“Qocalacağım günü də görmək istəyirəm...”
Milli
musiqimizin qorunması və yaşanması yolunda bütün ali mükafatlara layiq görülüb.
Sinəsini ölkənin "Şöhrət” ordeni bəzəyirdi. Heydər Əliyev Fondunun nəşr
etdirdiyi musiqi albomunda yer alan musiqi nümunələri sənət hesabatı
kimi ustad sənətkarın yaradıcılıq yolunu əks etdirən qiymətli
nümunədir. Sənətkar Heydər Əliyev Fondunun "Qızıl Çinar” beynəlxalq mükafatı ilə təltif olunub. "Əməkdar artist”, "Xalq artisti” fəxri adlarına layiq görülüb, Prezident
təqaüdçüsü olub. 2000-ci ildə pedaqoji fəaliyyətinə görə Təhsil Nazirliyi
Kollegiyasının Fəxri fərmanı ilə təltif edilib. Muğam müsabiqələrində
münsiflər heyətinin sayılıb-seçilən üzvlərindən idi xanəndə Ağaxan Abdullayev.
Jurnalistlərlə
söhbətində də səmimi, mehriban idi. Yolu bir dəfə "Kaspi”dən də düşmüşdü.
Dəvətimizi yerə salmamış, suallarımızı səmimiyyətlə cavablandırmışdı.
Böyük sənətkar
sənətə gəldiyi günləri xatırlayanda qulağını muğam sədasının oxşadığı
vaxtlardan söhbət açırdı. Xanəndə muğamları ilk laylası adlandırırdı.
Hər səhər yuxudan atasının oxuduğu həzin muğamların sədası ilə
oyandığını, radioda səslənən muğam konsertlərini səbirsizliklə gözlədiyini
deyirdi. Bu səslər onu gözə görünməyən sirli bir aləmə aparıb. Zaman
keçdikcə uşaqlıq illərinin sönmək bilməyən marağı onun muğama olan
əbədi sevgisinə çevrilib: "Bakının kəndlərində lap qədim vaxtlardan
muğam sənətinə böyük hörmət olub. Abşeronun kəndlərində həm qəzəliyyatı
gözəl bilirlər, həm də muğamatı. Onlar tar, kamançasız, xanəndəsiz
toy eləmirlər. Kasıb adamın qapısında da toy olsa, mütləq orada xanəndə
olmalıdır”, - deyə xatırlayırdı. A.Abdullayev Əmircan qəsəbəsində yaşasa da,
dədə-baba yurdu Türkan kəndində idi: "Atam müharibədən sonra əsgərlikdən
qayıdanda Türkanda bir toy şənliyində iştirak edir. Səhv eləmirəmsə,
orada Zülfü əmi oxuyurmuş. Atam da həmin toyda oxuyur. Onun oxuması hamının
xoşuna gəlir. Onu Filarmoniyada işləməyə dəvət edirlər. Atam bir
il orada işləyir. Ana babam 30-cu ildə Bakının "Sovetski” məhəlləsində
Əliağa Vahidin doğulduğu evi alır. Mən də orada dünyaya gəlmişəm. Həmin
evdə bir-iki il yaşadıq. Atamın filarmoniyadakı işi nəsə xoşuna
gəlmədiyindən oradan uzaqlaşır. Atam köhnə kişilərdən olduğundan
hər şey də onun xoşuna gəlməzdi. 54-cü ildən isə biz Əmircana köçürük.
O vaxtdan mən Əmircanda yaşayıram”.
Ailələrində
gördüyü musiqi sevgisi onu da sənətin yollarına gətirib. 1969-1973-cü illərdə
A.Zeynallı adına Orta İxtisas Musiqi Məktəbində təhsil alıb. 1973-cü ildə
Əbilov adına Mədəniyyət evində muğam ixtisası üzrə müəllim vəzifəsinə dəvət
olunub. 1977-ci ildən A.Zeynallı adına musiqi məktəbində muğam müəllimi kimi
çalışıb.
Muğam ustası 1975-ci ildə Filarmoniyanın
səhnəsində fəaliyyətə başlayıb. Rusiya, Qazaxıstan, Gürcüstan, İran,
Özbəkistan, ABŞ, Kanada,Almaniya,
Hollandiya, İsveç, Belçika,Avstriya,Fransa,Avstraliya,Hindistan və s. ölkələrdə konsert
proqramları ilə çıxışlar edib. Səfərlərdə ölkəmizi ləyaqətlə təmsil edib.
Ağaxan Abdullayev
musiqini özünə sənət seçən gənclərə örnək olan həyat yaşayıb. O, muğam
sənətini - müəllimlərinin, ustadlarının ona əmanət verdiyi sənəti sədaqətlə
qoruyan xanəndələrdən idi. "Cabbar Qaryağdı, Xan əmi, Seyid Şuşinski, Yaqub Məmmədov kimi ustad sənətkarlar
bu sənəti qoruyub saxlayaraq bizə təhvil veriblər. Böyük xanəndələr
muğam sənətini necə qorumuşdularsa, mən də eləcə qoruyub saxlamağa
çalışıram. Özümdən sonra gələn nəslə də muğamların sirrini elə öyrətməyə
cəhd edirəm. Bizim sənətimiz xalq muğamlarını ifa etməkdir. Bu sənət
ömrü boyu itib-batmayacaq. Çünki muğamlar xalqımızın dinidir, dilidir.
Biz yüngül musiqi oxuyanların məclislərinə daxil olanda, bütün məclis
əhli "böyük sənətkarlar gəldi” - deyəndə bu, bizə bəs edir” - deyə görkəmli
xanəndə qürurla söyləyirdi.
Ağaxan
Abdullayev yeni nəslin milli musiqimizi sevərək böyümələrinin, muğamlarımızı
dəyərləndirmələrinin arzusunda idi: "Uşaq gərək lap əzəl çağlarından xalqın
muğamatını, musiqisini eşidərək böyüsün. O, 15-20, lap elə 30 yaşına
qədər başqa musiqilərə qulaq asanda gec-tez doyacaq. Bu musiqilər
insanın beynini yorur. Ancaq muğama qulaq asdıqca dincəlirsən. İnsan
elə bil təmizlənir, kamilləşir. 30 yaşından sonra hər bir insan muğamları
dinləməyə qayıdır. Dünənə qədər muğamı sevməyənlər bu gün onun vurğunu
olduqlarını çox etiraf edirlər. Muğamlar böyük sərvətdir, zəngin xəzinədir.
Sadəcə, əsl musiqini qavramağın geci-tezi var. Yaxşı olar ki, uşaqları
elə uşaq vaxtından öz musiqimizə alışdıraq”. Xanəndənin fikrincə, hər
adam muğamın dinləyicisi ola bilər. Yetər ki, onun musiqi zövqü olsun: "Əgər
xarici ölkələrdə əcnəbilər muğamlarımıza gözəl qiymət verirlərsə,
deməli, muğamın dinləyicisi hər bir şəxs ola bilər. Mən bunun şahidi
olmuşam. Parisdə min nəfərlik salonda keçirilən muğam konsertində
cəmi 50 nəfərə yaxın azərbaycanlı-türk var idi. Qalan tamaşaçılar
isə fransızlar idi. Onlar bizim muğamlara çox gözəl qiymət verirdilər.
Əcnəbilər qarşısında çıxış etmək onun üçün xoşdur ki, bizim dilimizi
bilməsələr də, diqqətlə qulaq asırlar. Onların heyrəti bizə ləzzət
verir. Xalqımız isə hər şeydən əvvəl dilimizi başa düşür. Bu o demək
deyil ki, salonda oturanların hamısı muğamı gözəl qavrayır. Onların
elə 50-i muğamı başa düşsə, kifayətdir”.
Sənətimi xalqıma sevdirə bilirəmsə...
Xəstəlik
yaxasını tanımasaydı, əcəl qapısını vaxtsız kəsməsəydi bu gün də ayıq-sayıqlıqla
milli musiqimizin keşiyində idi. O musiqimizi yad çalarlardan, yabançı
təsirlərdən qorumağa çalışırdı. Buna görə özünü xoşbəxt sayırdı:
"Sənətimi yaşadıb xalqıma sevdirə bilirəmsə, bu, mənim üçün böyük
xoşbəxtlikdir. Əsl sənət saf su kimidir, ona qatılan yad çalarları
sevmir”. Ağaxan Abdullayev el şənliklərinin də bəzəyi idi. Ustad sənətkarların
el şənliklərindəki dəst-xəttini ləyaqətlə qoruyurdu: "Bizim böyük sənətkarlarımız
toylarda oxuyublar. Bəlkə yüz il keçəndən sonra da o səslər olmayacaq.
O səslər Allah vergisi idi. Gözəl səs 50-100 ildən bir yaranır. Xanəndə
kimi püxtələşmək isə vaxt tələb edir. İndiki dövrün tələbləri isə
tam başqadır. O vaxt radio, televiziyanın imkanları da bu qədər inkişaf
etməmişdi”.
Ağaxan
Abdullayev 66 yaşında idi. Amansız xəstəlik onu haqlamasaydı canlı ifaları yenə
də dinləyiciləri ovsunlayacaqdı. Arzusu qocalmaq, ömrünü sağlam başa vurmaq olsa
da, həyat onunla sərt davrandı: "İnsan yaşa dola bilər. Ancaq ürək qocalmır
axı. Allah rəhmət eləsin Vahidə. Deyirdi ki, "Varam öz yarım ilə, necə
əvvəl var idim”. İnsan ölənə qədər ürəyi cavan qalır. Qocalmaq özü də
Allahın bəxş elədiyi nemətdir. Ömür Allah payıdır. Mən çox xoşbəxt
olardım ki, xəstəliksiz, şikəst olmadan qocalım. Belin əyilməsi də
böyük nemətdir. İnsan neçə il yaşayır, yeyib-içir, gəzir, 80-90 yaşında
da Allahın qarşısında əyilib ona "çox sağ ol” deməsin? Mən qocalacağım
o günü də görmək istəyirəm. Cavanlığında qocalığını gözünün qabağına
gətirməmək isə uzağı görə bilməmək nişanəsidir. Yaxşı deyiblər
ki, ömrü hədər keçən cavanlığın mənasız, əzablı qocalığı olur”.
Ağaxan
Abdullayev xoşbəxt sənətkar idi. Onu tanıyırdılar, sevirdilər. Səsi ölkənin
sərhədlərindən kənarda, böyük konsert salonlarında eşidilirdi. Muğamlarımızı,
xalq mahnılarımızı onun ifasında sevirdilər. Adına, sənətinə layiq tələbələr
yetişdirmişdi: "Allahın sənə verdiyi bütün əzaların hamısı yerindədirsə
və bir valideyn kimi öz övladlarını xoşbəxt görürsənsə, ən böyük
səadət elə budur. Var-dövlət hamısı boş şeydir. Mən xanəndəyəm. Sənətimi
yaşadıb xalqıma sevdirə bilirəmsə, bu, mənim üçün böyük xoşbəxtlikdir”.
Sənətinin xiridarı olduğundan onu sevirdilər. Xəstə olanda belə nəinki
respublikamızın uzaq guşələrindən, qonşu ölkələrdən də zəng edib əhvalı ilə
maraqlanırdılar. Heydər Əliyev Fondu isə son günə qədər xanəndədən köməyini
əsirgəmədi. A.Abdullayev müalicəsini Türkiyədə davam etdirirdi: "Əgər mən bu az
müddətdə xəstə olmasaydım, xalqımızın və dövlətimizin mənə olan sevgisinin və hörmətinin
bu dərəcə olduğunu bilməzdim. Tək qohumlarım, dostlarım yox, Azərbaycanın elə
bir guşəsi olmadı ki, oradan zəng edib səhhətimlə maraqlanmasınlar. İndinin
özündə nə qədər zənglər alıram. Deməli, mən hələ varam və hələ də məni
istəyirlər”, - deyə xanəndə təskinlik tapırdı.
Ustad
sənətkarın bir arzusu da vardı: işğal altında qalan torpaqlarımızda konsert
vermək: "İnşallah, torpaqlarımız düşmən əlindən azad olunduqdan sonra
biz də o yerlərdə konsertlər verərik. Bizim də gücümüz səsimizə çatır”
- deyirdi. Ancaq xanəndəyə nə qocalacağı günü görmək, nə də Qarabağ torpağında
konsert vermək nəsib oldu. Səsi, ifası yazılan lentlər onilliklər boyu
fondlarda, arxivlərdə, füsunkar səsi isə qulaqlarda yaşayacaq.
Ağaxan
Abdullayev dədə-baba torpağında - Türkanda torpağa tapşırılıb: "Ağaxan müəllim vəsiyyət etmişdi ki, məni kəndimizin
qəbiristanlığında, atamın-anamın yanında dəfn edin. Onun vəsiyyətini yerinə
yetirmək borcumuzdur. Ona görə də vəsiyyətinə uyğun olaraq Türkanda kənd
qəbiristanlığında torpağa tapşıracağıq”- deyə qohumları ustad xanəndənin
vəsiyyətinə əməl ediblər.
Allah rəhmət
eləsin!
Təranə
Məhərrəmova