“Rəhbər işləyən hər kəs insanlarla dil tapmağa bacarmalıdır”
Bu gün nəinki paytaxtdakı, bölgələrimizdəki gənclərin də uğurlarını
izləyirik. Bu günkü müsahibimiz Mingəçevir Dövlət Dram Teatrının gənc direktor
müavini Vüsal Məmmədovdur. Yaşının az olmasına baxmayaraq, müsahibimizin bu vəzifədə
8 illik təcrübəsi var. Özü də deyir ki, idarəetmə məsələlərində əsas prinsip təşkilatçılıq
bacarığından qaynaqlanır.
- Vüsal bəy, sizi daha
yaxından tanımaq istərdik.
- İlk olaraq müsahibə üçün təşəkkür edirəm. "Kaspi” qəzeti və
saytının, eləcə də sizin yazılarınızın daimi oxucusuyam. Mətbuat aləmində bizim
teatrın ən yaxın dostlarından birisiniz. Bu isti münasibətə görə kollektivinizə
və sizə təşəkkür edirəm.
Mən 1985-ci ildə Bərdə şəhərində anadan olmuşam. 1992-ci ilədək Bərdə
şəhər 4 saylı orta məktəbində təhsil almışam. Daha sonra isə Bakı şəhər 58
saylı orta məktəbində təhsilimi başa vurmuşam. Fəal şagird olmuşam, daim
axtarışda olan, müəllimlərimlə bəzi məsələlərdə geniş müzakirələr aparan biri
idim. Sinif yoldaşlarım və müəllimlərim bəzən məni Türkiyə aşiqi, bəzən bütöv
Azərbaycan carçısı deyə çağırırdılar. Uşaqlıqdan məndə Güney Azərbaycana,
Qarabağa sonsuz bir məhəbbət olub. Hər zaman da bu məsələyə həssas yanaşmışam.
Yəni bu gün müəllimlərimdən və sinif yoldaşlarımdan məni xəbər alsanız,
yadlarında Təbriz, Şuşa həsrəti ilə yanıb-yaxılan bir şagird kimi qalmağımın
şahidi olarsınız.
- Niyə məhz Güney Azərbaycan,
Qarabağ mövzusunda həssassınız? Bu sizdə haradan qaynaqlanır?
- Bərdədə anadan olduğum üçün uşaq yaşlarımda Tərtər və Ağdam istiqamətlərində
gedən döyüşlərdə iştirak edənləri görürdüm. Xocalı faciəsinin qurbanlarını,
oradan məcbur qaçıb gələn insanların durumunu öz gözlərimlə görmüşəm. Məhz bu səbəbdən
Qarabağ mənim üçün həssas nöqtədir. Qaldı Güney Azərbaycana, uşaq yaşlarımda
tarix kitablarında millətimizin iki yerə bölündüyünü və indiki İran ərazisində
35 milyon soydaşımızın yaşadığını oxuyurdum və bu mövzu məni narahat edirdi. Vətənimizin
iki hissəyə parçalanması mənə çox təsir etdi.
Fikirləşirdim ki, 50 milyonluq bir Azərbaycan, yanımızda da qardaş dövlət
- 80 milyonluq Türkiyə. Belə bir dövlətdə yaşasaydıq, dünyada Azərbaycan gəncindən
xoşbəxt kim ola bilərdi?.. Cənab prezident hər dəfə deyəndə ki mən 50 milyon azərbaycanlının
prezidentiyəm, hər zaman dua edirəm ki, o arzumuz hüquqi və coğrafi olaraq gerçəkləşsin.
Hazırkı dinamik inkişafımız, hərbi gücümüz, düzgün beynəlxalq siyasətimizlə son
nəticədə bu arzumuza nail olacağımıza inanıram.
- Necə oldu ki, Mingəçevir
Teatrında çalışmağa başladınız?
- Uşaq yaşlarımdan teatrı çox sevirdim. Təəssüf ki, anadan olduğum Bərdə
şəhərində teatr yox idi, amma televiziya vasitəsi ilə teatr tamaşalarına
baxırdım və onların fəaliyyətini izləmək imkanım olurdu. İllər keçdi, tale mənim
yolumu teatrdan saldı. Mingəçevir Dövlət Dram Teatrının direktoru Səxavət Məmmədovla
keçmiş "EL Tv” televiziyasından münasibətimiz var idi. O, televiziyada direktor
müavini işləyirdi, mən də tez-tez verişlərdə qonaq qismində iştirak edirdim. O,
həmin teatra direktor təyin olunduqdan sonra məni öz yanında işləməyə dəvət
etdi və mən də böyük məmnuniyyətlə teatra gəldim.
- Gənc yaşda direktorun
müavini olmağın hansı üstünlükləri var?
- Teatrda direktor müavini olmamışdan öncə orta məktəbdə 4 il
direktor mavini olmuşam. 5 il müəllimlik təcrübəm var və onun 4 ilini direktor
müavini kimi işləmişəm. Bəlkə də Azərbaycanda çox az müəllimlər var ki, müəllim
işlədikdən 1 il sonra direktor müavini vəzifəsinə yüksəlib. O ki qaldı
sualınıza, teatrda direktor müavini olmaq çətin və şərəfli bir işdir. Fürsətdən
istifadə edib bu etimada görə nazirimiz Əbülfəs Qarayevə, Mingəçevir şəhər İcra
Hakimiyyətinin başçısı Niyazi Bayramova, direktorumuz Səxavət Məmmədova bir
daha dərin təşəkkürümü bildirirəm. Bu yaşda teatrın direktor müavini olmağın üstünlükləri
çoxdur. Ancaq gənc yaşlarından böyük məsuliyyət altına girmək bəzən insanı gərginlik
içərisində saxlayır. Amma sevindirici hal odur ki, direktorumuz da gəncdir və məndən
qat-qat təcrübəli olduğu üçün çox da çətinliyə düşmürəm. Rəhbər kimi yox, böyük
qardaş kimi mənə dəstək olur, öz yardımını əsirgəmir. Hansı vəziyyətdə nə etməli
olduğumu aydın şəkildə izah edir.
- Şübhə etmirəm ki,
pedaqoji təcrübəniz aktyorlarla dil tapmaqda sizə kömək olur. Teatrda müavin
olaraq əsas funksiyanız nədən ibarətdir?
- Bəli, elədir. Ümumiyyətlə rəhbər işləyən hər bir kəs insanlarla dil
tapmağa bacarmalıdır. Teatrımızın direktoru daxildə elə gözəl nizam-intizam
yaradıb ki, hər kəs öz işini bilir və onun öhdəsindən gəlir.
- Siz pedaqoji sahə üzrə
təhsil almısınız. Teatr isə fərqli bir sahədir...
- Teatrda aktyor heyəti, yaradıcı kollektiv incəsənət sahəsində təhsilli
olmalı və bunu səhnədə tətbiq etməlidir. İdarəetmə isə tamam başqa bir sahədir.
Bu işin əsas prinsipi təşkilatçılıq bacarığıdır. Əgər təşkilatın işlərinin öhdəsindən
gələ biliriksə, burda hansı sahə üzrə təhsil almağımın elə bir önəmi olmur.
- Hədəfləriniz nədən ibarətdir?
- Ən böyük hədəfimiz və məqsədimiz bir vətəndaş kimi, Azərbaycanımızın
bütövlüyü uğrunda mübarizə aparmaqdır. Bunun üçün Ali Baş Komandanın bir əsgəri
kimi hər zaman hazıram. Gənc olaraq düşünürəm ki, daha böyük uğurlara imza
atmalıyam. Həm ölkəmizin, həm şəhərimizin ictimai-siyasi həyatında daha aktiv
rol almalıyam. Həmçinin teatrımıza cənab prezident tərəfindən də yüksək diqqət
göstərilibsə, bizdə öz öhdəmizə düşən işləri daha mükəmməl bir şəkildə yerinə
yetirməliyik.
- Bu il Mingəçevir Teatrının
50 illik yubileyidir. Sizi təbrik edirik.
- Təşəkkür edirəm. Cənab prezidentimiz İlham Əliyevə teatrımızın 50
illiyinin dövlət səviyyəsində qeyd olunması ilə bağlı verdiyi sərəncama görə
teatrımızın kollektivi adından dərin təşəkkürümüzü bildiririk. Mədəniyyət
naziri Əbulfəs Qarayevə təşəkkür edirik. Hər zaman bizim teatra, həmçinin bütün
teatrlara diqqət göstərir. Bu gün Azərbaycan teatrlarının belə gözəl, yaraşıqlı
olmasında onların zəhməti danılmazdır. 50 illiklə bağlı cənab prezidentin sərəncamı
təkcə Mingəçevir teatrının yox, bütün teatrların, həm də Mingəçevir şəhərinin
uğurudur. Bu uğurları qazanmaq üçün teatrın direktoru Səxavət Məmmədov, baş
rejissoru Xəzər Gəncəli, aktyor truppası və texniki heyət böyük işlər görüb. Mingəçevir
Dövlət Dram Teatrı son 4-5 ildə uğurlar
qazanmaqdan yorulmur. Bir neçə gün öncə teatrımızın iki əməkdaşı dövlət
başçısının sərəncamı ilə Prezident mükafatına layiq görüldülər. Həmçinin cənab
prezidentin sərəncamı ilə 27 mayda teatrımızın sevilən aktrisası Ella Yaqubova
xalq artisti adına layiq görüldü. Ümid edirik ki, iyunun 20-də nəzərdə tutulan
50 illik yubiley ərəfəsində də sevindirici xəbərlər olacaq.
Xəyalə Rəis