Qara dənizdə əməkdaşlıq mümkündürmü?
Qara Dəniz İqtisadi Əməkdaşlıq Təşkilatının (QDİƏT) 25 illiyi ilə
bağlı İstanbulda baş tutan sammit Türkiyənin xarici siyasətində əhəmiyyətli
sıçrayış, mühüm siyasi addımı kimi dəyərləndirilir. Sammitdə Türkiyə
prezidentinin çıxışı, onun Ermənistan nümayəndəsinə verdiyi cavab ciddi
rezonans doğurub. Lakin məsələ ondadır ki, Qara dəniz hövzəsi ölkələri bu 25 il
ərzində çoxsaylı problemlərlə üzləşib. Türkiyənin ölkəmizdəki keçmiş səfiri
Əhməd Ünal Çevikköz "Hürriyət” qəzetində dərc edilən məqaləsində QDİƏT-in
üzləşdiyi maneələri açıqlamağa çalışıb. Müəllif yazır ki, Türkiyənin qonşuluqda
yerləşən dövlətlərə qarşı diqqət və marağı XXI əsrin əvvəllərində deyil, XX
əsrin sonlarında yaranıb. Bu siyasət isə regionda sülh və əmin-amanlığın
yaranmasına yönəlib. Diplomat hesab edir ki, SSRİ-nin dağılması buna tələbatı
gücləndirmiş olub. "Son 25 il ərzində beynəlxalq münasibətlər sistemində
müəyyən hadisələr baş verib - SSRİ-nin dağılması, ABŞ-da 2001-ci il sentyabr
hadisələri, ərəb üsyanları və s.
İlk növbədə Şərq-Qərb münasibətlərinin
dinamikası və strukturu dəyişdi. Vaxtilə Varşava Müqaviləsinin üzvü olan
dövlətlər Rusiya istisna olmaqla, artıq NATO üzvləridir”, - deyə o bildirib. Onun
qənaətincə, bütün bunlar belə bir qənaətə gəlməyə əsas verdi ki, Rusiya "soyuq
müharibə”ni uduzub. Lakin son 25 il ərzində Rusiya özünə gəlməyə müvəffəq olub
və artıq beynəlxalq münasibətlər sistemində sözünü deməyə başlayıb. "Bu dönüş
tək sülh metodları ilə baş vermir. Türkiyə isə 25 il bundan əvvəl yaşanan
hadisələrin lazımı nəticə və uğur verməməsindən kədərlidir. QDİƏT 1992-ci ildə
təsis ediləndə öz qarşısına bütün üzv dövlətlərin hüquq və azadlıqlarının
qorunmasını, bərabərlik və sülhün qorunub saxlanmasını qoymuşdu. Türkiyə o
zaman hesab edirdi ki, Qara dəniz regionunu Qafqazdan ayırmaq mümkün deyil və
bu səbəbdən də Gürcüstanla yanaşı, Ermənistanı da bu quruma dəvət etdi. Bundan
əlavə, Türkiyə hesab edirdi ki, QDİƏT gələcəkdə tam şəkildə Avropa İttifaqı və
NATO-ya doğru inteqrasiya edəcək. Buna görə də Qara dəniz regionuna daxil olmayan
Yunanıstan da ora dəvət edildi”, - deyə türk ekspert vurğulayıb. Onun
qənaətincə, QDİƏT siyasi, təhlükəsizlik üzrə təşkilat deyil və yarandığı gündən
üzv-dövlətlər arasında işgüzar, ticarət münasibətlərinin qurulmasında maraqlı
olduğunu bəyan edib. Bütün bunlarla yanaşı, baş verən siyasi hadisələr QDİƏT-lə
bağlı lazımı nəticəni əldə etməyə mane olur, ölkələrinin yaxınlaşması yolunda
çətinliklər yaradır.
"Region həllini tapmayan problemlər içində çabalamaqdadır.
Moldovada Dnestyanı problem, Ukrayna və Rusiya arasında müharibə, Krımın işğalı
- bütün bunlar problemin bir hissəsidir. Qafqazda isə əsas problem Dağlıq
Qarabağ münaqişəsidir. Azərbaycan ərazləri Ermənistan tərəfindən işğal edilib.
Analoji formada Gürcüstanın ərazi bütövlüyü pozulub. Abxaziya və Cənubi Osetiya
öz müstəqilliyini elan edib. Belə bir şəraitdə qarşısına çoxtərəfli əməkdaşlığı
qoyan QDİƏT üçün çətindir. Bütün bu gərginliklərin və maneələrin səbəbkarı
Rusiyadır. Belə çıxır ki, Qara dənizdə əməkdaşlığa maneə olan və bütün həllini
tapmayan problemlərin səbəbkarı Rusiyadır. Heç kim deyə bilməz ki, bu nəticə
səhvdir. Lakin müəyyən şərtlərin bütün bu hadisələrə şərait yaratdığı
nöqteyi-nəzərini qulaqardına vurmaq olmaz”.
Müəllif sonda belə bir qənaətə gəlir ki, bütün bu problemlərə
baxmayaraq, QDİƏT unikallığı ilə seçilən regional qurumdur: "Və onun çərçivəsində
bütün üzv dövlətlər Rusiya ilə bir stol arxasında əyləşə bilərlər. Belə olan
halda hesab etmək lazımdır ki, problemlərin həllinin başlıca faktor bu birliyin
daxilindədir”. Diplomatın fikrincə, Rusiyanın apardığı siyasət həqiqətən də
Qara dənizdə qütbləşmə və gərginliyi artırmış olub. "Lakin QDİƏT-in yaratdığı
əməkdaşlıq imkanları daxilində bu gərginliyi aradan qaldırmaq üçün əsas
yaratmaq mümkündür. Belə ki, Qara dənizdə əsas söz sahibi olan Türkiyə və
Rusiya bir sıra məsələlərlə bağlı razılığa gələ bilməsələr də, onları
bir-birinə bağlayan ortaq məxrəc var. Bu, Montre Konvensiyası və boğazlar
rejimidir. Rusiyanı əməkdaşlığa doğru istiqamətləndirmək münaqişəli vəziyyət
yaratmaqla deyil, kooperativ yanaşma yolu ilə cəlb etmək gərəkdir”, - deyə türk
politoloq fikrini tamamlayıb.
Azər