həyatda böyük uğur və nailiyyətlər əldə edən bir çox şəxslər deyirlər ki, insan risk etməsə, uğur qazana bilməz. Çünki bacarıq insanı öz çərçivəsində saxlayır, risk isə ondan daha böyük yerlərə gətirib çıxara bilər. Bundan fərqli olaraq, digər bir qrup insan isə öz həyatında risk anlayışına yer vermir. Onlar bütün işlərini ölçüb-biçib, planlı şəkildə həyata keçirməyin tərəfdarıdırlar. Bu qrup insanlar isə deyir ki, insan həyatı riskə atılmayacaq qədər dəyərlidir. Nə etməli olduğumuzu, nəyi istədiyimizi yaxşıca ölçüb-biçməyi bacarmalıyıq. Bəzən quru cahil cəsarəti istənilməyən nəticələrə gətirib çıxara bilir. Bəs gənclərimiz necə fikirləşir? Həyatda böyük risklər etməyə dəyərmi? Kiməsə, yaxud nəyəsə görə riskə getmək düzgündürmü?
Ülkər Yarıyeva, jurnalist
Ülkər deyir ki, risk insan həyatında böyük rol oynayır: "Hesab edirəm ki, risk etmək çox vacibdir. Amma bunu hər adam da bacara bilmir. Çünki səni qarşıda hansı sürprizlərin gözlədiyini heç vaxt bilə bilməzsən. Bunun üçün insanın bir az cəsarətə, bir az da şansa ehtiyacı var deyə düşünürəm. Təbii ki, hər şeyi riskə atmağın tərəfdarı deyiləm. Hansı ki, riskə aldığın şeyin nəticələrini əvvləcədən bilirsənsə, boş-boşuna edilən riskin insana heç bir faydası ola bilməz. Bu, bir qədər ağılsızlıq olar. Amma yeri gəldikdə insan cəsarətli olmağı da bacarmalıdır. Risk bəzən nəyisə itirməklə də nəticələnə bilər. Amma fikrimcə, nəyisə qazanmaq üçün bəzən itirmək lazımdır. Bu sənə bir dəfə baha başa gəlsə belə, ən azından təcrübə qazanmış olursan. Növbəti dəfə eyni səhvləri etməmək üçün insan bəzən risk etməyi bacarmalıdır”.
Risk insanı çətin vəziyyətə sala bilər
Tofiq Ərəbov, xanəndə
Tofiq isə Ülkərin əksinə olaraq, fikirləşir ki, risk etmək düzgün deyil: "Risk etmək heç də hər zaman yaxşı nəticələnməyə bilər. Yaxud da nəticə bir dəfə yaxşı olsa belə, ikinci dəfə insan çox çətin bir vəziyyətə düşə bilər. Həyat qumar deyil ki, risk edəsən. Hesab edirəm ki, ağılla hərəkət etmək risk etməkdən daha önəmlidir. Ümumiyyətlə, ağılla görülən heç bir işdə riskə ehtiyac olmur. Əgər risk varsa, deməli, təhlükə də böyükdür. Bəzən bir çoxları riskə gedib bütöv həyatlarını məhv ediblər. Demək olar ki, çoxumuzun ətrafında belələrinin sayı kifayət qədərdir. Bunun sonradan da heç bir geridönüşü olmur. Halbuki ağıllı və düşünülmüş şəkildə atılan hər bir addımın mənfi nəticələrinin sonradan bərpası mümkündür”.
Həyat mübarizədirsə, risk etməyə dəyər
Ayşən Altay, tələbə
Ayşən də Ülkərlə həmfikirdir. O da deyir ki, risk etmək hər zaman lazımdır: "İnsan həmişə olduğu yerdən daha üstün yerdə olmağa can atır. Bəzən deyirlər ki, çox istəyən azdan da olar. Amma mən bu fikirlə qətiyyən razı deyiləm. Yaşayırıqsa, nəyisə əldə edə biləriksə, niyə əlimizdəki ilə kifayətlənməliyik? Hər kəsin həyatda öz mövqeyi, durduğu bir nöqtə var. Amma nə bilirik ki, layiq olduğumuz nöqtədəyikmi? Lakin istəklərimizin qarşısında çox vaxt maneə olur. Ən böyük maneəmiz isə içimizdəki qorxudur. Risk etməkdən, irəli getməkdən çox zaman qorxuruq. Bəzən isə risk etsək əlimizdəkiləri də itirərik deyə addım atmırıq. Bununla da oturduğumuz yerdə sayırıq”.
Ayşən deyir ki, risk edən insan hər şeyi bacarar: "Özünə qalib gəlməyi bacaran insan bütün dünyaya qalib gələr. Həyat mübarizədirsə, deməli, risk etməyə də dəyər. Fərqi yoxdur, uğur qazanacağıq, ya yox. Əsas olan cəsarətli, inamlı olmaqdır. Cəsarətli, inamlı olub ilk addımı atsaq, qarşımıza daha gözəl yollar çıxa bilər. Xəyallarımızın arxasınca getməyi bacarmalıyıq. Məğlubiyyətdən qorxmayaraq riskləri gözə almağı da bacarmaq hər adamın işi deyil. Əgər istəyimiz və inamımız möhkəm olsa, qalan şeyləri həll edə bilərik. Unutmaq lazım deyil ki, bizim risk etməkdən qorxub çəkindiyimiz uğurları başqaları qazana bilər. Ümumiyyətlə, çətin əldə olan hər şeyin dəyəri daha çox olur. Əsas olan addım atacağımız yolda bütün yolu görmək deyil. Əsas olan ilk addımı atacaq qədər cəsarətli olmağımızdır”.

Şəbnəm Mehdizadə