Qohum evliliklərin yaratdığı xəstəlik
Son dövrlər hemofiliya xəstələrinin sayının artması müşahidə edilir.
Elmi- praktiki hemofiliya mərkəzinin məlumatına görə, 2016-cı ildə ölkədə 69
hemofiliyalı xəstə qeydiyyata alınıb. Bu da, xəstələrin sayının nisbi
artımıdır. Aprel ayının 1-ə olan statistikaya görə, Mərkəzdə 1554 nəfər xəstə
qeydiyyatdadır Əgər dünyada 60
hemofiliyalı xəstə qadın varsa , bunun 6-sı Azərbaycan qeydiyyatındadır.
Hemofiliyalı xəstələrin sayının artması qohum nikahlarının çox yayılması ilə əlaqədardır. Qohum nikahlarının bu qədər yayğın olmasının
səbəbini və bunun qarşısını almaq üçün nə kimi tədbirlər görülə biləcəyini
araşdırdıq.
Qohum nikahlarının bu
dərəcədə yayılması uzun illərin ənənəsidir
Məsələ ilə bağlı millət vəkili
Musa Quliyevin fikrini öyrəndik. Millət vəkili hesab edir ki, ilk olaraq
əhali arasında maarifləndirmə işi aparmaq lazımdır: "Evlənən şəxslər nikahdan
əvvəl icbari tibbi müayinədən keçməli, qan
analizi götürülməli və müəyyən müayinələr aparılmalıdır. Bu icbari müayinənin
də müsbət təsir olur. Qohum nikahlarının bu dərəcədə yayılması uzun illərin ənənəsidir.
Hətta bizdə "əmioğlu ilə əmiqızının nikahı göydə kəsilib” deyimi də var. Yəni
valideynlər uşaqlarının yaxın, tanıdıqları ailənin övladı ilə ailə qurmasına
üstünlük verirlər. Amma yavaş-yavaş qloballaşma olduqca, bu cür meyllər də
azalacaqdır. Təbii ki, maarifləndirmə işinin böyük önəmi var. Maarifləndirmə
işində isə kütləvi informasiya vasitələri böyük rol oynayır. Xüsusi sosial
çarxlar, informasiyalar yayımlanmalıdır. Amma digər bir tərəfdən baxanda, nəsil
sağlamdırsa, nikahdan əvvəl müayinə zamanı
cütlükdə heç bir ciddi xəstəlik aşkar olunmayıbsa, bu zaman qohum evliliyinin də bir ziyanı yoxdur”.
Dünyaya xəstə uşaq
gətirdikləri zaman sevgiləri də ölür
Həkim-terapeft Məlahət
Abbasova bildirir ki, hemofiliya
genetik qan xəstəliyi olduğundan, yayılması da genetik olur. Yəni valideyndən
övlada keçir: "Bu xəstəlik qanın tərkibində pozulma halları baş verdikdə yaranır.
Xəstəliyinin qarşısını almaq üçün ilk növbədə qan qohumluğu evliliyindən uzaq
olmaq lazımdır. Nikahdan öncə müayinədən keçmək mütləqdir. Ailə quran cütlükdən
birində xəstəliyin göstəriciləri varsa, bu, gələcəkdə həmin ailədə doğulacaq
uşaqlara təsir edəcək. Bunun qarşısını almaq üçün maarifləndirmə işi
aparılmalıdır. Xüsusən də bu iş yetkinlik yaşına çatmış məktəb uşaqları arasında edilməlidir. Yəni
məktəbə həkim dəvət edib, bu mövzu ətrafında söhbət etmək, onlara qohum
evliliyinin yarada biləcəyi problemdən danışmaq lazımdır. Həmçinin
televiziyaların da bu işdə rolu böyükdür. Maarifləndirici verilişlər hazırlayıb,
cəmiyyəti bu xəstəlikdən agah edə bilərlər. Qohum evliliyində hemofiliya
xəstəliyinin üzə çıxma riski daha yüksəkdir. Hətta arada sevgi olsa belə, yenə
də onlar övladlarını düşünməlidirlər. Dünyaya xəstə uşaq gətirdikləri zaman,
sevgiləri də ölür. Bir neçə belə ailə tanıyıram ki, onlar xəstə uşaqlarına
baxıb əzab çəkirlər. Və bu zaman
sevgilərindən də həzz almırlar. Sağlamlıq hər bir şeydən önəmlidir”.
Evlənmək, sevib-sevilmək
azaddır
Sosioloq Asif Bayramov deyir ki, bu,
cəmiyyətdə artıq kifayət qədər aktual bir məsələdir. O, düşünür ki, müvafiq
hakimiyyət orqanları nikah məsələləri ilə bağlı problemin həlli üçün lazım olan
hüquqi bazanı yaratsalar da, bu addımlar yetərli deyil. Sosioloq bunun ən
uğurlu həll variantının insanların maarifləndirilməsi işi olduğunu deyir. "Bu
yeni nəslin gələcəyi və perspektivi üçün yaxşıdır. Mən düşünürəm ki, həm mənəvi
baxımdan, həm də demoqrafik baxımdan son dərəcə aktual mövzularla bağlı orta
məktəblərdə xüsusi fənn olmalı, maarifləndirmə işi aparılmalıdır. Elə insanlar
tanıyıram ki, onlar evlənmə məqamına çatanda özləri şüurlu şəkildə qohum
evliliyindən imtina edirlər. Çünki həkimə gedirlər, genlərini və bioloji
parametrlərini, qan tərkiblərini yoxlatdıqdan sonra evlənmədən imtina edirlər.
Məncə, bütün hallarda dövlətin bu məsələyə birbaşa müdaxiləsi mümkün deyil.
Çünki dövlət, hakimiyyət və hüquq sistemi insanların mənəvi haqlarına müdaxilə
edə bilməz. Evlənmək, sevib-sevilmək azaddır. Bu mənada düşünürəm ki, mənəvi
rifahları işə salmalıyıq. İnsanların dünya görüşü cilalanmalıdır. Bu, Avropa
ölkələrində çoxdan tətbiq olunur. Çünki
onlar dünyaya gələcək nəslin fiziki və mənəvi sağlamlığı üçün məsuliyyət
daşıdıqlarını anlayırlar. Belə deyə bilərik ki, bu məsələnin həlli üçün bir
maarifləndirmə sistemi qurulmalıdır”.
Hələ də Azərbaycan
cəmiyyətinə ibrət olmayıb
Sosioloq qeyd edir ki, qohum evliliyi bu günün
məsələsi deyil, qohumla ailə qurmaq bizim tarixi adət-ənənəmizdən,
genlərimizdən qaynaqlanır: "Azərbaycanın əksər bölgələrində bu gün də qohumla
evlənmə ənənəsi müşahidə olunur. Elmin, texnikanın, insanların dünya görüşünün
bu qədər inkişaf etdiyi bir vaxtda, Azərbaycanın müəyyən bölgələrində hələ də eyni
bir nəsildən qız almaq, ailə qurmaq ənənəsi mühafizəkar şəkildə qorunub
saxlanılır. Bakı şəhərində də kifayət qədər belə nəsillər var. Bu ənənənin
kökündə həm əmlak, həm də mənəvi
məsələlər durur. Amma daha çox maddi faktor əsaslıq təşkil edir. İmkanlı
ailələrin ənənəsinə fikir versək, görərik ki, onlar özlərindən sonra əmlakın
daha etibarlı əllərdə qalması üçün daha çox qohumdan qız almağa üstünlük
verirlər. Kasıb ailələr isə bu tip hallarda bir prinsiplə çıxış edirlər ki,
yaşlananda bizim özümüzə və əmlakımıza bizə doğma olan qız daha çox can
yandırar, nəinki yad qızı. Yəni belə düşünürlər ki, qohumdan aldığımız qız
ətimizi yesə də, sümüyümüzü çölə atmaz. Təbii ki, bu, çox yanlış düşüncədir. Yüzlərlə
fakt göstərə bilərik ki, qohum qız heç həmin valideynlər qocalmamış, onların
varidatına sahib çıxır, özlərini də aparıb qocalar evinə qoyurlar. Baxmayaraq
ki, qohumdurlar. Təəssüflər olsun ki, bütün bu faktlar hələ də Azərbaycan
cəmiyyətinə ibrət olmayıb. Bu cür məsələlər insanın dünyagörüşündən asılıdır.
Dünyagörüşü, biliyi yüksək olan insan bu addımı atmaz”.
Günel Azadə