Qızıl bazarında əl yandıran qiymətlər
Çox az xanım tapmaq olar ki, qızıla maraq
göstərməsin. Əgər kişilərin ürəyinə gedən yol mədədən keçirsə, əminliklə deyə
bilərik ki, qadınların ürəyinə gedən yol bər-bəzəkdən, daş-qaşdan keçir. Bəziləri
qızıl alarkən öz zövqünü oxşayır, digəri isə yatırım etməklə "qara günləri”
düşünür. Çünki qızıl, istənilən vaxt satıb pula çevirə biləcəyimiz ən dəyərli əşyalardan biridir. Ailə qurmağa
hazırlaşan cütlüklərin də ən böyük mübahisəsi, söz-söhbəti məhz bu məsələdə
düyünlənir. Bəzən iş hətta o yerə çatır ki, məsələ ailə münasibətlərinə də
təsir edə bilir. Çünki bəzən kiminsə bahalı qızıl almağa imkanı çatmır və
beləcə, araya söz-söhbət düşür. Elə bu günlərdə də qızılın qiymətinin
qalxdığına dair söz-söhbət gəzir. Biz də hazırda qızıl bazarında qiymətlərin nə
yerdə olduğunu öyrənmək üçün yolumuzu Mərkəzi Univermaqdan saldıq. İlkin
ab-hava vəziyyətin əvvəlki durumda olmadığı təsirini bağışladı. Satıcıların əksəriyyəti
bir fincan çayı qarşısına qoyub mobil telefonla qurdalanır. Bu durum qızıl
bazarındakı durğunluqdan da işarə ola bilərdi. Müştəri qıtlığı diqqət çəkirdi. Tək-tük
mağazalara müştərilər yaxınlaşır və qiymətlərlə maraqlandıqdan sonra başını
bulayaraq uzaqlaşırdı. Onlardan biri də Reyhan xanımdır. Deyir ki, qiymətlər əl
yandırır: "Oğluma toy etməyə hazırlaşıram. Gəldim ki, qiymətlərlə maraqlanım.
Adi bir nişan üzüyünə əl uzatdıq,
qiyməti min manatdan bahadır. Hələ bunun boyunbağı dəsti var. Bilmirəm nə edəcəyəm”.
Gülşən isə nişanlısı ilə gəlib. Deyir ki, büdcəsinə
uyğun bir neçə üzüyü artıq gözaltı edib: "Bir neçəsini bəyənmişəm. Amma hələlik
seçim etməmişəm. Qiymətlər baha olsa da, axtarıb münasib qiymətə tapmaq olur”.
Alıcı olaraq bir neçə vitrinə yaxınlaşıb
qiymətlərlə maraqlandıq. Əksər mağazalarda brilyant qaşlı nişan üzüklərinin
qiyməti minimum 1000 manatdan başlayır. Düzdür, müəyyən mağazalarda bir qədər
aşağı qiymətlərə rast gəlsək də, ümumilikdə üzüklərin qiymətləri 1000 manatdan
başlayır və 8 minə qədər yüksəlir. Satıcıların sözlərinə görə, qızılların
əksəriyyəti İtaliyadan və Türkiyədən gətirilir. Məsələn, satıcı Nigar xanım
deyir ki, son günlərdə qiymətlərdə artım müşahidə olunur. Bir çox mağazalarda
isə ümumiyyətlə, bütün məhsullar brilyant qaşlıdır. Təkcə qızıl olanların sayı
çox azdır. Sadə qaşlı üzüklərin qiyməti isə 200 manatdan başlayır. Satıcı Zəminə
xanımın sözlərinə görə, hər modelin
dizaynından və işlənməsindən asılı olaraq, qiymətlər də müxtəlif ola bilər. Satıcının sözlərinə görə, gömrük
haqları qaldırıldığından son günlər qızılın qiyməti xeyli artıb. Dünya
bazarında qızılın dəyərinin artması da qiymətlərə təsirsiz ötüşmür.
Digər bir vitrinə yaxınlaşdıqda isə ilk eşitdiyimiz
sual «brilyant, yoxsa sadə» sualı olur. Əvvəlcə büdcəmizi soruşurlar, ona uyğun
məhsulları qarşımıza düzürlər. Satıcı xanım deyir ki, əgər büdcəniz 1000
manatdan yuxarı deyilsə, brilyant qaşlı məmulatlara
yaxınlaşmağa dəyməz. Sadə üzüklərin qiyməti isə 300-400 manatdan başlayır: "Qızıl
almaq istəyərkən əlində olan məbləğə uyğun məhsullara baxmaq lazımdır. Məsələn,
əgər müştərinin büdcəsində 2000 manat
varsa, biz ona uyğun məhsul təqdim edirik”.
Səbinə xanım isə deyir ki, onların məhsulları İtaliyadan
gətirilir: "İlk növbədə nişan üzüklərinin qiymətini soruşduq: "Burada bütün
məhsullar brilyant qaşlıdır. Üzüklərin qiymətinə gəlincə, deyə bilərəm ki, ən
sadələri 800 manatdan başlayır və 5000 manatadək yüksəlir. Boyunbağı, qolbaq və
sırğadan ibarət dəstlər isə 3200 manatdan başlayır. Hətta 50 min manata təklif
olunanı da var. Sadə, tək brilyant qaşlı üzüklərin qiyməti əksərən 1300-1500
arası dəyişir”.
Nisbətən ucuz məhsulların qiyməti ilə də
maraqlandıq. Səbinə xanım deyir ki, əgər ucuz mal axtarırsınızsa, qiyməti 800
manata qədər olan məhsulları tövsiyə etmək olar. Satıcının sözlərinə görə,
modellər çox tez-tez dəyişir: "Hər modelin də qızılına və dizaynına görə
müxtəlif qiyməti olur. Dolların qiyməti qalxdıqca, qızılın da qiymətində artım olur.
Yeni gələn modellər nisbətən bahadır. Demək olar ki, eyni məhsulda 100-200
manat bahalanma var. 2-3 gün olar ki, qiymətlər artıb. Bu, təkcə bizdə
yaşanmır, bütün dünyada qızılın qiyməti qalxıb”.
Satıcı deyir ki, bəzən hətta, 30-40 min qiyməti
olan məhsullar da satılır: "Hər kəs öz büdcəsinə uyğun mal axtarır. Adətən, alıcıların
simasından bilmək olur ki, o, hansı qiymətə qızılı almaq istəyir. Amma önəmli
olan, məhsulun qiyməti deyil. Məsələn, elə məhsul var ki, qiyməti 20-30 min
manat olsa da, zövqü oxşamır. Ondan daha ucuz qiymətə daha zərif və daha gözəl
məhsullar almaq olar. Qızıl elə bir şeydir ki, gərək paltar kimi özünə yaraşanı
seçə biləsən. Bütün məhsullar hər insana eyni cür yaraşmır. Ona görə də seçim
edərkən diqqətli olmalısınız. Önəmli olan qiymət yox, keyfiyyət və insana
yaraşmasıdır. Əgər taxdığın bəzəklər zövqünü oxşamırsa, demək, ona o qədər pul
verməyinə dəyməz. Adətən, öz alıcılarıma da sadə, amma eleqant məhsulları
məsləhət görürəm. Bəzən elə olur ki, sırf "qiyməti bahadır deyə bunu istəyirəm”
deyənlər də olur. Başa salmağa çalışıram ki, bu model sənə yaraşmır. Ondansa
digərlərinə nəzər yetir. Mağazamızda real alıcılara müəyyən endirimlər də olur.
Endirim isə ümumi qiymətdən asılıdır.
Böyük məbləğdə alış-veriş etdikdə, nisbətən çox endirimlər edirik. Çünki
etdiyimiz endirimlər bizə daha çox
müştəri qazandırır”.
Şəbnəm
Mehdizadə