Bakı 20°C
“Qarabağ”ın rəqibi: “Şəfa”nı darmadağın edən “Olimpiya”
Dünən UEFA Çempionlar Liqasının ilk təsnifat mərhələsinin püşkü
atıldı.
Kaspi.az xəbər verir ki, Azərbaycan çempionu "Qarabağ” 1-ci təsnifat
mərhələsində Sloveniyanın "Olimpiya” klubu ilə mübarizə aparacaq. Ölkənin
paytaxtı Lyublyananı təmsil edən bu klub 1911-ci ildə yaradılıb. Lakin 2004-cü
ildə dağıldığı üçün 2005-də yenidən formalaşdırılıb.
Komanda ev oyunlarını elə paytaxtdakı "Stoyiçe” stadionunda keçirir.
Arenanın azarkeş tutumu 16 038 nəfərdi.
Klubun prezidenti Milan Mandariç, baş məşqçisi isə İliya Stoliçadı.
O, iyunun 11-də komandaya baş məşqçi təyin olunub. Halbuki, "Olimpiya” 2017/18
mövsümünü İqor Bişçanın rəhbərliyi altında keçirib.
"Olimpiya” Sloveniya çempionatının son mövsümündə 80 xalla çempion
olub. Maraqlıdır ki, ikinci yeri tutan "Maribor” da mövsümü 80 xalla başa
vurub. Lakin şəxsi oyunlardakı üstünlük "Olimpiya”da olduğundan, məhz Lyublyana
təmsilçisi çempion elan olunub. Keçirdiyi 36 oyunda 23 qələbə qazanan komanda
11 heç-heçəyə razılaşıb, cəmi 2 dəfə məğlub olub. 61 qol vuran "Qarabağ”ın
rəqibi öz qapısından cəmi 17 top buraxıb. Lyublayana təmsilçisi çempion olmaqla
kifayətlənməyib. Belə ki, ölkə kubokunun da qalibi olan paytaxt klubu "qızıl
dubl”a imza atıb.
Qeyd edək ki, "Olimpiya” 2-ci dəfə Azərbaycan təmsilçisinə
avrokuboklarda rəqib olub. İlk duel 17 il öncə olub. Bu, 2001/02 mövsümündə
UEFA Kubokunun ilk təsnifat mərhələsində "Şəfa" ilə görüşlərdə
reallaşıb. Onda Azərbaycan kubokunun qalibi olan Əsgər Abdullayevin komandası
hər iki matçda böyük hesabla uduzub - Lyublyanada 0:4, Bakıda 0:3. Özü də
"Şəfa" stadionunun (hazırkı "İnter Arena") rəsmi açılışı bu
qarşılaşma ilə olub. "Qarabağ"ın məşqçisi olan Elçin Rəhmanov həmin
vaxt "Şəfa"da oynayıb.
"Olimpiya” 6 dəfə (1991/92, 1992/93, 1993/94, 1994/95, 2015/16,
2017/18) Sloveniya çempionu olub, 5 dəfə ölkə kubokunun (1993, 1996, 2000,
2003, 2018), bir dəfə isə superkubokun (1995) qalibi adını qazanıb.
Qeyd edək ki, "Qarabağ”ın növbəti mərhələdəki potensial rəqibi də
məlumdur. "Köhlən atlar” "Olimpiya” səddini adlasalar, ÇL-in növbəti
mərhələsində "Kukesi" (Albaniya) - "Valetta" (Malta)
duelində mərhələ adlayan komanda ilə qarşılaşacaq.
"Qarabağ” məğlub olacağı təqdirdə isə mübarizəni Avropa Liqasında
davam etdirəcək. Orda isə rəqib "Ludoqorets” (Bolqarıstan) – "Kruzeyders”
(Şimali İrlandiya) cütün qalibi olacaq.
