Qələmlərinə güvənən gələcək jurnalistlər - Reportaj
"Bu sahəyə
marağım 8-9-cu sinifdən yaranıb. Ən böyük arzum "Xəzər Xəbər”də Xanım
Yadigarlının yerinə keçməkdir”.
"5 yaşımdan
bu peşəyə maraq göstərirəm. İndi özümü daha çox şoumen kimi görürəm. Azərbaycan
teleməkanında bir çox dəyişikliklər etmək istəyirəm. Mən də Murad Dadaşovun
yerinə keçmək istəyirəm”.
X.Yadigarlının
yerinə keçmək istəyən Arzu Məmmədli, Murad Dadaşovun "çörəyinə göz tikən” isəƏkbər Mustafayevdir. Bu, təbii ki onların zarafatla etdikləri bir arzudur, amma
həm də o deməkdir ki, iddialıdırlar, hələ ixtisasları üzrə təhsil almağa yeni
başlasalar da.
Ölkə gündəmində olan hadisələri oxumalı
Bakı
Dövlət Universitetində, jurnalistika fakültəsinin birinci kursunun
"Jurnalistikaya giriş” dərsindəyik. Dərsi Akif Rüstəmov tədris edir. O,
auditoriyaya daxil olan kimi, tələbələrlə xoş salamlaşma olur. Cəmi bir neçə
gündür dərsə başlasalar da, müəllimlə tələbələr arasında çox yaxşı ünsiyyət
olduğu görünür. Əslində, jurnalistdə olmalı keyfiyyətlərdən biri də ünsiyyət
qurma bacarığıdır, bu da onlarda çox yaxşıdır.
Müəllim
tələbələrlə qısamüddətli salamlaşmadan sonra dərsin mövzusunu deyib, o istiqamətdə
danışmağa başlayır. Mövzu Azərbaycanda KİV-in yaranması idi. Bu dəfə mühazirə
idi, Akif müəllim mühazirəni oxumamışdan öncə giriş xarakterli söhbət edir. Və
ölkədə günün aktual hadisəsi haqqında soruşur... Bir az susqunluq, bir az
müzakirə, əslində, bir az da çaşqın qalırlar. Bəlkə də hansı cavabı verəcəklərini
bilmirlər.
A.Rüstəmov
onlara gündəmi izləməyi məsləhət gördü: "Sizin ixtisasınız elədir ki, ölkə gündəmində
olan hadisələri oxumalı, məlumatlı olmalısınız. Bu, jurnalist üçün vacib məqamdır.
Bunu ona görə dedim ki, vacibdir, indi buna diqqət etməyə bilərsiniz, hələ indi
başlamısınız, amma gələcək üçün vacibdir.
Jurnalistika ilə bağlı sualları çoxdur
Dərs
haqqında qısa məlumat verir, ötən dərsdə dünyada mətbuatın yaranmasından
danışdıqlarına qısa olaraq toxunduqdan sonra ölkə mətbuatına keçilir. Azərbaycan
mətbuatının ilk dövrləri, bu illərdəki çətinliklər, mətbuat fədailəri, imzaları
bu günə qədər gəlib çatan adamlar yada salınır.
Jurnalistikaya
qəbulda son illər qabiliyyət imtahanı da tətbiq olunur, çünki burda çalışmaq
üçün müəyyən bir bacarıq toplusu olmalıdır. Onlardan biri də sual vermə
bacarığının olmasıdır... Çünki jurnalist oldunsa, məişət səviyyəsində belə
hansısa məsələni dəqiqləşdirmək çox sual vermək adəti yaranır, ya da bəlkə belə
adamlar bu sahəni seçir, bunu tam dəqiq deyə bilmərəm. Amma dərs sırasında
gördüm ki, hətta dərsin mövzusuna aid olmasa belə, tələbələrin jurnalistika ilə
bağlı sualları çoxdur. Sevib gəldikləri peşəni daha yaxından tanımaq, dərinliklərinə
bələd olmaq istəyirlər. Televiziya kanalları, onların xəbər təqdimatındakı fərqlər,
jurnalistlərin hüquqları ilə bağlı suallar verdilər.
"Sakit olun”
30 tələbə,
dərs, suallar varsa, müzakirə gedirsə, bəzən müəllimin "sakit olun” səsi otaqda
eşidilir. Amma dərsin birinci yarısı bitdiyi üçün fasiləyə çıxırlar. Bu arada
vaxtdan istifadə edib Akif müəllimin tələbələrlə bağlı təəssüratlarını öyrəndik.
Deyir ki, gənclərlə işləmək onun üçün xoşdur. Nə az, nə çox düz 50 ildir ki, bu
universitetdədir, illərdir jurnalistlərə, yeni başlayanlara dərs keçib: "Jurnalistikaya
giriş” fənni onlara ixtisasları haqqında məlumat verir. Jurnalistika nə vaxt,
harda yaranıb? İlk qəzet harada çıxıb? Jurnalist sözü necə yaranıb? Qəzet
sözünün mənşəyi hardandır? Bu sualların cavabını öyrədəndən sonra Azərbaycan jurnalistikasının
yaranmasına keçirik. Niyə "Əkinçi”ini milli mətbuat orqanı adlandırırıq, ondan əvvəl
çıxan qəzeti yox? Bu yoldan başlayıb tədricən müstəqillik dövrünün mətbuatına
çıxırıq”.
Bunların içindən 5-6 yaxşı jurnalist də çıxsa,
böyük şeydir
Akif müəllim
bildirdi ki, 30 tələbənin içərisindən 5-6 yaxşı jurnalist yetişsə, bəsdir:
"Artıq illərdir ki, yeni başlayan gəncləri, onların bu sahəyə yanaşmalarını
görürəm. Bəzən yeni başlayanda "mən bu ixtisası istəmirdim, təsadüfən düşmüşəm”i
dilə gətirən, bir müddət təhsil aldıqdan sonra "nə yaxşı ki jurnalistikanı
seçmişəm” deyən olub. Bu qrup hələ indi başlayıb. Bir ildə 50 nəfər tibb
ixtisasını bitirə bilər, amma bu, o demək deyil ki, hamısı həmin sahə üzrə
yaxşı mütəxəssis olacaq. Elə qrup olub ki, 25 tələbədən 15-16-sı bu sahəyə
gedib. Bunların içindən 5-6 yaxşı jurnalist də çıxsa, böyük şeydir. Bunu zaman
göstərəcək”.
Müəllimləri
tələbələrin içərisində dünyagörüşlüsünün az olmadığını deyir: "Mən ara-sıra
sual verməklə onların dünyagörüşünü yoxlayıram. Cavablardan hiss olunur ki, içərilərində
dünyagörüşü yaxşı olanlar var. Qəzet çoxdur, hamısını oxumaq mümkün deyil, amma
heç olmasa gündə bir-iki qəzetə baxmaq mümkündür. Televiziya kanallarını izləsinlər.
Hər birinin xəbəri necə təqdim etdiklərini müqayisə etsinlər. Bunları onlara təlqin
edirdik. Hələ ki yeni başlayıblar, onlardan böyük şeylər gözləmək də olmaz.
Amma zamanla yəqin ki yetişəcəklər”.
Vətənə xeyirli jurnalist olmaq istəyirəm
Sonda isə
jurnalist olmaq üçün bu yola çıxan gənclərin təəssüratlarını öyrəndik. Ürəkləri
dolu, ixtisasları ilə bağlı danışmaq istəkləri çox idi. Ləman Quliyeva 6-cı sinifdən bu ixtisasda oxumağı arzulayırmış:
"Jurnalistikaya qəbul olmaq 6 illik arzum idi. Məni həm də bu sahəyə gəlməyə
motivasiya edən heç tanımadığım bir çox adamlardan "səndən yaxşı jurnalist
olar” cümləsini eşitməyim oldu. Vətənə xeyirli jurnalist olmaq istəyirəm”.
Könül Hüseynova tanınmış jurnalist olmaq arzusundadır: "Çox şadam
ki, bu fakültəyə qəbul olmuşam. Televiziya və radio sahəsində tanınmış jurnalistlərdən
biri olmağı arzu edirəm. Magistr təhsili almaq fikrim var”.
Lətif İsmayılov isə elə tələbə vaxtı jurnalistikada iş həyatına
atılmaq fikrindədir: "Universitet haqqında təəssüratlarım çox gözəldir.
Universiteti bitirəndən sonra da bu istiqamətdə çalışmaq fikrindəyəm. Amma tələbə
vaxtı da işləmək fikrim var”.
Möhtəşəm diktor olmaq istəyirəm
Səkinə Seyidəliyevanın ən böyük arzusu yerinə yetib: "Ən böyük arzum
jurnalist olmaq idi. Keçən il müəllimliyə qəbul oldum, imtina etdim, bu il təzədən
imtahan verdim. Qələmimə və diksiyama güvənirəm. Möhtəşəm diktor olmaq istəyirəm.
Bir də qəzetdə çalışmaq, yazmaq fikrim də var”.
Şəhanə Paşazadə isə anasının yolunu davam etdirəcək: "Anam da
jurnalistdir, onun yolunu davam etdirmək istədim. Universiteti bitirdikdən
sonra təhsilimi Amerikada davam etdirib, karyeramı da orda qurmaq fikrindəyəm.
BBC kimi kanalda çalışmaq istəyim var”.
Qrup nümayəndəsi Aytac Əliyeva televiziya və radio istiqamətinə maraq göstərir.
Şou yox, siyasi gündəm, xarici xəbərlər onu cəlb edir. Onunla yeni başladığı
qrup nümayəndəsi olmağı ilə bağlı da söhbət etdik. Deyir ki, orta məktəbdə də
11 il sinif nümayəndəsi olub. Qrup nümayəndəsi olmağın böyük məsuliyyət
olduğunu deyən Aytac bildirdi ki, çətin və məsuliyyətli işləri xoşlayır. Tələbə
dostları da ona çətinlik yaratmır və buna görə də işi bir az da asanlaşır. Dərslər
indi başladığı üçün Aytacın ilin sonunda da fikirlərini öyrənmək maraqlı
olardı...
Yola
yeni çıxan gələcəyin qələm adamlarına təhsillərində uğurlar, iddialarının real
olmasını arzulayırıq.
Aygün
Asimqızı