Qurban Qurbanov Rusiya saytına danışdı - Razıyam
"Qarabağ”ın baş məşqçisi Qurban Qurbanov "Championat.com” saytına
müsahibə verib.
Kaspi.az xəbər verir ki, Qurban Qurbanov "Qarabağ”ın Çempionlar
Liqasındakı çıxışını da dəyərləndirib. O, komandanın turnirdəki nəticəsindən
razı qaldığını deyib:
"Əlbəttə, nəticə qənaətbəxşdir. Bizim üçün çox ağır idi. Bakıya üç
çox güclü klub gəlmişdi. Hər üç rəqibimiz ÇL-in finalında oynamaq istəyir.
Biz layiqli mübarizə aparmaq üçün çox səy göstərdik. İlk oyunlarda heç
nəticə haqda da düşünmədik. Bütün futbolçularda böyük həyəcan vardı.
Xüsusən də Londonda "Çelsi” ilə keçirilən ilk oyunda. Oyundan oyuna
həm futbolçular, həm də mən təcrübə topladım. ÇL-də növbəti mövsümün
hədəflərinə gəldikdə isə əvvəlcə Azərbaycan çempionatında qələbə qazanmalıyıq.
Bildiyimə görə, ÇL-in formatı da dəyişəcək. İndi qrup mərhələsinə
vəsiqə qazanmaq çox çətin olacaq. Azərbaycan çempionatında qalib gəlsək, yenə
də böyük istəklə ÇL-in qrupuna düşməyə çalışacağıq”.
Qeyd edək ki, Qurban Qurbanovdan müsahibəni saytın əməkdaşı Yevgeni Kustov götürüb.