“Qarabağ”ın rəqibinin vitse-prezidenti təxribatdan danışdı
"Qarabağ”ın Avropa Liqasındakı rəqibi "Vorskla”nın
azarkeşlərinin Ukrayna çempionatında "Desna” ilə keçirilən oyuna üzərində
Hitlerin şəkli olan köynəklə gəldikləri barədə məlumat vermişdik.
Kaspi.az xəbər verir ki, "Vorskla”nın vitse-prezidenti
Oleq Lısak bu məsələ ilə bağlı açıqlama verib. O, bu hərəkətin kluba qarşı təxribat
olduğunu vurğulayıb:
"Hesab edirik ki, bu, bizə qarşı təxribatdı və
hüquq-mühafizə orqanlarına müraciət edəcəyik. Həmin oyunda tirbunada olan
azarkeşləri iki hissəyə bölmək olardı: Poltavadan təşkilatlanaraq gələnlər və fərdi
qaydada bilet alanlar.
Bildiyimizə görə, həmin azarkeşlər Poltavadan gələn
qrupdan olmayıblar. Başa düşmürəm, Avropa Liqasındakı oyun ərəfəsində bu hərəkəti
edənlər kimlərdir və məqsədləri nədir?
Biz bu məsələyə hüquq-mühafizə orqanlarını
qoşacağıq. Qoy onlar araşdırsınlar. Bundan sonra stadiona gələn azarkeşləri
klub əməkdaşları, stüardlar da yoxlayacaq.
Hesab edirik ki, bu hadisə bizə qarşı təxribatdır.
Bununla bağlı azarkeşlərə də müraciət edəcəyik”.