“Qəhrəman heç bir fiziki güc tətbiq etmədən intiqamını almış olur” – Onun film seçimi
Filmlərlə bağlı hər kəsin öz maraq
dairəsi var. Kimi dram sevir, kimi fantastika, kimi komediya və s. Amma
janrından asılı olmayaraq, çoxumuz başqalarının məsləhət gördüyü filmlərə nəzər
salırıq. Bu dəfə sizə Nəqliyyat, Rabitə
və Yüksək Texnologiyalar Nazirliyinin Dövlət Avtomobil Nəqliyyatı Xidmətinin mətbuat
xidmətinin rəhbəri Nuridə Allahyarovanın məsləhət gördüyü üç filmi təqdim
edirik.
Riçard Girin baş rolda oynadığı "Qırmızı
künc" filmi onun ən sevdikləri sırasında ilk yerdədir: "Filmdə amerikalı
bir iş adamının Çində bir sövdələşmə zamanı yerli iş adamları tərəfindən insan
öldürmə ittihamı ilə şərlənməsindən sonra həbsxanada keçən həyatı və bəraəti
üçün apardığı ölüm-dirim savaşı əks olunub. İstər ssenari, istərsə də mükəmməl
aktyor oyunu filmə ayrı bir rəng qatır”.
Siyahıda ikinci film yenə Amerika kinomatoqrafçılarının
çəkdiyi "Sözlər"dir: "Fimdə marağıma səbəb olan əsas məsələ süjetlərin
keçidləridir. Bir-biri ilə əlaqəsi olan müxtəlif hekayələr üzərində qurulub.
Film həm yüksək aktyor oyunu, həm də müxtəlif dövrlərdə baş verən hekayələri,
tutulmayan vədləri, sevgini, uğursuzluqları və bütün yalanların bir gün ifşa
olunmaq kimi ehtimalını izləyiciyə aşılayır”.
Onun 3-cü seçimi isə "Boyalı örtük" filmioldu: "Film 20-ci əsrin 20-ci illərində Çində yaşayan bir ingilis cütlüyünün
başına gələn hadisələrdən bəhs edir. Kitti, Volterin sakit təbiətli biri
olmağından istifadə edərək, ona xəyanət edir. Xəyanətdən xəbərdar olan Volter,
həkim olduğunu əsas gətirərək, arvadını da götürüb ona cəza vermək üçün Çinin vəba
xəstəliyi yayılan ucqar kəndinə gedir. Kənddə ölüm-dirim mübarizəsi başlayır. Hamının
sağ qalmaq üçün yeganə ümidi olan baş qəhrəman da vəbaya yoluxur və bütün ümidlər
tükənir. Kitti həyat yoldaşını bu ekstremal dəhşətdə sevməyə başlayır. Sonda ən
böyük cəzası, ərinə dəlicəsinə vurulduqdan sonra onu vəbadan itirməsi olur. Beləliklə,
qəhrəman heç bir fiziki güc tətbiq etmədən intiqamını almış olur - öz həyatı
bahasına”.
Ümumiyyətlə isə yerli kinomotoqraflardan Rasim Ocaqovun bütün filmlərini sevirəm.
Aygün Asimqızı