Qida sənayesinin milli brendi - Fotolar
"Ulduz” şokolad fabrikinin fəaliyyəti ölkə
iqtisadiyyatında qənnadı və yeyinti sənayesinin ilk uğuru kimi dəyərləndirilir.
"Veysəloğlu” şirkətlər qrupuna daxil olan "Ulduz” Şokolad Fabrikinin istehsal
mühitini sahibkarlığın, özəl sektorun və biznes mühitinin fəaliyyətinə
yaradılan bariz nümunə də adlandırmaq
olar. 2001-ci ildən fəaliyyətə başlayan
və ən müasir avadanlıqlarla təchiz olunan müəssisə, məhsullarını təkcə dünyanın
20-dən çox ölkəsinə ixrac etmir, həmçinin hər il keçirilən nüfuzlu beynəlxalq sərgilərdə
ölkəmizi qida sektorunda layiqincə təmsil edir. Məhz bunun nəticəsidir ki,
yerli istehsalın inkişafına xidmət edən müəssisənin fəaliyyəti beynəlxalq auditorlar tərəfindən də bütün
sistemlər üzrə yüksək qiymətləndirilib.
Fabrik Əməyin Mühafizəsi və Texniki Təhlükəsizlik,
Qida Təhlükəsizliyi İdarəetmə Sistemi Standartı, Qida İstehsalçıları üçün Yeni
Qida Təhlükəsizliyi Standartı sertifikatlarına malikdir. Müəssisə həmçinin Müştəri
Məmnuniyyəti Standartı və "HALAL”
sertifikatlarına da layiq görülüb. Fabrik artıq 2 ildir Keyfiyyət İdarəetmə
Sistemi Standartı, British Retail Concertium, İngilis Pərakəndəçilər Birliyi
Standartı, Beynəlxalq Qida Standartı, Qida Təhlükəsizliyi İdarəetmə Sistemi
Standartı sertifikatlarını tətbiq edir. "Ulduz” Şokolad Fabriki həmçinin BRC,
İFS standartlarını alan ilk Azərbaycan müəssisəsidir. Ötən ilin fevral ayının əvvəlində
Moskva şəhərində dünyanın 57 ölkəsinin 2178 şirkətinin iştirakı ilə keçirilən
"PRODEXPO 2017”
24-cü Beynəlxalq Qida sərgisində ölkəmizi "Made in Azerbaijan” adı altında təmsil
edən 6 şirkətdən biri də "Ulduz” olub.
"Ulduz”
Şokolad Fabrikindəki iş mühiti olduqca qaynardır. Həyətində qələbəlik, sexlərində
intizamla çalışan insanların əmək həyatı, dəzgahların sükutu pozan səsi, nahar
üçün bufet önündə növbəsini gözləyən işçilər, məktəblilərin ekskursiyası -
sanki köhnə Azərbaycan filmlərindəki epizodlardır. Maraqlı və canlı...
Fabrikin
fəaliyyəti haqqında məlumatları müəssisədə olarkən əldə edirəm. Fəaliyyətinin
ilk illərində fabrik "Ritm”, "Rocky”, "Tango”, "Xonça”, "Seasons”, "Sema”,
"Wedding” və digər markaların müxtəlif çeşidləri ilə xarici bazarlarda da böyük
nüfuz qazanıb. 2014-cü ilin əvvəlindən "Topnut” markalı "Draje” və "Çırtdan”,
"Freş”, "Alpinmilk”, "Villi” markalı "Karamel” xətlərinin işə salınması ilə müəssisə
öz fəaliyyət sahəsini daha da genişləndirib. 2016-cı ildən isə fabrik "Ulduz”,
"Sema”, "Moredo” və "Belore” markaları altında yeni çeşid şokolad və karamel
istehsalına başlayıb. Hazırda fabrikin
istehsal gücü saatda 3200 kiloqramdan artıqdır. Müəssisədə 100-dən artıq çeşiddə
qənnadı məhsulları istehsal olunur. Keçən ildən başlayaraq fabrikdə "Kəklikotulu
konfet” istehsal olunmağa başlayıb. "Şokoladın bu növünün kifayət qədər
alıcıları var. Sifarişdən asılı olaraq istehsalı genişlənir. İndiyə qədər belə
bir konfet növü istehsal olunmayıb. Yəni, bu, fərqli bir daddır. Ölkəmizin hər
yerində kəklikotulu çaya üstünlük verildiyini nəzərə alıb, bu şokoladı
hazırlamağı düşündük. Kəklikotu dəmlənəndən sonra istehsal prosesində məmulata
qatılır. Həmçinin hazır olandan sonra da şokoladın üzərinə kəklikotu səpilir”-
deyə premium şokoladların istehsalı şöbəsinin
rəhbəri Əliheydər Manafov qeyd edir: "Bu,
premium seqmentə aid olduğu üçün hələlik xarici bazarda deyil, daxili
bazarda satılır».
Dünya nəhəngləri ilə rəqabət qabiliyyəti
"Müəssisə üçün ən önəmli amil keyfiyyətdir.
Fabrikin məhsulları beynəlxalq standartların bütün tələblərinə cavab verir və həm
yerli, həm də xarici bazarlarda istehlakçı etibarı qazanıb”-deyə istehsalat növbə rəisi Şamil Əhlimanov
məlumat verir: "Hazırda fabrik həm daxili, həm də xarici bazarda şokolad və qənnadı
sahəsində öz sözünü demiş dünya nəhəngləri ilə rəqabət qabiliyyətindədir.
Fabrikin fəaliyyətə başlaması daxili istehsala, qənnadı məmulatları və qida məhsulları
sənayesinə yeni keyfiyyət, yeni dad gətirməklə bərabər, yerli bazara müxtəlif
çeşiddə məhsullar təklif edib. Həmçinin məhsullar qısa vaxt ərzində
istehlakçıların rəğbətini qazanıb”. Növbə rəisi fabrikin məhsullarına olan tələbatın
gündən-günə artdığını deyir. Belə ki, keyfiyyətli məhsul, göz oxşayan
qablaşdırma, çeşid bolluğu, sərfəli qiymət və yüksək xidmət istehlakçıların
sayının sürətlə artmasına səbəb olur: "Hazırda fabrikdə 5 şokolad istehsal xətti,
iki karamel istehsal xətti mövcuddur. Şokolad istehsal edən Çinar-1 və Çinar-2
xətlərində şokoladın hazırlanması, kəsilməsi, bükülməsi, qablaşdırılması həyata
keçirilir. Bütün proses insan əli dəymədən avtomatlaşdırılmış şəkildə həyata
keçirilir. Hər xətdə təxminən 20-25 ton, ümumilikdə 45 ton şokolad, 15-16 ton
karamel istehsal olunur. Sexlərin hər birində 15-20 işçi çalışır”. İstehsalat rəisinin
sözlərinə görə, fabrik ən müasir
standartlara cavab verən, ekoloji təmiz, gigiyenik baxımdan təhlükəsiz
şirniyyatlar, çeşidli karamellər istehsal edən müəssisə olmaqla, keyfiyyətli məhsulları ilə istehlakçılara təminat
verir: "Fabrik yarandığı gündən Azərbaycanın
qida sənayesində mühüm yer tutan, istehlakçıların etibar etdiyi, eyni zamanda,
beynəlxalq arenada ölkəmizi layiqincə təmsil edən müəssisələrdəndir. Hazırda müəssisə
ölkə iqtisadiyyatında qənnadı və yeyinti sahəsinin inkişafında mühüm rol
oynamaqla, bu sahənin liderinə çevrilib”. Ş.Əhlimanöv qeyd edir ki, fabrikdəki
məhsullar istehsaldan istehlaka qədər mərhələ-mərhələ yüksək ixtisaslı mütəxəssislərin
nəzarəti və müayinəsi ilə hazırlanır. İstehsal zamanı istifadə olunan xammal
Türkiyə, Rusiya, Ukrayna və s. ölkələrdən gətirilir. Eyni zamanda, daxili
bazarın da müəyyən xammalından istifadə olunur. Müəssisədə hazırlanan məhsulların
analizi üçün peşəkar laboratoriya fəaliyyət göstərir. Fabrikdə qida və
qeyri-qida məhsullarının saxlanılması üçün ən müasir avadanlıqlar ilə təchiz
olunmuş anbar binası fəaliyyət göstərir.
İxracat xətti
genişlənir
"Ulduz”
fabrikinin məhsulları nəinki yerli bazarda milli brendə çevrilib, habelə xarici
bazarlarda da nüfuz qazanıb. Ölkəmizdə özəl sektor kimi ilkə imza atan fabrik, həm daxili bazarda liderliyi qoruyub
saxlamağa, həm də xarici bazara çıxmağa nail olub.
2011-ci
ildən ixracla məşğul olan "Ulduz”un
ixracat şöbəsinin müdiri Anar Əliyev hazırda 20-ə yaxın ölkəyə məhsul göndərdiklərini
deyir. Belə ki, Rusiya, Qazaxıstan, Özbəkistan, Türkmənistan, Tacikistan,
Ukrayna, Belarus, Gürcüstan, Fələstin, İran, Birləşmiş Ərəb Əmirlikləri,
Hindistan və s. ölkələrə məhsul ixrac edilir: "Hər ölkənin özünə uyğun dad
seçimi var. Elə ölkələr var ki, yer fıstığı tərkibli şokoladlara üstünlük
verirlərsə, Orta Asiya ölkələri və Rusiya karamellərə üstünlük verir. Ən çox
satılan mallar sırasında «Tanqo» çeşidi yer tutur. Bu məhsul satış həcminə görə
uzun illərdir ki, liderlik edir.
İnternetdə də bu çeşid haqqında müsbət rəylər yer alıb”. A.Əliyevin sözlərinə
görə, fabrik bu ilin may ayında Ukraynanın məşhur "Roşen” qrupunun istehsal
etdiyi məhsulların çeşidləri də fabrikdə istehsal olunacaq. Bazarda tanınmış
çeşidlərdən biri «Korovka»dır ki, may ayından bu konfetin istehsalına
başlayacağıq. Bundan əlavə, xətləri Almaniya və İtaliyadan alırıq. İlin sonuna
kimi fabrikdə şokoladlı-şokoladsız vafli istehsal olunacaq. Bu il həmçinin
Moskva, Şanxay, Dubay və Hindistanda keçiriləcək sərgilərdə iştirak edəcəyik.
Hesab edirik ki, yeni xətlərlə bazarımız daha maraqlı olacaq. Çünki xətləri
almamışdan əvvəl bazarlarda hansı mallara üstünlük verildiyini araşdırmışıq.
Aldığımız xətlər həmin bazara daxil olmağımıza kömək olacaq. İlin sonunda biz
artıq həmin ölkələrə yükləmələrimizi başlamaq fikrindəyik. Daxili bazarda isə
"Azərbaycan brendi” adını qoruyub saxlayırıq”.
Ölkənin bütün irili-xırdalı marketlərində məhsulları satılan fabrikin,
paytaxtda "Premium” dükanları da açılmağa başlayıb.
Müəssisədə
hazırda 200 nəfərdən artıq işçi çalışır. Fabrikin rəhbərliyi
onların rahatlığını təmin etmək üçün də müəyyən addımlar atır. İşçilərin iş
vaxtı çay və isti yeməklə, işə gəlib getmələri üçün nəqliyyat vasitəsilə, həmçinin
xüsusi iş geyimləri ilə təminatı həyata keçirilir.
İşçi heyətinin peşəkar səviyyəsinin
artırılması üçün şirkət hesabına daxili, xarici kurslar və seminarlar təşkil
olunur. İşçilərin və müştərilərin təhlükəsizliyini təmin etmək məqsədi ilə əməkdaşlar
mütəmadi olaraq tibbi müayinədən keçirilir.
Yaxın illərdə fabrikdə yeni məhsulların
istehsalı və istehsalat sahələrinin genişləndirilməsi nəzərdə tutulur. İstehsal
həcminin artması isə həm də yeni iş yerlərinin yaranması deməkdir.
Fabrikin
sexlərini gəzib istehsal prosesi, müəssisədəki
insanların əməyi haqqında öyrəndikcə və əldə edilən uğurların şahidi olduqca
"Ulduz”un ölkənin Qqida sənayesinin
milli brendi” adı daşımasının təsadüfi olmadığını anlayırsan. Milli brendin yaranması isə müasir biznesdə mübarizə
aparmağın və yerini qoruyub saxlamağın yeganə yoludur.
Təranə Məhərrəmova