Çörəyi çörəkçiyə etibar edəndə...
"Azərbaycanda
bir sıra xəstəliklərin qarşısını almaq üçün satışa çıxarılacaq unun tərkibinə
dəmir qatılacaq”. BunuAzVision.az-a açıqlamasında Azad
İstehlakçılar Birliyinin sədri Eyyub Hüseynov deyib.
Təşkilat rəhbəri bildirib ki, anemiya xəstəliyinin
yayılma riskini azaltmaq üçün unun tərkibinə dəmir, KAP deyilən xüsusi maddə
qatılacaq: "Əhalinin böyük bir hissəsində qırmızı qan kürəciklərinin miqdarı
azdır. Buna görə belə təşəbbüs irəli sürərək 7 unüyütmə dəyirmanına xüsusi
qurğu və KAP deyilən material verdik. Lakin sonrakı ayların monitorinqlərində
gördük ki, dəyirmanların təxminən 40%-i verdiklərimizdən istifadə etməyib.
Onlar unu qırmızı loqo ilə bazara çıxarıb və istehlakçıları aldadıblar”.
Məsələ ilə
bağlı ekspertlərin fikirlərini öyrəndik.
Azərbaycan Milli Kulinariya Mərkəzinin direktor
müavini Ceyran Əsgərova bildirir ki, unun tərkibinə
qatılan bəzi maddələr insan səhhəti üçün ziyanlıdır: "Son zamanlar unun
tərkibinə bir çox maddələr qatılır. Bunun səbəbi isə çörəyin tərkibini
zənginləşdirmək, qidalılıq dəyərini və saxlanma vaxtını artırmaqla bağlıdır.
Amma əslində yaxşı üsulla üyüdülmüş təbii buğdanın bu kimi qatqılara ehtiyacı
yoxdur. Yəni buradakı əsas məsələ üyüdülmə prosesinin düzgün aparılmasıdır.
Belə ki, elektrik dəyirmanları buğdanın tərkibini yandırır. Ona görə son
zamanlar çörəklərdən alışdığımız əvvəlki ətri, qoxunu ala bilmirik. Unun
tərkibinə hansısa maddələri əlavə etməkdənsə, üyüdülmə texnologiyasını
araşdırsalar, daha yaxşı olar. Sənaye üsulu ilə hazırlanan çörək məmulatının
mağazalarda, piştaxtalarda saxlanma müddətinin artırılması üçün əlavə olunan
qatqılar insan səhhəti üçün ziyanlıdır. Hətta deyərdim ki, indi mayalar belə
təbii deyil”.
Tibb eksperti, professor Adil Qeybulladeyir ki, adi buğda, arpa, çovdar unundan hazırlanan müxtəlif növ çörəklər var.
Bu çörəklərə dad vermək üçün tərkibinə müəyyən maddələr əlavə olunur: "Əlbəttə,
bu qatqıların hər biri müəyyən standartlara cavab verməlidir. Dünyanın hər
yerində qida sertifikatı əldə etmək üçün mütləq ekspertizadan keçirlər. Əgər
ekspertiza rəyi müsbət olarsa, sertifikat alarsa, bu zaman məhsul satışa
buraxılır. Yəni burada məqsəd qidanın tərkibinə daxil olan inqridiyentlərin nə
dərəcədə təhlükəsiz olmasını, maddələrin bir-biri ilə reaksiyaya girib-girmədiyini
bilməkdir. Çörəyin tərkibində olan qatqılar mütləq sertifikatla tənzimlənməlidir.
Əgər hansısa maddə dünya praktikasında istifadə olunmursa, onun əlavə
edilməsinə icazə yoxdursa, hətta o, ziyansız olsa belə, onu çörəyin tərkibinə
qatmaq cinayətdir”.
Ekspert
bildirir ki, bir var qidanı uzun müddət saxlamaq, bir də var tərkibini
zənginləşdirmək, dadlandırmaq üçün vurulan maddələr: "Sovet dövründə duzun
tərkibini yodlaşdırmaq, mikroelementlərlə zənginləşdirmək üçün bir sıra
maddələr əlavə olunurdu. Amma proses bütün ölkə üzrə aparılmırdı. Konkret hansı
bölgədə o mikroelementlər zəif idisə, həmin bölgədə istehsal olunan çörəyə
qatılırdı. Və bu da qanunla tənzimlənirdi. Amma hazırda satışda çoxlu sayda
çörəklər var. Onların da tərkibi müxtəlifdir. Bu maddələr çörəyin uzun müddət
saxlanmasına şərait yaradır. Bir də var qidanın tərkibini zənginləşdirən
maddələr. Bunlar isə vitaminlərdir”.
Məsələ ilə
bağlı çörək zavodlarının da münasibətini öyrənmək istədik. Amma təəssüf ki, bir
sıra çörək zavodları ilə əlaqə yaratmaq mümkün olmadı. Yalnız N1 Gilan çörək zavodu ilə danışa
bildik. Adının açıqlanmasını istəməyən şəxs bildirdi ki, onların zavodunda
çörəyin tərkibinə heç bir maddə əlavə olunmur: "Çörəyin konkret tərkibi var. Və
o da üzərində qeyd olunur. Bu isə dövlət orqanları tərəfindən daim yoxlanılır.
Heç kim özbaşına deyil ki, istədiyi kimi çörəyin tərkibinə hər hansı bir maddə
qatsın. Bu zaman çörəyin keyfiyyət göstəriciləri dəyişər. Əgər çörəyin
tərkibinə nə isə maddə qatılarsa, bu onun maya dəyərinə də təsir edər. Hazırda
çörəyin maksimum saxlanma müddəti 48 saatdır. 48 saat sonra normal çörək xarab
olmalıdır. Əgər olmursa, demək ki, onun tərkibinə uzun müddət saxlanılması üçün
maddə vurulub. Amma hələ ki Azərbaycanda elə bir texnologiya yoxdur. Bizim
zavodda da çörək tam qaydasında, heç bir maddə qatılmadan bişirilir”.
Günel Azadə