Qətərin təhsil nazirinə BDU-nun fəxri qonağı diplomu təqdim edilib - Fotolar
Bakı Dövlət Universitetində Qətər Dövlətinin təhsil
və ali təhsil naziri Məhəmməd bin Əbdülvahid Əl-Həmmadinin rəhbərlik etdiyi nümayəndə
heyəti ilə görüş olub. Qonaqları salamlayan
rektor, akademik Abel Məhərrəmov İslam dünyasının inkişaf etmiş ölkələrindən
olan Qətər Dövləti ilə Azərbaycan Respublikası arasında diplomatik əlaqələrdən danışıb.
Ölkəmizin uzun əsrlərdən bəri İslam
sivilizasiyasının əsas mərkəzlərindən biri olduğunu, islam dininin yayılmasında,
müsəlman intibahının bərqərar olmasında mühüm rol oynadığını deyən rektor bu
gün dünyada gedən proseslərə, bir çox kataklizmlərə,
müxtəlif ölkələrdə baş verən fəlakətlərə baxmayaraq, Azərbaycanın bütün
bunlardan həm iqtisadi, həm mədəni-mənəvi müstəvidə ləyaqətlə keçdiyini və öz
varlığını, möhtəşəm tarixini bir daha ortaya qoya bildiyini diqqətə çatdırıb. Ötən
illər ərzində prezident İlham Əliyevin və Qətər Dövləti Əmirinin dəfələrlə rəsmi
görüşlərinin olduğunu deyən rektor, ölkələrarası çoxsaylı sənədlərin
imzalanmasına da diqqət çəkib. Bildirib ki, ötən il Azərbaycanın təhsil naziri
Mikayıl Cabbarov Dohaya səfəri çərçivəsində Qətər Dövlətinin təhsil və ali təhsil
naziri Məhəmməd bin Əbdülvahid Əl-Həmmadi ilə görüşüb, ölkələrimiz arasında təhsil
sahəsində əməkdaşlığın hazırkı vəziyyəti və gələcək inkişaf perspektivləri
müzakirə edilib, birgə fəaliyyətin genişləndirilməsinin, elmi tədqiqatların
aparılmasının əhəmiyyəti qeyd edilib.
Rektor, eyni zamanda qonaqlara
Bakı Dövlət Universiteti, onun beynəlxalq əlaqələri, o cümlədən islam universitetləri
ilə əlaqələri barədə məlumat verib. Bildirib ki, BDU-nun 100 ilə yaxın tarixi ərzində
çox şöhrətli məzunları, dünya səviyyəsində tanınan görkəmli alimləri olub. Azərbaycan
xalqı, dünya elmi və mədəniyyəti qarşısında, habelə xalqlar arasında dostluq,
beynəlxalq əlaqələr, insan haqları, demokratiyanın inkişafı sahəsində böyük
xidmətlər göstərmiş bir sıra tarixi şəxsiyyətlər Bakı Dövlət Universitetinin fəxri
doktorları və fəxri qonaqları adına layiq görülüb. Qətər Dövlətinin təhsil və
ali təhsil naziri Məhəmməd bin Əbdülvahid Əl-Həmmadinin də islam dünyasının
tanınmış elm-təhsil təşkilatçılarından biri olduğunu deyən rektor, ona Bakı
Dövlət Universitetinin fəxri qonağı diplomunu təqdim edib.
Sonra qonaq Məhəmməd bin
Əbdülvahid Əl-Həmmadi Bakı Dövlət Universitetində
olmaqdan, universitetin Fəxri qonağı adına layiq görülməkdən məmnunluğunu ifadə
edib, gələcək fəaliyyətində də elm-təhsil sahəsində əlaqələrin
inkişafına dəstək olacağını qeyd edib.
İlahiyyat
fakültəsinin dekanı, akademik Vasim Məmmədəliyevin çıxışından sonra tədbir tələbələrin
çoxsaylı sualları ilə davam edib.
Sonda nümayəndə heyəti universitetin elmi-tədqiqat və tədris
laboratoriyalarında olublar.