Qəlbiniz işıqlı, gözünüz nurlu, qələminiz iti olsun!
Azərbaycan mətbuatının zəngin tarixində xüsusi yeri olan və artıq
üçüncü əsrdir ki, oxucuların görüşünə gələn "Kaspi” qəzeti, məlum olduğu kimi,
hələ XIX əsrin 80-ci illərində neft bumu yaşayan qədim Bakıdarus dilində çıxmağa başlayıb. O dövrün
mürgülü ətalətindən qurtularaq müasir sənaye şəhərinə, demək həm də mədəniyyət
mərkəzinə çevrilən küləkli şəhərin həyatına mütərəqqi ideyalar gətirən
nadir informasiya vasitələrindən biri də
bu qəzet idi.
1881-ci
ildə Çar imperiyasında nəşrə başlayaraq, Sovet hakimiyyəti gələnədək on
mindən çox nömrəsi çıxan qəzetin nəşrini hələ 1897-ci ildə böyük millət fədaisi
Həsən bəy Zərdabinin tövsiyəsi ilə qeyrətli xeyriyyəçi Hacı Zeynalabdin Tağıyev
öz üzərinə götürmüşdü. O, nəşr işləri
üçün bütün lazımi şəraiti yaratmış, ilk dəfə qəzetin redaktorluğunu milli kadra - Əlimərdan bəy
Topçubaşova tapşırmışdı. Rus dilində çıxmasına baxmayaraq, öz ətrafında Azərbaycan-türk
ziyalılarını toplayan "Kaspi”nin səhifələrində Həsən bəy Zərdabi, Əlibəy
Hüseynzadə, Sultan Məcid Qənizadə, Məhəmməd ağa Şahtaxtlı, Firudin bəy Köçərli,
Mahmudbəy Mahmudbəyov, Məhəmməd Tağı Sidqi kimi görkəmli maarifçi ziyalıların,
şairlərin, publisistlərin, pedaqoqların imzası görünürdü.
Sovet imperiyası çökdükdən sonra milli dövlətçiliyini bərpa edən Azərbaycanda
mətbuat tariximizin dəyərli yadigarı olan "Kaspi” qəzeti də yenidən işıq üzü
gördü. Mətbuat tariximizin bilicisi, tanınmış şair, araşdırmaçı-yazar, əməkdar
jurnalist, fəlsəfə doktoru Sona xanım Vəliyevanın təsisçiliyi ilə ikinci ömrünü yaşamağa başlayan, qəzet bolluğunda öz
fərqli yolunu qoruyub saxlayan "Kaspi” indi ən mötəbər çap məhsullarındandır.
Sabit ictimai-siyasi mövqeyi olan, milli mədəniyyətə və milli dövlətçiliyə sədaqəti
ilə seçilən bu nüfuzlu qəzet müasir
dünya jurnalistikasının bütün qabaqcıl tələblərinə cavab verir.
Xüsusi qeyd etmək yerinə düşərdi ki, təsisçi xanımın mətbuat sahəsinə
dərin bələdliyinin daha bir əlaməti müasir dövrlə ayaqlaşan qədim "Kaspi”nin
çap versiyası ilə yanaşı, onun çox zəngin və maraqlı internet saytının da
uğurla fəaliyyət göstərməsidir. Üç əsrdir yol gələrək gündəlik ictimai-siyasi qəzet
kimi ömrünü yaşayan "Kaspi”nin internet portalındakı siyasət, cəmiyyət,
iqtisadiyyat, mədəniyyət, idman bölmələrinə
daxil olan hər bir oxucu maraqlandığı sahəyə dair bol material tapa bilər. Hər
gün yeni sayı həm çap, həm də PDF formatda oxucularla görüşə gələn qəzetin
elektron versiyasında eyni zamanda tarixi "Kaspi”nin və Rusiya Müsəlmanlarının
qəzetinin tam arxivi mövcuddur. Zəngin illüstrasiyalarla oxucuya daha da
yaxınlaşdırılan və oxunuşu xeyli asanlaşan qəzetin redaksiyasında müxtəlif
istiqamətli əlavələr də hazırlanır: "Ədəbiyyat”, "Gənclik”, "Teatr” kimi belə əlavələr
oxucuları yeni, operativ, maraqlı informasiya ilə dolğun yazılarla özünə cəlb
edir. Burada həyatımızın müxtəlif sahələrinə dair və cəmiyyətin müxtəlif təbəqələrinə
məxsus insanlarla səmimi söhbətlər, aktual müsahibələr, portret-oçerklər,
araşdırma yazıları maraqla oxunur. Bu yazıların arxasında istedadlı qələm
sahiblərinin çalışdığı böyük bir yaradıcı kollektivin vicdanlı əməyinin
dayandığı, qəzeti bacarıqla idarə edərək,
doğru yola istiqamətləndirən qayğıkeş bir rəhbərin zövqü, səriştəsi, yüksək
intellekti, mədəniyyəti, ən başlıcası - vətənə məhəbbəti, xalqa təmənnasız xidməti,
millətin inkişafı naminə çalışmaq niyyəti aydın görünür. Elə yaradıcı
kollektivdə hökm sürən bu uca amallar səbəbindəndir ki, müasir "Kaspi” zəngin
klassik irsimizi yaşatmaqla, şərəfli keçmişimizdən yadigar qalan bədii-publisistik
əsərləri günümüzə gətirib tanıtmaqla yanaşı, özü də milləti millət kimi
yetişdirmək, inkişaf etdirmək, mədəni tərəqqiyə qovuşdurmaq üçün vaxtilə ömrünü
fəda etmiş dahilərimizin, qədim-qaim ulularımızın yolu ilə gedir. Müasir dövrdə
elmin, mədəniyyətin, maarifin, təhsilin cəmiyyət daxilində daha geniş yayılıb,
daha dərin qatlara nüfuz etməsi naminə səmərəli fəaliyyət göstərir. Belə ki,
Kaspi Təhsil Mərkəzinin mövcudluğu, "Kaspi”nin nəşrləri silsiləsindən çoxlu
sayda kitabların, arxiv materiallarından ibarət topluların, dahi ədiblərimizin
həyat-yaradıcılığına dair elmi-tədqiqat əsərlərinin çapı və təqdimatı məhz bu
amala sədaqətdən irəli gəlir.
İcazənizlə, onu da deyim ki, mənim də yaradıcı ömrümdə "Kaspi” qəzetinin
özəl yeri var. Bu qəzetdə haqqımda yazılar çıxıb, zəhmətkeş və məhsuldar
jurnalist Təranə Məhərrəmova ilə maraqlı söhbətlərimiz, müsahibələrimiz dərc
olunub, müxtəlif ədəbi-bədii, publisistik məqalələrim işıq üzü görüb. Və əlbəttə
ki, mənim üçün ən yaddaqalan hadisələrdən biri 2013-cü ildə "Kaspi” qəzetinin
sürprizi olub. O vaxt Kaspi Təhsil Mərkəzi və qəzet Xalq şairi Məmməd Arazın 80
illiyi ilə əlaqədar müsabiqə elan etmişdi və mən "Ağır daşlar altında” patetik
fantaziya üslublu yazımı müsabiqəyə göndərmişdim. Təbii ki, yalnız mənəviyyat
qanunları ilə yaşayıb da uca amallar meyarına tapınan hər bir yaradıcı insan
üçün onun əməyinə verilən qiymət həm zəruridir, həm də əhəmiyyətli. Sözügedən
müsabiqədə "Ağır daşlar altında” yazısının qalib elan olunması mənim
yaradıcılıq bioqrafiyam üçün həqiqətən gözlənilməz sürpriz, çox əziz və mühüm
hadisə oldu. Yazı həm qəzetdə çap olundu, həm qalib kimi mükafatlandırıldı və həm
də yekunda toplu şəklində nəşr olunan
"Haqqın var yaşamağa” kitabına salındı. Üstəlik, kitabın müəllifi və redaktoru
Sona xanım Vəliyevanın qalib əsərlər haqqında ön sözdə əsirgəmədiyi səmimi təqdir
cümlələrini də müsabiqədən əlavə, bir dəyər kimi minnətdarlıqla qəbul etdim. Həmin
ön sözü oxuduqca müsabiqəyə göndərilən hər bir məqaləyə necə həssaslıqla, diqqətlə,
qayğı ilə yanaşıldığı hiss olunurdu…
Budur,
artıq 135 ildir ki, "Kaspi” Azərbaycan mədəniyyətinə xidmət edir. Üç əsri keçib
gələcəyə yol gedən "Kaspi”yə və saf amallarla yaşayıb qəzeti yaşadan,
uğurlarına dəstək verən, səhifələrində səliqə-sahman yaradan bütün dəyərli
alim, yazıçı, şair, publisist, jurnalist
dostlara yubiley təbrikimi çatdırır, xoş
niyyətimi yetirir, Uca Tanrıdan uğurlar diləyirəm.
Bu vətən, bu xalq, bu dövlət naminə
çalışan qəlbiniz işıqlı, gözünüz nurlu,
qələminiz iti olsun!
Akif
ƏLİ,
Nazirlər
KabinetininMətbuat
xidmətinin rəhbəri,
Yazıçı-publisist,Fəlsəfə
doktoru,Əməkdar
jurnalist.