Qəsəbələrə şəhər statusu verilsə...
"Hazırda Abşeron
iqtisadi rayonunda olan qəsəbələrin sayı 69-a çatır. Onlardan 59-u Bakı şəhərinin
ətrafında, 8-i Abşeron rayonunda yerləşir, 2-si isə Sumqayıta tabedir".
Bunu Azərbaycan Milli Elmlər
Akademiyasının (AMEA) Coğrafiya İnstitutunun Azərbaycanın əhalisi və sosial
inkişaf coğrafiyası şöbəsinin aparıcı elmi işçisi, coğrafiya elmləri doktoru
Zakir Eminov "Azərbaycanda torpaq idarəçiliyində kadastr və coğrafi
informasiya məlumatlarından istifadənin elmi əsasları" mövzusunda
elmi-praktik seminarda deyib.Onun sözlərinə görə, Bakı şəhəri ətrafında
yerləşən 4 qəsəbədə əhalinin sayı 50 min nəfərdən çoxdur. Elmi işçi qeyd edib
ki, Qaraçuxur qəsəbəsində 84,5 min, Bakıxanov qəsəbəsində 73,7 min, Binə qəsəbəsində
55,3 min, Rəsulzadə qəsəbəsində 52,5 min nəfər əhali yaşayır:
"Regionlarda 14 qəsəbənin əhalisi 20-50 min, 12 qəsəbənin əhalisi
10-20 min nəfər arasındadır”.
Z.Eminov vurğulayıb ki, əhalinin regionlardan olan miqrasiyası,
nizamsız, qeyri-qanuni və plansız məskunlaşma qəsəbələrdə əhalinin həddən artıq
çoxalmasına, məntəqələrin ərazicə genişlənməsinə gətirib çıxarıb: "Bu isə əhalisinin
sayı 10 min nəfərdən çox olan qəsəbələrə şəhər statusu verilməsini gündəmə gətirir.
Belə vəziyyətdə 30-a qədər qəsəbəyə şəhər statusu verilməsi tələb olunur. Qəsəbələrin
şəhər statusu alması onların sonrakı mərhələdə də inkişafına, ərazicə genişlənməsinə
imkan verəcək".
Qəsəbələrə şəhər statusunun veriləcəyi təqdirdə,
bu, iqtisadi baxımdan hansı dəyişikliklərə, nə kimi üstünlüklərə səbəb olacaq,
həmin qəsəbələrin inkişafa necə təsir edəcək? Bu məsələ ilə bağlı ekspertlərin
fikirlərini öyrəndik.
Millət vəkili Aydın Hüseynovdeyir ki, qəsəbələrə şəhər statusun verilməsi artıq bir sıra standartlarının
tətbiqi deməkdir: "Çünki şəhəri qəsəbədən fərqləndirən bəzi özünəməxsus
qaydalar var. Bir var qəsəbə, kənd bir də var şəhər standartları. Şəhərin
qayda-qanunları daha yüksək səviyyədə olur. Müəyyən yeniliklər, üstünlüklər
var. Eyni zamanda, şəhər statusunun verilməsi həmin qəsəbələrdə bəzi qaydaların
dəyişməsinə gətirib çıxarda bilər. Əgər qəsəbəyə şəhər statusu verilirsə, buna
uyğun olaraq onların büdcəsinin formalaşması müəyyənləşdirilir. Digər tərəfdən,
böyük şirkətlərin fəaliyyət göstərməsi, investisiya qoyması ilə müşahidə
edilir. Bu da həmin qəsəbənin iqtisadi baxımdan inkişafına daha səmərəli təsir
göstərir”.
İqtisadçı,
ekspert Vüqar Bayramov statusun verilməsi prosesində qəsəbədə
yaşayan əhalinin sayının çox önəmli olduğunu bildirir. Əgər qəsəbənin infrastrukturu
genişlənirsə, ona şəhər statusunun verilməsi mümkündür: "Bu proses əvvəlki
dövrlərdə də baş vermişdir. Amma postsovet dövründə. İndi isə düşünürəm ki, şəhərlərin və rayonların birləşdirilməsi
həyata keçirilməlidir. Yəni praktik olaraq nə qədər az idarəetmə subyekti olarsa, bu zaman o qədər
çevik idarəetmə olar. Həmçinin bu, nəticə etibarilə vəsaitə qənaət edilməsinə gətirib
çıxarda bilər. Çünki birmənalı şəkildə bu tip subyektlərin sayının az olması,
büdcədən ayrılan vəsaitlərin həcminin azalması deməkdir. Düşünürəm ki, qəsəbələrin
şəhərlərə çevrilməsində qiymətləndirilmənin aparılmasına ehtiyac vardır. Bu
proses ayrılan vəsaitə necə təsir edəcək? Əgər büdcədən ayrılan vəsaitin qənaət
edilməsinə imkan verəcəksə, qəsəbələrə şəhərə statusunun verilməsi məqsədəuyğundur.
Amma əksinə, daha çox büdcə, bu istiqamətdə işlərin aparılmasında daha çox vəsait tələb edəcəksə, bu zaman qəsəbələrin şəhərlərə
çevrilməsini düzgün hesab etmirəm. Bu
baxımdan, güman edirəm ki, qəsəbələrin şəhərə
çevrilməsinin iqtisadi baxımdan əsaslandırılması yaxşı olardı. Yəni bu, büdcəyə,
investisiyanın cəlb edilməsinə, yeni iş yerlərinin yaradılmasına necə təsir
göstərəcək. Əgər statusun dəyişməsi nəticə
etibarilə, bu kimi məsələlərin
inkişafına təkan verəcəksə, bu zaman proses həyata keçirilə bilər. Yox, əgər
heç bir irəliləyiş olmayacaqsa, düşünürəm ki, bu cür status dəyişikliyinə
ehtiyac yoxdur. Elə onun qəsəbə kimi qalması daha yaxşı olar. Ona görə ki, bu
iş iqtisadi və maliyyə əsaslandırması ilə həyata keçirilməlidir”.
Günel Azadə