Radikallar niyə vətənpərvər ola bilmirlər?
Azərbaycanın yerləşdiyi region ona qarşı hər zaman təhdidlərin
olmasını labüd edib. 90-cı illərdə baş verən siyasi hadisələrə nəzər salmaq
yetərlidir ki, indiki sabit Azərbaycanın dəyərini anlayasan. Həmin dövrdən
indiyədək dəyişməyən bir cəbhə var - radikal müxalifət düşərgəsi. Bu düşərgə zaman
keçsə də dəyişmir. İllər keçdikcə radikallar dövlətindən, xalqından daha da uzaqlaşır.
Azərbaycan siyasi seqmentinə pərçimlənən bu düşərgə təmsilçiləri illər uzunu
dövləti beynəlxalq təşkilatlarla təhdid etməklə məşğul olub, öz ölkəsini zərbə
altında qoyub. Vətən sevgisindən danışan bu "vətənpərvərlər” onu satmaqdan,
xarici qüvvələrin ayağına verməkdən başqa bir işə yaramayıblar. Təsadüfi deyil
ki, Prezidentin İctimai-siyasi məsələlər üzrə köməkçisi, professor Əli Həsənov
da bu günlərdə Az.TV-yə müsahibəsi zamanı bu mövzuya toxunub. O, Azərbaycan
xalqının vətənpərvər, iradəli, əzmli olduğunu diqqətə çatdıraraq təəssüflə qeyd
edib ki, müxalifətimiz utanc vericidir. Onun fikrincə, ATƏT-in bu yaxınlarda
Varşavada keçirilən tədbirlərində yalnız Azərbaycan müxalifəti orada öz
dövlətinin, xalqının, millətinin əleyhinə çıxış edib: "O tədbirlərdə yalnız
Azərbaycan müxalifəti və Azərbaycandan qaçıb xarici ölkələrin ayrı-ayrı
bucaqlarında özlərinə isti yer tapan və anti-Azərbaycan fəaliyyətə qoşulmuş
insanlar ölkəmiz əleyhinə çıxışlar edib, sanksiyaların tətbiq edilməsini tələb
ediblər. Onlar Azərbaycan xalqına qarşı bu və ya digər tədbirlərin görülməsini
tələb edirlər. Biz bir tərəfdən əzmkar, iradəli, vətənpərvər xalq olmağımızla
qürur duyuruq. Digər tərəfdən də Azərbaycanın antixalq, qeyri-vətənpərvər
müxalifətinin olmasından təəssüflənir, xəcalət hissi keçiririk”.
Bəs görəsən dindirəndə Vətəndən ağızdolusu danışan radikal müxalifət
düşərgəsində olanlar niyə vətənpərvər ola bilmir?
Mövzu ilə bağlı "Kaspi” qəzetinə açıqlamasında Yurddaş Partiyasının sədri Mais Səfərli bildirdi ki, bu gün radikal
müxalifət düşərgəsində kimi dindirsən vətənpərvərlikdən danışacaq: "Amma
onların Vətən sevgisi ilə, vətənpərvərliklə heç bir əlaqəsi yoxdur. Onların
Azərbaycan həqiqətləri bağlı bəyanatları da boğazdan yuxarı olan sözlərdir.
Belə olan halda radikal müxalifət düşərgəsinin vətənpərvərliklə nə əlaqəsi ola
bilər? Bu düşərgənin təmsilçiləri həqiqətən vətənpərvər olsaydılar siyasi
partiya kimi ortaya normal, alternativ proqramlar qoyardılar. Lakin bunlar
sadəcə olaraq, Qərbdəki bəzi dairələrdən aldıqları göstərişləri, sifarişləri
yerinə yetirirlər. Bu isə vətənə bağlılıq, vətənpərvərlik deyil. Elə hesab
edirəm ki, radikal müxalifət düşərgəsində olanların sərgilədiyi davranış da
əslində siyasi fəaliyyətdən uzaqdır”.
M.Səfərli qeyd etdi ki, Azərbaycanın Konstitusiyasına və qanunlarına
görə hər bir kəsin sərbəst toplaşmaq hüququ var: "Bu hüquqdan da elə ən çox
radikal müxalifət düşərgəsi bəhrələnib. Amma təəssüflər olsun ki, onlar hər
hansı bir məsələ olan kimi dərhal beynəlxalq aləmdə səs-küy qaldırmaqla məşğul
olurlar. Bu da bir daha onu göstərir ki, onların vətənpərvərliklə heç bir
əlaqəsi yoxdur. Əgər onlar hesab edirsə ki, hüquqları pozulur, onda Azərbaycan
məhkəmələrinə, hüquq-mühafizə orqanlarına müraciət etməlidirlər. Lakin biz hər
zaman bunun əksini görürük. Belə ki, radikal müxalifət düşərgəsi öz probleminin
həllini daxildə yox, onlara emissarlıq edən xaricdəki anti-Azərbaycan
şəbəkəsinə üz tutmaqda görür”.
"Hilal” İctimai Birliyinin
sədri Arzuman Abdulkərimov bildirdi ki, insan yaranışından vətənpərvərlik
yükü ilə doğulur və sonradan bu, onun təbiətində formalaşır: "Elə insanlar da
var ki, onların düşdüyü mühit vətənpərvər kimi formalaşmasında mühüm rol
oynayır. Qeyd etdiyimiz o mühit radikal müxalifət düşərgəsində yoxdur. Elə ona
görədir ki, onlar beynəlxalq güclərin təsiri altındadır və onlardan gələn
maliyyə ilə siyasi fəaliyyət göstərirlər. Necə deyərlər pulu kim verirsə,
sifarişi də o edir. Məhz həmin qüvvələr verdikləri pul qarşılığında onlara öz
dövlətlərinə, milli dəyərlərinə əks getməyi təlqin, hətta deyərdim ki, təhdid edirlər.
Radikal müxalifət düşərgəsi həmin pul müqabilində xaricdəki anti-Azərbaycan
şəbəkəsindən verilən sifarişləri yerinə yetirir. Buradan da belə nəticə hasil
olur ki, radikal müxalifət qüvvələri beynəlxalq güclərin təsirinə düşür və öz
milli maraqlarından çıxış edə bilmirlər. Çünki milli maraqlardan çıxış etsələr,
gələcəkdə maddi problemləri həll edilməyəcək, pul yardımı almayacaqlar. Zaman-zaman
biz bunun şahidi olmuşuq. Onlar müəyyən bir məsələdə haqsız olduqları halda
Azərbaycan dövlətini Avropa Şurası, Avropa İnsan Haqları Məhkəməsi ilə "təhdid”
edirlər ki, biz sizi beynəlxalq məhkəmələrə verəcəyik. Şəxsən özüm bu yanaşmanın
tərəfdarı deyiləm. Lakin biz bunu dilə gətirdikdə bildirirlər ki, Azərbaycan
bir sıra konvensiyalara imza atıb. Buna baxmayaraq, düşünürəm ki, əgər bir
insan vətənpərvərdirsə, milli maraqlardan çıxış edirsə, öz dövlətindən başqa
bir dövlətə, beynəlxalq quruma şikayət etməz”.
AZAD