Qələmdən süzülən qüdrət - Fotolar
Tədbir yubilyarın yeni çapdan çıxmış kitabının təqdimatı ilə yadda
qalıb
Dekabrın 20-də Bakı Slavyan Universitetində(BSU) Azərbaycan Mətbuat
Şurasının İdarə Heyətinin üzvü, YAP Siyasi Şurasının üzvü, "İki
sahil" qəzetinin baş redaktoru, BSU-nun dosenti, siyasi elmlər üzrə
fəlsəfə doktoru Vüqar Rəhimzadənin "Söz və mətbuat
azadlığı demokratik inkişafın əsası kimi: Azərbaycan təcrübəsi"
monoqrafiyasının təqdimatı və 50 illik yubileyinə həsr olunmuş "Qələmdən
süzülən qüdrət" mövzusunda tədbir keçirilib.
Tədbirdə Milli
Məclisin deputatı, Mətbuat Şurasının sədri Əflatun Amaşov, Milli Məclisin
deputatı, "Yeni Azərbaycan" qəzetinin baş redaktoru Hikmət Babaoğlu,
"Səs Media Qrupu”nun baş redaktoru Bəhruz Quliyev, "Şərq"
qəzetinin baş redaktoru Akif Aşırlı, "Yeni Müsavat" qəzetinin baş
redaktoru Rauf Arifoğlu, Mətbuat Şurasının sədr müavini, Beynəlxalq Avrasiya
Mətbuat Fondunun sədri Umud Rəhimoğlu, BSU-nun Jurnalistika kafedrasının müdiri
Etibar Babayev, Əməkdar jurnalist Şəlalə Həsənova, "Jurnalist Araşdırmaları
Mərkəzi” İctimai Birliyinin sədri Seymur Verdizadə və BSU-nun müəllim və tələbə
heyəti iştirak ediblər.
BSU-nun rektoru, YAP Qadınlar Şurasının sədri Nurlana Əliyeva Vüqar
Rəhimzadəni 50 illik yubileyi münasibətilə təbrik edərək azad sözün və
informasiya təminatının cəmiyyətin bütün təbəqələri üçün aktuallığından söz
açıb, yubilyarın monoqrafiyasının məziyyətlərinə diqqəti çəkib."Gördüyünüz kimi, bu məclisdə ziyalılar, təfəkkür sahibləri,
ölkəmizin jurnalistika ordusunun ən
görkəmli nümayəndələri iştirak edirlər. Jurnalitika olduqca geniş sahədir. Burada
çalışan qələm sahibləri bütün cəmiyyətin fikrini ədalətli, qərəzsiz şəkildə ifadə
edirlər. Bu gün təqdim olunan monoqrafiya jurnalistika üçün böyük töhfədir. Biz
BSU-nun kollektivi adından Vüqar müəllimi təbrik edirik və ona fəaliyyətində
uğurlar arzulayırıq", - deyən N.Əliyeva V.Rəhimzadəyə BSU-nun kollektivi
adından xatirə hadiyyəsini və gül dəstəsini, həmçinin təşəkkürnaməni təqdim
edib.
Əməkdar jurnalist Şəlalə Həsənova Vüqar Rəhimzadənin redaktoru olduğu
"İki sahil” qəzetinin Azərbaycan mətbuatının inkişafındakı rolundan danışıb:
"Vüqar Rəhimzadə müstəqil Azərbaycanın tarixi salnaməsinin yaradıcılarından
biridir. Bu işdə baş redaktoru olduğu "İki sahil” qəzetinin müstəsna rolu var.
Biz Vüqar Rəhimzadəni həm də ulu öndər Heydər Əliyevə "Azərbaycan sizin
yolunuzu gözləyir” müraciətini imzalayan məşhur "91-lər”dən biri kimi tanıyırıq.
"İki sahil” qəzeti 1991-ci ildə, ölkəmiz üçün çətin və ağır dönəmdə yaradıldı.
O vaxtlar Vüqar müəllim təzyiqlərə və çətinliklərə baxmayaraq, rəhbərlik etdiyi
qəzetin səhifələrində Azərbaycanı düşdüyü ağır durumdan çıxara biləcək yeganə
şəxsin məhz Heydər Əliyev olduğunu xüsusi vurğulayırdı. Təsadüfi deyil ki, Yeni
Azərbaycan Partiyasının yaradılmasının ikinci ildönümü münasibətilə keçirilmiş
Ümumrespublika Müşavirəsində ulu öndər Heydər Əliyev həqiqətələrin təbliğində "İki sahil” qəzetinin rolunu
olduqca yüksək qiymətləndirmişdir. O
vaxtdan "İki sahil” qəzeti öz nüfuzunu qoruyub saxlayır, jurnalistikanın
dəqiqlik, obyektivlik, qərəzsizlik kimi təməl prinsiplərinə sadiqliyini nümayiş
etdirir”.
Milli Məclisin deputatı, "Yeni Azərbaycan” qəzetinin baş redaktoru Hikmət
Babaoğlu Azərbaycan mətbuatının ən incə məqamlarından bəhs edən monoqrafiyanın
qiymətli əsər olduğunu söyləyib:"50
illik yubiley həm də bir hesabatdır. Vüqar müəllim bu gün bizlərə fundamental
əsaslı, olduqca önəmli kitab təqdim edir. Düşünürəm ki, bu nəşr söz və mətbuat
azadlığına, eləcə də demokratiyanın inkişafına xidmət edən fundamental əsərdir.
Söz və mətbuat azadlığı dedikdə, bu, yalnız media sahəsində deyil, eləcə də,
cəmiyyətdə azad təfəkkür deməkdir. Azadlıq, ümumiyyətlə, ruhun
substansiyasıdır. İnsan övladı yarandığı gündən azadlığa meylli olub. Bu, fərdi
hadisə deyil, cəmiyyətin məhsuludur. Monoqrafiyaya rəy yazan biri kimi, bu
əsəri diqqətlə oxumuşam. Düşünürəm ki, monoqrafiya informasiyalı cəmiyyət quruculuğuna
dəstək baxımından da faydalıdır".
Mətbuat Şurasının sədr müavini, Beynəlxalq Avrasiya Mətbuat Fondunun
rəhbəri Umud Rəhimoğlu bildirib ki, Vüqar Rəhimzadənin təkcə "İki sahil”
qəzetindəki fəaliyyətini xatırlatmaq kifayətdir ki, onun Azərbaycan
jurnalistikasının inkişafı üçün gördüyü işlər göz önündə canlansın: "Gənc
yaşlarından mətbuatda olan Vüqar müəllim cəsarətli yazılarla çıxış edirdi. Bu
gün də rəhbəri olduğu "İki sahil” qəzeti eyni missiyanı yerinə yetirir.
Azərbyacan jurnalistikasının təməl prinsiplərinə söykənərək həm mətbuatın, həm
də azad sözün və demokratiyanın inkişafına xidmət edir. Düşünürəm ki, bu
monoqrafiya xüsusilə gənc jurnalistlər üçün əsl qaynaq olacaq.
Mətbuat Şurasının sədr müavini, Jurnalistlərin Həmkarlar İttifaqının
rəhbəri Müşfiq Ələsgərli Vüqar Rəhimzadəyə 50 illik yubileyi və təqdimatı
keçirilən monoqrafiyanın işıq üzü görməsi münasibətilə təbriklərini çatdıraraq
bunları deyib:"Bu kitabda
xeyli sayda mənbələrdən istifadə edilib. Bu qədər mənbəyə əsaslanan bir
monoqrafiyanı qələmə alıb dərc etmək elə də asan başa gəlməyib. Amma
mündərəcatdan görünür ki, monoqrafiya önəmli məsələlərin həllini ortaya qoyur,
Qərb mətbuatı ilə müqayisəli təhlillər aparılır. Ümid edirəm ki, bu nəşr sistemli
şəkildə mətbuata öz töhfəsini verəcək"
"Səs Media
Qrupu”nun baş redaktoru Bəhruz Quliyev çıxışında V.Rəhimzadəni peşə
prinsiplərinə sadiq istedadlı həmkar, Yeni Azərbaycan Partiyasının siyasi və
ideoloji kursunun yeridilməsində fəal ictimai xadim kimi xarakterizə edib.
Yubilyarın elmi fəaliyyətinin məziyyətlərindən danışan B.Quliyev "Söz və
mətbuat azadlığı demokratik inkişafın əsası kimi: Azərbaycan təcrübəsi"
monoqrafiyasının istər dərs vəsaiti, istərsə də bu sahənin araşdırılmasındakı
mənbə olaraq dəyərindən söz açıb.
"Şərq” qəzetinin baş redaktoru Akif Aşırlı bildirib ki, "İki sahil”
qəzeti 1991-ci ildən bu günə qədər aktiv fəailiyyətini davam etdirir."Vüqar müəllim ömrünü jurnalistikaya, elmə həsr edən şəxslərdən
biridir. Bu elmi əsər də onun parlaq yaradıcılığının bariz nümunəsidir. Bu gün
"İki sahil" qəzetinin kollektivinin nümayəndələri də buradadır. Arzu
edirəm ki, gələn təqdimatda "İki sahil" televiziyası iştirak etsin.
50 yaş hələ qocalıq hesab olunmur. Həyat hələ bundan sonra başlayır", -
deyə o vurğulayıb.
"Yeni Müsavat” qəzetinin baş redaktoru Rauf Arifoğlu Vüqar Rəhimzadəni
dəyərli elmi tədqiqatı münasibətilə təbrik edib:"Vüqar Rəhimzadə mətbuatda dəyərli insanlardan, gənclərə dəstək
olan qələm sahiblərindən biridir. Ölkədə azad söz, azad mətbuat,
jurnalistikanın təbliğatçılarındandır. Biz əks cəbhələrdə dayanmışıq. Ancaq
dövlət naminə bir araya gəlməyi bacarmışıq. Dəfələrlə əks mövqelərdə qarşı-qarşıya
gələndə Vüqar müəllimin yüksək intellektinin və nitq mədəniyyətinin,
opponentinə göstərdiyi hörmətin şahidi olmuşam. 50 illik yubileyini qeyd edən
həmkarımıza yeni yaradıcılıq uğurları arzulayıram".
"Jurnalist
Araşdırmaları Mərkəzi” İctimai Birliyinin sədri Seymur Verdizadə özünün hələ
məktəbli olduğu illərdə "İki sahil” qəzeti ilə əməkdaşlıq etdiyini xatırladıb.
V.Rəhimzadəni hər zaman gənclərə dəstək olduğunu vurğulayıb. O, eyni zamanda
bildirib ki, V.Rəhimzadə gərgin əməyi və zəhməti hesabına jurnalistikada yüksək
pilləyə çatıb. Həyatının 50 ili ərzində qazandıqları məhz bu zəhmət və əməyin
mükafatıdır.
Milli Məclisin deputatı, Mətbuat Şurasının sədri Əflatun Amaşov Vüqar
Rəhimzadəni təbrik edərək, yubilyarın medianın inkişafına verdiyi töhfələrdən
danışıb. O bildirib ki, Vüqar
Rəhimzadə Mətbuat Şurası yaranandan bu qurumun üzvüdür. Şuranın işinin ağırlığı
onun üzərinə düşür. İstər şikayətlərin araşdırılmasında, istərsə də qurumun
müxtəlif tədbirlərində yaxından iştirakı ilə fərqlənir. "Jurnalistika elə bir
sahədir ki, onu başqa heç bir peşə ilə müayisə etmək mümkün deyil. Bir insanın
aldığı informasiya onun həyatında əhəmiyyətli rol oynayır. Təsəvvür edin, bir
gün internet, televiziya, mətbuat orqanları olmasa, cəmiyyətin həyatında hansı
dəyişikliklər baş verər. Jurnalistika Azərbaycanın daxili inkişafında olduqca
mühüm rol oynayır. Vüqar Rəhimzadə monoqrafiyasında bu iki məqamı ustalıqla
birləşdirə bilib. Düşünürəm ki, uzun illər bu sahədə təcrübəsi olan bir insanın
ərsəyə gətirdiyi monoqrafiya Azərbaycan mediası üçün son dərəcə vacib və
faydalıdır. Onu da deməliyəm ki, yubilyar əsl jurnalist olmaqla yanaşı qayğıkeş
və səmimi dostdur, gözəl ailə başçısıdır", - deyən Ə.Amaşov medianın inkişafındakı xidmətlərinə və 50 illik yubileyinə görə V.Rəhimzadəni
rəhbərlik etdiyi qurumun diplomu ilə təltif edib.
Sonda çıxış edən
V.Rəhimzadə yaradıcılığına verilən dəyərə və xoş sözlərə görə toplantı
iştirakçılarına təşəkkürünü bildirib.