Radikalların davası qızışır
Azərbaycanın radikal
müxalifəti nəinki ölkə daxilində, eləcə də xaricdəki azərbaycanlılar, hətta
müxalifətçi adı altında Avropa ölkələrinə sığınanlar tərəfindən də qəbul
edilmirlər. Bunun yeganə səbəbi 25 ildir müxalifətdə qalan bu insanların
təfəkküründəki, dünyagörüşündəki gerilik, radikallıqları, hadisələrə
mühafizəkar yanaşmalarıdır. AXCP, Milli Şura, Müsavat rəhbərlikləri tərəfindən
diktatorsayağı idarəetmə, alternativ fikrə, fərqli düşüncəyə qısqanc yanaşma,
təşəbbüskarlığı boğmaq cəhdləri yeni nəsillər tərəfindən ümumiyyətlə qəbul
edilmir. Radikal liderlərin rəhbərlik etdikləri təşkilatlar daxilində öz
üzvlərinə qarşı hər hansısa səbəbdən tətbiq etdikləri qarayaxma kampaniyaları
da ürək bulandırır. Ona görə də Azərbaycan daxilindəki radikal müxalifətlə,
xaricdəki radikalların mövqeyi, marağı üst-üstə düşmür. Son zamanlar isə
daxildəki və xaricdəki radikalların bir-birinə qarşı münasibəti daha da
kəskinləşib. Buna səbəb xarici dairələrdən onlara verilən və veriləcək
qarantlardır. Belə ki, 9 may 2018-ci ildə Helsinki Komissiyası tərəfindən ABŞ
konqresində Azərbaycanla bağlı dinləmələr keçirilib. Burada çıxış edən Emin
Milli AXCP sədri Əli Kərimli və onun timsalında radikal müxalifət haqqında
tənqidi fikirlər səsləndirib. E.Millinin radikal müxalifətin və onun satellit
QHT-lərinin "haqqını” və ayrılan qrantları təkbaşına mənimsəmək cəhdi digər "qrantyeyənlərin”
ciddi qəzəbinə səbəb olub.
Tərəflər arasında sosial
şəbəkələrdə qrant uğrunda mübarizə özünü daha aşkar şəkildə büruzə verib, hətta
təhqiramiz şəkil alıb. AXCP sədrinin trol dəstəsi, zombiləşmiş cəbhəçi gənclər,
hətta onun iradəsi altında fəaliyyət göstərən Milli Şura sədri Cəmil Həsənli
E.Milli və onun rəhbəri olduğu "MeydanTv”ni hədəfə alıblar. Hətta C.Həsənli
qeyd edib ki, "MeydanTv” məqsədli şəkildə AXCP və Milli Şuraya məhdudiyyətlər
qoyub. Almaniyada xarici dairələrin maliyyəsi hesabına yayımlanan "MeydanTv”nin
əməkdaşı Orxan Mahmud "Facebook” vasitəsilə buna reaksiya verərək bildirib ki,
Milli Şura üzvləri təkcə son 6 ayda "MeydanTv”də yayımlanan 30-dan çox veriliş
və reportajda söz sahibi olublar. Onun yazdığına görə, şəxsən Əli Kərimli həmin
müddət ərzində heç bir senzura ilə üzləşmədən "MeydanTv”də saatlarla canlı
yayımlarda danışıb. O.Mahmudun sözlərinə görə, bunun müqabilində C.Həsənli
E.Milliyə olan əsəbini "Son vaxtlar "MeydanTv”də Milli Şuraya məhdudiyyət
qoyulur”, - yazmaqla büruzə verib. O, qocaman tarixçi və aqressiv adlandırdığı
C.Həsənliyə səslənərək deyib ki, belə bir fikri ifadə etmək onun üçün ayıb
olmalıdır.
Elə bu statusun altında
cəbhəçi gənclər "MeydanTv”nin əməkdaşının üstünə tökülüşərək, onu haqsız
çıxarmağa çalışıblar. Hətta C.Həsənli özü də bu müzakirələrə, daha doğrusu
uşaq-muşağın qarşılıqlı ittihamlarına qoşularaq, O.Mahmudun səhv addım atdığını
onun özünə başa salmaq istəyib. Lakin bu cəhdlər alınmayıb. Özünü pis duruma
salan C.Həsənli məcbur olub öz profilindən bu məsələ ilə bağlı ayrıca status
yazıb. Bildirib ki, "MeydanTv”nin əməkdaşı O.Mammad Milli Şuraya qarşı yazı
paylaşıb və arada kifayət qədər yaş fərqi olmasına baxmayaraq, yazısında təhqir
elementlərinə yol verib. C.Həsənli xatırladıb ki, ayıb iş tərəfsiz, qərəzsiz,
obyektivliyə iddialı bir media qurumunda Milli Şura və Xalq Cəbhəsi
rəhbərliyinin proqramlara çağırılmaması haqqında aparıcılara göstərişlər
verməkdir. C.Həsənlinin sözlərinə görə, hələ telejurnalist Sevinc Osmanqızı "MeydanTv”də
çalışanda rəhbərlik tərəfindən ona bildirilib ki, Milli Şura və Xalq Cəbhəsinə
bu media qurumunda moratorium, yəni qadağa qoyulub. Milli Şura sədri yazıb ki, bu
"MeydanTv”nin media siyasətidir və onu pozduğuna, yəni Ə.Kərimli ilə apardığı
bir video müsahibəyə görə həmin jurnalistə vaxtilə irad da bildirilib. Daha
sonra C.Həsənli "MeydanTv”nin bəlli qurumlardan aldıqları qrant vəsaitləri
hesabına fəaliyyət göstərdiyini xatırladıb.
Bu müzakirələr fonunda ABŞ-da
yaşayan jurnalist S.Osmanqızı ilə Xədicə İsmayılın bir-birilərinə qarşılıqlı ittihamları da diqqəti
çəkir. X.İsmayıl S.Osmanqızını "MeydanTv”nin direktoru olmaq üçün mübarizə
apardığını və buna görə oradan qovulduğunu, həmçinin Rəsul Quliyevin vəsaiti
ilə proqram hazırlamaq istədiyini bildirib. Bunun qarşılığında S.Osmanqızı X.İsmayılı
xəstə adlandırıb. AXCP fəalı Natiq Adilov isə E.Millini saxtakarlıqda və qrant
üçün fəaliyyət göstərməkdə ittiham edib, eyni zamanda müxalifəti
fəaliyyətsizlikdə günahlandıran vəkil Aslan İsmayılov haqqında da tənqidi
status yazıb. O, A.İsmayılovun səmimi olmadığını, sadəcə maşa rolu oynadığını
qeyd edib. N.Adilov hesab edib ki, A.İsmayılov sadəcə olaraq sifarişlə işləyən
müqəvvadır. Kamil Vəli Nərimanoğlu da bu müzakirələrdən kənarda qalmayaraq,
E.Millini Emin Zilli adlandırıb, hətta onun haqqında "eşşək” ifadəsini işlədib.
Özlərini müxalifətçi hesab
edən radikalların bu və buna oxşar statusları, rəyləri yüzlərlədir. Onların
hamısını burada ard-arda düzməyin mənası yoxdur. Lakin baş verənlərdən görünür
ki, Azərbaycan xalqına ağıl dərsi keçməyə çalışan, meydana, mitinqlərə səsləyən
müxalifət başçıları, fəalları və "5-ci kolon” ulduzları qənimət üçün
bir-birilərini təhqir etməkdən belə çəkinmirlər. Qrant uğrunda bir-birinə qənim
kəsilən bu insanların daha şirnikdirici təkliflər qarşısında gözlərini
qırpmadan öz Vətənlərini, dövlətlərini satacaqları şəksizdir.
Alpər
TURAN