Bankdan kredit götürüb sonradan qaytarmaqda çətinlik çəkən
xeyli vətəndaş var. Statistika göstərir ki, belə vətəndaşların sayı bölgələrdə
də az deyil. Bəzən yaranan problemlərdə vətəndaşların özlərinin də məsuliyyəti
olur. Əsas problem isə maliyyə institutlarının işi ilə kifayət qədər məlumatın
olmaması ilə bağlıdır. Belə ki, real gəlirlərini nəzərə almayan, kredit faizini
qaytara bilib-bilməyəcəyini təhlil etməyən vətəndaşlar yüksək miqdarda və
yuxarı faizlərlə kredit götürməkdən çəkinməyiblər. Hətta çox hallarda krediti
lazımi istiqamətdə xərcləməyiblər, hansısa iş təşkil etmək əvəzinə bu məbləği
mal-məhsul almağa xərcləyiblər.
Salyan və Lənkəranda Tərəfsiz Jurnalistlər Birliyinin təşəbbüsü
ilə keçirilən regional tədbirlər məhz bu məsələlərə həsr olunub. Görüşdə
iştirak edən yerli bank nümayəndələri əhali
ilə birbaşa diskussiya zamanı vətəndaşları narahat edən sualları
cavablandırıblar. Tədbirlərdə iqtisadçı ekspertlərlə yanaşı, yerli İcra
Hakimiyyətlərinin nümayəndələri, tələbələr və bölgə sakinləri iştirak ediblər.
Qeyd olunub ki, 2008-ci ildən etibarən əksər dünya ölkələrini
bürüyən qlobal maliyyə böhranı dünyanın bir parçası olan Azərbaycana da təsirsiz
ötüşməyib. Əksər ölkələrdə, o cümlədən Azərbaycanda büdcə gəlirlərinin
azalmasına səbəb olub. Ölkədəki özəl bankların bir qismi itkilərə məruz qalıb.
bank sektorundakı problemlər isə ilk növbədə bankların istehlakçılarına - müştərilərə
təsir edib.
Görüş AR Prezidenti yanında QHT-lərə Dövlət Dəstəyi
Şurasının maliyyə yardımı ilə keçirilən layihə çərçivəsində təşkil olunub.
Layihənin əsas məqsədi maliyyə
savadlılığı sahəsində görülmüş işlərlə bağlı beynəlxalq təcrübənin öyrənilməsi,
deputatlar və iqtisadçılarla müsahibələrin köməyilə bu sahədə qanunvericilikdəki
boşluqların müəyyən edilməsi, maarifləndirici tədbirlərin təşkilindən ibarətdir.
Layihə çərçivəsində mediada bu mövzuya dair silsilə
yazıların dərci də nəzərdə tutulub.
Bakı 27°C
