“Reket jurnalistika” sıradan çıxarılır
"Reket jurnalistika” ilə mübarizə çərçivəsində "İrəvan Press”
qəzetinin baş redaktoru Azər Abbasov hədə-qorxu yolu ilə tələb etmədə ittiham
olunaraq həbs edilib. Bakı və regionlardan daxil olmuş ərizələrə əsasən və
Dövlət Təhlükəsizliyi Xidmətində (DTX) aparılan araşdırmalar nəticəsində "İrəvan
Press” qəzetinin və informasiya saytının baş redaktoru A.Abbasov DTX-ya dəvət
olunaraq cinayət əməlində günahkar kimi saxlanılıb, barəsində Səbail rayon
məhkəməsi tərəfindən həbs qətimkan tədbiri seçilib.
A.Abbasovun "reket jurnalistika" ilə məşğul olması barədə
daha öncə də mediada məlumatlar yayılmışdı. Xatırladaq ki, ötən ilin
sonlarından başlayaraq jurnalistikaya ləkə olan bu sahənin ("reket
jurnalsitika”) sıradan çıxarılması və qanunvericiliyin tələblərinin yerinə
yetirilməsi istiqamətində hüquq-mühafizə orqanları tərəfindən lazımi addımlar
atılır. Belə ki, ötən müddət ərzində müvafiq itihamlarla "Gündəlik Bakı”
qəzetinin baş redaktoru Habil Vəliyev, "Bizim dövr” qəzetinin baş redaktoru Surxay
Əliyev və digərləri məhkəmənin qərarı ilə həbs edilib.
Mövzu ilə bağlı "Kaspi” qəzetinə açıqlamasında Mətbuat Şurasının "Reket jurnalistika"ya qarşı mübarizə
Komissiyasının sədri, "İki sahil” qəzetinin baş redaktoru Vüqar Rəhimzadə bildirdi
ki, Mətbuat Şurası və bütövlükdə ölkə ictimaiyyəti "reket jurnalistika” ilə və
ümumiyyətlə jurnalistikanın ləkələnməməsi üçün kifayət qədər mübarizə aparmaq
gücündədir: "Şura yarandığı gündən indiyədək bu sahə ilə mübarizə aparır. Bu
sahə jurnalistikaya aid deyil, yalnız öz şəxsi maraqlarını, istəklərini həyata
keçirmək üçün bir vasitə kimi bəzən qəzetlərdən istifadə edirlər. Düşünürəm ki,
Mətbuat Şurası ədalətli və haqlı olaraq bu sahə ilə mübarizə aparır. 2008-ci
ildə jurnalistlərin qurultayında Şuranın tərkibində belə bir komissiya
yaradılıb. Komissiya indiyədək sistemli şəkildə bu proseslərə müdaxilə edir,
aydınlaşdırır, araşdırır və ədalətli qərarlar verir. Mətbuat Şurasının bu
sahədə apardığı işləri birmənalı şəkildə dəstəkləyirəm. Onu da qeyd edim ki,
Mətbuat Şurasının bu sahədə apardığı işlərə Prezident yanında Kütləvi
İnformasiya Vasitələrinin İnkişafına Dövlət Dəstəyi Fondu dəstək verir. Misal
üçün, Fond tərəfindən mənzil bölgüsü, müxtəlif layihələr, fərdi jurnalist
müsabiqələrində bu tip "jurnalist”lərin iştirakı məhdudlaşdırılıb”.
V.Rəhimzadə əlavə etdi ki, dəfələrlə şikayətlər əsasında fərdi olaraq
bəzi redaktorlar, jurnalistlər Mətbuat Şurasına dəvət edilib, onlarla söhbətlər
aparılıb: "Onların belə məsələlərdən çəkilməsini dilə gətirmişik və bildirmişik
ki, mətbuatımıza xələl gətirən hallardan uzaq olsunlar. Onların bir hissəsi bu işdən
çəkilsələr də, çox təəssüflər olsun, bir hissəsi "öz yolunda” davam elədi. Nəticələr
isə hər kəsin bildiyi kimidir. Bizim apardığımız fəaliyyətə ictimaiyyətin
dəstəyini görürük. Hesab edirəm ki, bu proseslərdə çox düzgün və ədalətli mövqe
nümayiş etdiririk. Bütövlükdə bir jurnalist kimi "reket jurnalistika” ilə
aparılan mübarizəni dəstəkləyirəm. Kimliyindən asılı olmayaraq, jurnalistikaya
ləkə vuran, xələl gətirən və bütövlükdə jurnalistikanın peşə və etika
qaydalarına zidd hərəkət edən insanlar ictimai qınaqdan nəticə çıxarmırsa,
hüquqi yanaşma vacib şərtlərdən biri olur. Düşünürəm ki, insanların şəxsi
həyatına müdaxilə, böhtan, şərəf və ləyaqətin alçaldılması yolverilməzdir və
jurnalistikaya ziddir. Bu mənəvi terroru həyata keçirən insanlara qarşı
hamılıqla mübarizə aparmalıyıq”.
Mətbuat Şurasının Nəzarət-təftiş
komissiyasının üzvü, modern.az saytının baş redaktoru Elşad Eyvazlı bildirdi ki,
son aylar "reket jurnalistika”ya qarşı ciddi mübarizə aparılır: "Əslində,
burada söhbət jurnalistikadan getmir, belə insanlar jurnalistikanı bir kənara
qoyub, başqa qeyri-qanuni işlərlə məşğul olurlar. Təbii ki, kimlərinsə həbsə
atılmasını istəməzdim. Amma insanlar özləri belə bir addım atırlarsa, burada
cinayət tərkibi varsa, hansısa peşənin, sənətin sahibi olmasından asılı
olmayaraq, onlar əməllərinə uyğun qanun qarşısında cavab verməlidirlər. Konkret
məsələyə gəlincə, atılan addımlar "reket jurnalistika”nın zəiflədilməsinə səbəb
olacaq. Tam aradan qaldırılması fikrini söyləmək hələ tezdir. Bu sahədə
olanların hüquq-mühafizə orqanları tərəfindən həbs edilməsi digər "reket
jurnalist”lərə xəbərdarlıqdır. Əlbəttə ki, bir jurnalist kimi bu sahədəki
mübarizəni alqışlayıram”.
E.Eyvazlı qeyd etdi ki, bu məsələdə başqa məqamlardan biri də
qeyri-qanuni fəaliyyət göstərən bəzi məmurlardır: "Çünki "reket jurnalist”lərin
inkişaf etməsində onların rolu az deyil. Çünki belə "jurnalistlər”ə həmin
məmurlar pul və ya şirnikləndirici nələrsə verməməlidirlər ki, onlar da bu yolu
tutsun. Bu yolda olanları jurnalist hesab eləmək olmaz. Düşünürəm ki, atılan
addımlarla "reket jurnalistika”nın qarşısı tam alınmır, ancaq bu öz təsirini
getdikcə göstərir. Bu kimi məsələlərdə bizim gerçək jurnalistikanın həmrəyliyi
lazımdır, çünki bu, jurnalistikaya xələldir və başucalığı gətirməyən
məsələdir”.
Bəxtiyar MƏMMƏDLİ