“Referendum Azərbaycanda demokratiyanın təntənəli qələbəsi idi”
"Ümumxalq səsverməsində seçicilərin 70
faizinin iştirak etməsi, seçicilərin 90 faizdən çoxunun dəyişiklikləri dəstəkləməsi
Prezident İlham Əliyevin irəli sürdüyü təşəbbüsün Azərbaycan xalqının iradəsini
əks etdirdiyini, xalqımızın demokratik inkişaf yolunda yeni və diqqətəlayiq
addım atdığını göstərir”. Bu barədə "Kaspi”yə
açıqlamasında Azərbaycan Respublikasının Prezidenti Yanında QHT-lərə Dövlət Dəstəyi
Şurasının üzvü, Beynəlxalq Münasibətlərin Araşdırılması Mərkəzinin rəhbəri
Rufiz Qonaqov bildirib. O, sentyabrın 26-da keçirilmiş referendumla bağlı
danışarkən qeyd edib ki, seçkidən əvvəl aparılan geniş kampaniya nəticəsində əhali
səsvermə məntəqələrinə gələrkən Konstitusiyaya təklif edilən əlavə və dəyişikliklərin
mahiyyəti barədə yetərincə məlumatlı olublar.
Politoloqun fikrincə,
seçicilər bu dəyişikliklərin ölkəmizin gələcəyi üçün nə qədər əhəmiyyət kəsb
etdiyini biliblər. Məhz bu səbəbdən xalq həmin gün sosial-iqtisadi inkişafın
davamlılığına, siyasi və inzibati sistemin təkmilləşməsinə, müstəqqilliyin, təhlükəsizliyin
daha da möhkəmlənməsinə səs verib: Prezident Administrasiyasının İctimai-siyasi
məsələlər şöbəsinin müdiri cənab Əli Həsənovun qeyd etdiyi kimi,
referendumdan sonra Azərbaycanda ciddi islahatlar gözlənilir və artıq bu proses
başlayıb. Təsadüfi deyil ki, Prezident İlham Əliyev 2016-cı ili ölkədə
"İslahatlar ili" elan edib. Post-neft dövrünə hazırlaşan Azərbaycan
operativ, çevik islahatlar həyata keçirməkdədir. Bu istiqamətdə bütün
imkanlardan, həm inzibati, həm iqtisadi, həm də insan resurslarından istifadə
olunur. Biz yaxın gələcəkdə ciddi islahatların və onun müsbət nəticələrinin
şahidi olacağıq. Referendum siyasi sistemdə və idarəetmə praktikasında əhəmiyyətli
dəyişikliklər yaradacaq. Ən əsası və xalqın əsas istəyi olan ictimai-siyasi sabitlik, əmin-amanlıq
bundan sonra daha da güclənəcək. Dünyada baş verən hərbi, siyasi kataklizmlər
fonunda Azərbaycandakı əmin-amanlığın olması və gələcəkdə də onun qorunub
saxlanılması çox böyük əhəmiyyət kəsb edir. İnsanlar sabitliyin qorunub
saxlanılacağına və islahatların aparılacağına əmin olduqları üçün seçkilərdə
fəal iştirak etdilər. Referendum ölkəmizdə həyata keçirilməkdə olan
islahatların anonsu olmaqla yanaşı, dəyişikliklər üçün hüquqi baza və siyasi alət
idi. Hesab edirəm ki,
Azərbaycanda həyata keçiriləcək islahatların kökündə iqtisadi məsələlər
duracaq. Yeni iqtisadi modelin yaranması, Azərbaycanın böyük iqtisadi
potensialından səmərəli istifadə üçün artıq ilkin addımlar atılıb”.
Referendumla bağlı həm yerli, həm də
xarici müşahidəçilərin müsbət rəyinə, o cümlədən xarici ölkələrin ümumxalq
səsverməsinin nəticəsini qəbul etməsi ilə bağlı məsələlərə münasibət bildirən
R.Qonaqov deyib ki, referenduma reaksiyalar əsasən müsbət notlar üzərində köklənib.
Onun sözlərinə görə, prezidentin təşəbbüsü ilə irəli sürülən, xalq tərəfindən dəstəklənən
dəyişikliklər beynəlxalq təşkilatlar tərəfindən də normal qarşılanıb: "26 sentyabrda
xalqımızın dövlət quruculuğu, demokratiya yolunda çox mühüm addım
atdığını beynəlxaq qurumlar etiraf ediblər. ABŞ Dövlət Departamenti Azərbaycandakı
referendumun təhlükəsizlik sahəsində hər hansı insident olmadan keçdiyini və
konstitusiya islahatlarının dövlətimizin daxili işi olduğunu bəyan edib. Yuxarlda qeyd etdiyim ki, xarici müşahidəçilər də seçkilərin şəffaf
və ədalətli keçdiyini bəyan edib. Azərbaycandakı siyasi partiyalar da, əsasən
referenduma dəstəklərini ifadə ediblər. Referendumöncəsi siyasi partiyalara
aksiyalar keçirməyə hər cür şərait yaradıldı. Amma göründüyü ki, mitinqləri
olduqca sönük keçdi. Çünki xalq konstitusiya dəyişikliklərinin vacibliyini
anlayaraq islahat tərəfdarı olduğunu qətiləşdirmişdi. Hakimiyyət tərəfindən
irəli sürülən istənilən təşəbbüsə etiraz etməyə alışıb. Bəzən etirazlar,
müzakirələr konstitusiyaya edilən dəyişikliklər, mahiyyət üzrə deyil, tamam
başqa problemlər üzrə aparılırdı. Əlbəttə, bütün bunlar təəssüf doğurur.
Mən 26 sentyabrda keçirilən referendumu Azərbaycanda demokratiyanın təntənəli qələbəsi
hesab edirəm”.