Referendum xalqın iradəsini ortaya qoydu
"Konstitusiyaya dəyişikliklərlə bağlı
referendum tam şəffaf şəraitdə keçib. Referendumun nəticələri Azərbaycan
xalqının öz iradəsini müstəqil və azad şəkildə ifadə etdiyini əks etdirir”.
Avropa İttifaqının (Aİ) Regional Komitəsinin üzvlərindən ibarət müşahidə
qrupunun Azərbaycan Respublikasının Konstitusiyasına təklif olunan əlavə və dəyişikliklərlə
bağlı sentyabrın 26-da keçirilən ümumxalq səsverməsi (referendum) ilə əlaqədar
bəyanatından götürülmüş bu sözləri referenduma dair ümumiləşdirilmiş rəy kimi də
qiymətləndirmək olar. Çünki Konstitusiyaya əlavə və dəyişikliklərlə bağlı
referendum həqiqətən də demokratik, şəffaf və seçicilərin yüksək fəallığı şəraitində
keçirilib ki, bu da ölkəmizin demokratiya prinsiplərinə sadiqliyini, o cümlədən
xalqın iradəsinin müstəqil və azad şəkildə ifadəsinə hörməti növbəti dəfə nümayiş
etdirir.
Referendum keçirmək
zərurəti
Bəs referendum keçirilməsi hansı zərurətdən
qaynaqlanır? Bu suala cavab vermək üçün öncə onu qeyd edək ki, Konstitusiyaya təklif olunan əlavə və dəyişikliklərlə bağlı
ümumxalq səsverməsinin (referendum) keçirilməsi heç də sıradan bir addım deyil
və ciddi zərurətdən irəli gəlir. Məlumdur ki, dövlətçilik ənənələri inkişaf
etdikcə zaman-zaman islahatlara da ehtiyac yaranır. Lakin bu islahatlar o halda
əhəmiyyətə malik olur ki, onların mahiyyətində dövlət idarəçiliyinin təkmilləşdirilməsi,
demokratik təsisatların möhkəmləndirilməsi, bir sözlə, yeni dövrün
çağırışlarına cavab vermək bacarığı dayansın. Bu mənada Azərbaycanda
referendumun keçirilməsi həm də yeni inkişaf perspektivlərinin müəyyənləşdirilməsi
ilə bağlıdır. Belə ki, Konstitusiyanın qəbulundan keçən müddət ərzində görülmüş
nəhəng işlər idarəçiliyin effektivliyinin daha da artırılması, siyasi sistemin
möhkəmləndirilməsi və paralel olaraq insan hüquq və azadlıqlarının etibarlı
müdafiəsi mexanizmlərinin təkmilləşdirilməsi zərurətini şərtləndirir, gələcək
inkişaf hədəflərinə istiqamətlənməyi tələb edir. YAP İcra katibinin müavini, «Yeni Azərbaycan» təşviqat
qrupunun maliyyə məsələləri üzrə səlahiyyətli nümayəndəsi, Milli Məclisin komitə
sədri Siyavuş Novruzovun sözləri ilə desək, "Azərbaycanın müstəqillik tarixində qazandığı uğurlar «Azərbaycan 2020:
gələcəyə baxış» İnkişaf Konsepsiyasının qəbulunu və uğurlu icrasını şərtləndirdi.
Bu inkişaf konsepsiyası növbəti illər üçün əsas hədəfləri özündə əks etdirir.
Sözsüz ki, Konstitusiyaya edilən əlavəvə dəyişikliklər bu hədəflərə yüksək
səviyyədə nail olmağa stimul verəcək”.
Referendum rəqəmlərdə
Artıq referendumun nəticələri ilə bağlı
rəqəmlər məlumdur. Mərkəzi Seçki Komissiyasının (MSK) sədri Məzahir Pənahov
sentyabrın 26-da referendumun ilkin nəticələri ilə bağlı "Seçkilər” İnformasiya
Mərkəzində keçirdiyi mətbuat konfransında seçicilərin ümumxalq səsverməsində fəal
iştirak etdiklərini bildirib: "Ölkə üzrə bütün məntəqələrdə səsvermə səhər 8-də
başlayıb və saat 19-da başa çatıb. MSK qanunla nəzərdə tutulmuş qaydada seçki
prosesinin təşkilini təmin edib. Gün ərzində məntəqələrdə səsvermənin gedişi
barədə məlumatlar beş dəfə - saat 10-da, 12-də, 15-də, 17-də və 19-da Dövlət
Avtomatlaşdırılmış İnformasiya Sistemi şəbəkəsi üzərindən xüsusi proqram təminatı
vasitəsilə birbaşa MSK-ya ötürülərək internet səhifəsində yerləşdirilməklə
ictimaiyyətə təqdim olunub”.
MSK sədri diqqətə çatdırıb ki, referendum 125 seçki
dairəsi üzrə 5627 seçki məntəqəsində keçirilib. Ölkə üzrə qeydə alınmış seçicilərin
sayı 5 milyon 276 min 111 nəfər olub. Seçki məntəqələrinə 5 milyon 280 min 924
səsvermə bülleteni paylanılıb. Seçki dairələri dairə seçki komissiyalarının
hamısı kompyuterləşdirilib və digər lazımi avadanlıqla təmin olunub. Məntəqələr
gözlə görünməyən mürəkkəb və bu mürəkkəbi oxumaq üçün ultrabənövşəyi lampalar və
s. zəruri materiallarla tam təchiz edilib. Ümumxalq səsverməsi ilə əlaqədar 119
seçki dairəsi üzrə min seçki məntəqəsində onlayn rejimdə işləyən veb-kameralar
quraşdırılıb: "Ümumi fəallıq 69,7 faiz olub. Seçicilərin 3 milyon 671 min 707 nəfəri
səsvermədə iştirak edib. Səslərin sayılması, hesablanması və MSK-ya
çatdırılması müşahidəçilərin, KİV nümayəndələrinin və bütün maraqlanan tərəflərin
iştirakı ilə həyata keçirilib. Ümumilikdə referendum bütün məntəqələrdə Seçki Məcəlləsinin
tələblərinə uyğun keçirilib. Referendumun baş tutması üçün seçicilərin 25 faizi
iştirak etməli idi. İlkin nəticələrə əsasən, seçicilərin 69,7 faizi iştirak
etdiyinə görə referendum baş tutmuş sayılır”.
MSK sədrinin dünən keçirdiyi mətbuat konfransında
isə Konstitusiyaya əlavə və dəyişikliklərlə bağlı ümumxalq səsverməsinə
çıxarılmış referendum aktı layihəsi üzrə səslərin hesablanmasının yekun nəticələri
açıqlanıb. APA-nın
məlumatına görə, M.Pənahov bildirib ki, Azərbaycanın xaricdəki diplomatik nümayəndəliklərində
təşkil olunmuş seçki məntəqələrinin də hamısında səsvermə prosesi başa çatıb və
beləliklə, 5627 seçki məntəqəsinin hamısı hesabat verib.
Referendum müşahidəçilərin gözü ilə
Yuxarıda da qeyd etdiyimiz kimi, referendum azad,
demokratik və şəffaf şəraitdə keçirilib ki, bunu beynəlxalq və yerli müşahidəçilərin
fikirləri də təsdiq edir. Demək olar ki, onların əksəriyyəti seçicilərin yüksək
fəallığı, referendumun qanunauyğun və yüksək səviyyəli təşkili, Mərkəzi Seçki
Komissiyasının, "Seçkilər” İnformasiya Mərkəzinin, dairə və məntəqə
komissiyalarının fəaliyyəti barədə müsbət fikirlər bildirib, prosesin beynəlxalq
standartlara uyğun təşkil olunduğunu, səsvermənin nəticələrinə təsir edə biləcək
ciddi qanun pozuntusuna rast gəlinmədiyini xüsusi qeyd ediblər. Müşahidə
missiyaları keçirdikləri mətbuat konfranslarında referendumun demokratik və
beynəlxalq standartlara uyğun keçirildiyini təsdiq ediblər. Onu da qeyd edək
ki, referendum günü səsvermənin gedişini Avropa
Şurası Parlament Assambleyasının, MDB Parlament Assambleyasının, Türkdilli Ölkələrin
Parlament Assambleyasının müşahidə missiyaları, Böyük Britaniya, İtaliya,
Türkiyə, Fransa, Avstraliya və digər dövlətlərin parlamentariləri, xarici ölkələrin
ali seçki qurumlarının nümayəndə heyətləri və s. daxil olmaqla 18 beynəlxalq
qurumdan 117 beynəlxalq müşahidəçi izləyib. Bunlar 33 ölkənin vətəndaşlarıdır.
Səsvermə prosesinin müşahidəsinə öz təşəbbüsləri ilə və siyasi partiyaların,
qeyri-hökumət təşkilatlarının, referendum üzrə təşviqat qruplarının təşəbbüsü
ilə akkreditasiyadan keçmiş 53 min 531 yerli müşahidəçi qatılıb.
Əlamətdar haldır ki, ümumxalq
səsverməsinin gedişini kifayət qədər çox sayda yerli və xarici KİV nümayəndələri
ətraflı işıqlandırıblar. Müxtəlif televiziya kanalları, mətbuat və
internetdə referendum yüksək qiymətləndirilib, onun demokratik prinsiplərə
uyğun keçirildiyi xüsusi vurğulanıb.
Qərəz davam edir
MSK sədri M.Pənahovun da qeyd etdiyi
kimi, səsvermə ümumən sakit şəraitdə keçib, seçicilər özlərinin iradələrini sərbəst
şəkildə ifadə ediblər: "Məntəqə seçki komissiyaları vəzifələrinin öhdəsindən
yüksək səviyyədə gəlib və səsvermə prosesində xoşagəlməz hadisələr baş verməyib.
Ümumilikdə, MSK-ya qanun pozuntusu ilə əlaqədar heç bir rəsmi müraciət daxil
olmayıb. Amma telefon bağlantıları ilə komissiya üzvlərinə ayrı-ayrı yerlərdə
olan proseslər barədə məlumatlar verilib, bəzi hallarda müəyyən məsələlərlə
bağlı müsbət və ya mənfi fikirlər ifadə olunub”.
MSK sədri "Azərbaycan ictimaiyyətindən,
müşahidəçilərdən və ümumiyyətlə, maraqlananlardan” xahiş edib ki, əgər hansısa
narazılıqları varsa, MSK-ya rəsmi müraciət etsinlər: "MSK sentyabrın 27-də tam
tərkibdə işləyəcək. Əgər hansısa müraciət daxil olsa, biz onu qanunun tələbinə
uyğun surətdə araşdıracağıq”.
Göründüyü kimi, istər səsvermənin
keçirilmə şəraiti, istərsə də vətəndaşların sərbəst və azad şəkildə səs verməsi
üçün yaradılmış imkanlar Azərbaycan hökumətinin demokratik səsvermə mühitini tam
təmin etdiyinə şübhə yeri qoymur. Lakin təəssüf ki, seçkilərdə olduğu kimi,
referendumda da "qulp qoymaq aşiqləri” bekar dayanmır. Onlar, xüsusən də xaricdən idarə
olunan "5-ci kolon” faktları təhrif etməklə səsvermənin guya saxtalaşdırıldığı
barədə ictimai rəy formalaşdırmağa cəhd göstərirlər. Lakin bu dəfə də onların
heç bir əsası olmayan qərəzli xəbərləri, uydurduqları dezinformasiya və xəstə təfəkkürdən
qaynaqlanan iddiaları ifşa olunub. Belə ki, həmişə olduğu kimi, bu dəfə bütün
bu əsassız iddialara cavabı xalq özü verib. MSK sədrinin sözləri ilə desək, "Referendum aktı layihəsinin əsasında hazırlanmış bülletendəki
29 hissənin hər biri üzrə seçicilərin münasibətini diqqətə çatdırmaq” bu
cavabın ən yaxşı ifadəsi sayıla bilər: "Referendumda səsverməyə çıxarılan məsələ
seçicilərin 50 faiz+1 səsini toplayırsa, qəbul edilmiş sayılır. Ona görə hesab
edirəm ki, lehinə və əleyhinə verilmiş, həmçinin etibarsız hesab olunmuş səslərin
sayını diqqətə çatdırmaq kifayətdir”.
Həqiqətən də, əsas sözü həmişə xalq deyir.
Xalqın referendumda dediyi söz isə qətidir və əlavə heç bir iddiaya, xəstə təfəkkürlü
qərəzə yer qoymur.
F.Qəhrəmanlı