Rənglərin su üzərində rəqsi...
Suya
yazılan sevgi hekayəsi, yaxud rənglərin su üzərində ecazkar rəqsi... Damlaların
yaratdığı möhtəşəmlik də deyirlər. Bəzilərinə görə möcüzə, bəzilərinə görə isə
sənət əsəridir.
Söhbət
ebru sənətindən gedir. Su üzərində rəsm çəkmə sənəti kimi böyük şöhrət qazanan
ebru sənətinin tarixi əsrlər öncəyə gedib çıxır. Hətta türk dünyasının sənəti
kimi adlandırılsa da, Azərbaycanda az sayda ebruzənlərə rast gəlmək olur. Həmin
sənətkarlardan biri də müsahibimiz Sevinc Əliyevadır.
Su üzərində zərif iş
Sevinc xalçaçı rəssam olsa da, karyerasına fərqli istiqamətlərdə
davam edib. Daha sonra isə ebru sənəti ilə tanış olub və türk ebruzən Bəkir Özsudan dərs
alıb: "Bu sənətlə internetdə tez-tez rastlaşırdım. Ebru sənəti xüsusilə
"Kurtlar vadisi” serialından sonra daha çox məşhurlaşmağa başladı. Amma inanmırdım ki, bu sənətlə Azərbaycanda məşğul olacağam.
Daha sonra araşdırdım və gördüm ki, hələ 12-ci əsrdə yaşamış dahi Azərbaycan
şairi və mütəfəkkiri Nizami Gəncəvi məşhur "Xosrov və Şirin” poemasında
"Şapurun Şirini tərifi və Xosrovun ona aşiq olması” hissəsində ebru sənətindən
bəhs edib və su üstündəki naxış sənətini incə, zərif iş adlandırıb”.
Həmsöhbətimiz
deyir ki, ebru ilə ilk dəfə tanış olduqda, bu ona möcüzə kimi gəlib: "Suyun üzərində
şəklin qalması, boyanın damlasının suyun üzərində yayılmağı və rənglərin
bir-birinə qarışmaması məni təəccübləndirdi. Bu mənə görə, əsl möcüzə idi”.
"Bir anlıq həyatı unudursan”
Müsahibimiz
ebrunu art-terapiya adlandırır. Deyir ki, pessimistliyə qapılan, depressiyada
olan bütün insanlar bu sənətlə məşğul olmalıdırlar: "Depressiyada olan insanlar
bununla məşğul olanda rahatlanırlar. İnsanda, xüsusən də uşaqlarda özgüvən
hissini yaradır. Bu sənətlə məşğul olduqdan sonra insan həyata başqa gözlə
baxır. Məncə, ebru çəkən insan xoşbəxtliyi yaşayır. Suyun üzərində çəkərkən
oradakı gözoxşayan rənglərlə həyatı unudursan. Bir anlıq hər şeydən qopur, heç
nə düşünə bilmirsən”.
Gəvən otu, öküz ödü, qızılgül...
İlk dəfə
ebru sənətini möcüzə kimi qəbul edən həmsöhbətimiz, sənətin texnikasını öyrəndikdən
sonra boyaların suda necə hərəkət etdiyinin möcüzə olmadığının fərqinə varıb: "Ebru
sənəti tamamilə təbii materiallar əsasında həyata keçirilir. Bu əməliyyat
qatılaşdırılmış su üzərində aparılır. Boyalar əsasən torpaqdan hazırlanır.
Sonra bu boyalar mərmər üzərində əzilir. Proses təxminən 4-5 saat davam edir.
Daha sonra içinə öküz ödü qatılır. Bu, boyanı həm incəldir, həm də suyun üzərində
qalmasına imkan verir. Həmçinin boyalar göy qurşağı kimi bir-birinə qarışmır və
onun yapışqanlıq xüsusiyyətini təmin edir. Qatılaşdırılmış su astraqal (gəvən)
ağacı adlanan təbii tikanotunun köməyi ilə alınır. Azərbaycanda o daha çox
Naxçıvanda, İsmayıllıda yetişir. Gəvən otunun gövdəsindən nişastaya bənzər maddə
çıxır ki, bu da suyu qatılaşdırır və nəticədə boyalar suyun üzərində dağılmır.
Boyaları qatılaşdırılmış suyun üzərinə özü at quyruğundan, gövdəsi isə gül
ağacından hazırlanan fırça vasitəsilə düzürlər. Bu fırçalar əllə düzəldilir.
Əvvəlcə suyun üzərinə kiçik damcılar tökülür. Fırçanın bu şəkildə
hazırlanmasının səbəbi odur ki, su üzərindəki ebrunun naxışlarını idarə etmək
mümkün olsun. Bunun da növləri var. Boyanı olduğu kimi suyun üzərinə töküb heç
bir müdaxilə etməmək olar. Bu üsulu ilk dəfə işləyən sənətkarın adı ilə əlaqədar
olaraq ona Battal adı verilib”.
"Ebru uşağa ən gözəl tərbiyədir”
Müsahibimiz
deyir ki, bu sənətin Azərbaycanda xüsusilə də evdar qadınlar arasında
yayılmasını çox istəyir: "Ebru həyat tərzidir, sonsuz bir xoşbəxtlikdir. Ebru dili,
dini, rəngi, düşüncəsi nə olursa-olsun, insanlar arasında yaradılmış bir sevgi
körpüsüdür. Dünyada sehrli atmosfer yaradan yeganə rəsm sənətidir. Evdar
qadınların daha çox məşğul olmasını istəyərəm. Mənə görə sənətə xüsusi istedad
yox, xüsusi istək lazımdır. İnsan öz üzərində işləsə, ondan zövq alsa, hər bir
iş alınacaq. Bizim Azərbaycan qadınları ailəyə bağlıdır. Övlada qayğı çoxdur.
Ebru uşağa ən gözəl tərbiyədir. İndi uşaqlar yeni texnologiyaya meyillidir.
İndiki uşaqlarda yaradıcılq yoxdur. Bununla məşğul olan uşaqda özgüvən, səbr
yaranır, beyin dincəlir. Uşaq özü də öz işini görəndə zövq alır”.
Dəqiqlik, səbir, intizam...
Sevinc
deyir ki, bu sənət insanın ruhu ilə bağlıdır. Onun sözlərinə görə, əhvalın pis
olan vaxt işin də yaxşı alınmır: "Ebru sənətinə ruh sənəti deyirlər. Həqiqətən
insanın ruhu ilə bağlanan sənətdir. Əgər əhvalın pisdirsə, ebru həmin vaxt səndə
alınmır. Sanki su səni hiss edir. Həmin suyun üzərində bütün əhvalını əks etdirər.
Ruha yaxın sənətdir. İçkili, sərxoş insan ebru üzərində işləyə bilməz. Rəssamlıqda
sərxoş insanlar gözəl əsər yarada bilirlər. Ebruda bu mümkün deyil. Ayıq
olmadınsa, işləyə bilməzsən. Orada dəqiqlik, səbir, intizam olmalıdır”.
Gənc
ebruzənin sözlərinə görə, bu sənətin yaşı yoxdur. Əlində biz tuta biləcək həddə
olan hər bir insan işləyə bilər: "Qardaşım oğlu yaşyarımdır. O belə, suyun üzərində
boyalardan rənglər çəkir. Rənglərlə nə isə yaradır, bu da ona zövq verir. Mənim
2 yaşdan tutmuş, 52 yaşına qədər işlədiyim insanlar var. Hətta məşhur siyasətçilər
də bu sənətlə maraqlanıb, çəkiblər”.
Müsahibimiz
sənətinə o qədər bağlıdır ki, onu həm həkim, həm psixiatr, həm də sevgili
adlandırır: "Heç vaxt düşünməzdim ki, ebrunu bu qədər sevim. İşdən icazə alıb evə qaçırdım ki,
beynimdə olan ideyanı kağıza köçürüm”.
Qeyd edək
ki, keçmişdə dövlətlərarası məktublaşmada ebrudan istifadə ediblər. Ebrunun bir
incəliyi də odur ki, onu kopyalamaq mümkün deyil. İnsan özü istəsə belə, eyni
naxışı ikinci dəfə vura bilməz.
Aygün
ƏZİZ