Mirvari, muncuq, bahalı daşlar, nadir incilərdən hazırlanan zinət əşyaları...
Göz qamaşdıran, könül oxşayan, qiymətləri ilə də dodaq uçuqladan əşyalar...
Qızılın bütün çalarları – ağ, sarı, çəhrayı, iri brilyantlar və rəngli
daş-qaşlar, qeyri-adi dizayn və nadir naxışlar - bütün bunlar "Dünyanın zinət əşyaları”nın
təqdimat mərasimində iştirakçılara təqdim olundu.
İştirakçıları özünə heyran qoyan bu nadir sənət inciləri, əl işləri "zərgərlik
və incəsənət” mövzusuna həsr olunan "Jewels of the World” tədbirində sərgilənirdi.
Beynəlxalq tədbirin dördüncü buraxılışı bu il Four Seasons hotelində baş tutdu.
Biz də dünyanın qeyri-adi sərgisi ilə tanış olmaq üçün sözügedən ünvana
yollandıq.
Hotel nömrələrini bəzəyən parıltı
İldən-ilə ən füsunkar zinət əşyaları və sənət əsərləri
kolleksiyalarının təqdimatı yeni konseptual yanaşma ilə qonaqlar arasında böyük
maraq doğurur. Dünyanın ən gözəl və zərif zərgərlik məmulatlarının
yaradıcıları, qeyri-adi saat istehsalçıları sərgi iştirakçılarını qarşılamaq
üçün səbirsizlənirdilər.
Bütün ölkələrdən zərgərlik məmulatları hotelin nömrələrində nümayiş
olunur. Brendlərin hər biri xüsusi olaraq təchiz edilmiş və hazırlanmış lüks
nömrələrdə qonaqları qəbul edir və hər brend haqqında ətraflı məlumatlar
verilirdi.
Sərginin ən bahalı brendi
Bu il əsas diqqət yüksək keyfiyyətli qiymətli daşlar və Cənub dənizinin
mirvarilərindən ibarət kolleksiyalar arasındakı ahəngi və onların zərif kombinasiyasını,
habelə əl işi olan qol saatlarını təqdim etməyə verilir.
Sərginin ən bahalı brendləri xüsusi əl işləri olan qol saatları idi.
De Laneau, Greubel Forsey saatlarının ən sadəsi 150 min dollara, daha çox
funksiyalara malik olanı isə 1 milyon dollara təklif olunurdu.
Saata heyranlıqla baxan Murad deyir ki, ona bir könüldən min könülə
vurulsa da, bu qiymətə onu yuxusunda belə ala bilməz: "Bu saata ancaq
heyranlıqla baxa bilərəm. Alsam belə, onu üstümdə gəzdirmək böyük məsuliyyət tələb
edər. Saatı bilmək üçün telefonuma baxıram, kifayət edir (gülür)”.
Dünyanın heç bir ölkəsində olmayan mirvarilər
Ən çox diqqət çəkən zinət əşyalarından biri də Hindistan mirvariləridir.
Mirvarilər haqqında məlumat verən hind biznesmen deyir ki, burada sərgilənən
mirvarilər dünyanın heç bir ölkəsində yoxdur. Hindistanda belə, nadir tapılan sənət
əsərləridir: "Mirvarilərin qiymətləri 10 min dolardan 30 min dollara qədər dəyişir.
Qiymətlər ölçüsünə, daşın ağırlığına və nadir tapıntı olduğuna görə fərqlənir”.
Jalə Hindistan mirvarilərinin vurğunudur. Sərgiyə də məhz mirvarilərə
baxmaq üçün gəlib: "Dünya brendlərinin ölkəmizdə sərgilənməsi çox yaxşı haldır.
Eşidəndə ki dünyanın zərgərlik inciləri ölkəmizdə nümayiş olunacaq, düşünmədən
gəldim. Çünki biz qadınlar qızılın, zinət əşyalarının həvəskarıyıq. Amma
bunları almaq büdcəmə uyğun gəlmir”.
565 min avroluq üzük
Sərginin ən diqqət çəkən zinət əşyaları isə Fransa stendinə məxsus
idi. Gözalıcı parlaqlığı ilə iştirakçıları özünə cəlb edən zinət əşyaları öz fərqliliyi
ilə digərlərindən seçilirdi. Xüsusi brilyant qaşlarla hazırlanan üzüklər böyütücü
altında sərgilənirdi. Fransa stendinin qızıllarının qiymətləri 50 min dollardan
başlayıb 150 min dollara qədər davam edir. Burada da qiymətlər daşlara və işləmələrinə
görə fərqlənir. Bahalı daşdan hazırlanmış üzüyün qiyməti 565 min avrodur. Bu
üzüklərin nadir daşları var. Qırmızı daş-qaşla hazırlanan kolye isə 160 min
avrodur. Sapfirdən istifadə olunan üzüklər isə 22 min avroya təklif edilirdi.
Elitanın sevdiyi qeyri-adi kolleksiya
Amerika stendi də başına tamaşaçı toplayan stendlər arasındadır.
Amerikanın Yvel şirkətinin işləri əsasən mirvari üzərində olur. Yvel şirkətinin
məhsullarının qiymətləri 1-5 min dollar arasındadır. 5 min dollardan 30 min
dollara qədər isə daha unikal zinət əşyaları nümayiş olunur.
"Dünyanın zinət əşyaları”nın prezidenti Valentina Vasilyeva deyir ki,
incəsənət hər zaman "dünyanın ləl-cəvahiratları” konsepsiyasının ayrılmaz və
mühüm tərkib hissəsi hesab olunub: "Sərgidə ağlı başdan çıxaracaq qədər heyrətamiz
müasir incəsənət kolleksiyası təqdim edirik. Bizim üçün bu beynəlxalq sərginin
Bakıda keçirilməsi təşkilatçı kimi uğurumuzun əsas göstəricilərindəndir.
"Dünyanın zinət əşyaları”nın hərəkət konsepsiyası dünyanın seçilmiş yerlərində ən
nüfuzlu müştəriləri hər zaman unikal imkanlarla təmin etməkdən ibarətdir. Başlıca
məqsədimiz yüksək bədii dəyərə malik ən yaxşı zərgərlik, saatsazlıq və incəsənət
nümunələrini bir araya gətirmək və qeyri-adi kolleksiyaları yerli elitaya təqdim
edən ilk təşəbbüskar olmaqdır”.
Valentina Vasilyevanın sözlərinə görə, əsas diqqət yüksək keyfiyyətli
qiymətli daş və Cənub dənizinin mirvarilərindən ibarət kolleksiyalar arasındakı
ahəngi və onların zərif kombinasiyasını təqdim etməyə yönəlib: "Brendlərin hər
biri qonaqları xüsusi olaraq təchiz edilmiş və hazırlanmış lüks nömrədə qəbul
edir, bu isə öz növbəsində təkrarolunmazlıq hissini gücləndirir”.
Qeyd edək ki, iki gün davam edən sərgidə De Laneau, D’ Joya, Greubel
Forsey, Lydia Courteille Creations, Magnificent Hong Kong, Tenzo, Urwerk, Yvel
brendlərinin qeyri-adi kolleksiyaları Azərbaycan auditoriyasına nümayiş olunur.
Bakı 22°C
