20 Yanvar - milli müstəqillik, azadlıq uğrunda
mübarizə və yenilməz iradənin rəmzidir
1990-cı il yanvarın 20-si Azərbaycanın müasir
tarixinə ən faciəli günlərdən biri, eyni zamanda, xalqımızın qəhrəmanlıq səhifəsi
kimi daxil olub, müstəqillik, azadlıq uğrunda mübarizəsinin və yenilməz
iradənin rəmzinə çevrilib. Keçmiş SSRİ rəhbərliyinin Azərbaycana qarşı qərəzli,
ermənipərəst siyasətinə, respublikanın o zamankı rəhbərliyinin xəyanətkar
mövqeyinə etiraz əlaməti olaraq ayağa qalxmış geniş xalq kütlələrinin üzərinə
sovet ordusunun iri hərbi birləşmələrinin yeridilməsi Azərbaycanda, xüsusilə
Bakıda misli görünməmiş faciəyə gətirib çıxardı, böyük itkilərlə, günahsız
insanların ölümü ilə nəticələndi. Üstündən 30 il keçsə də, hər il bu əlamətdar
günlə bağlı dünya mediası silsilə yazılar, vandalizmi pisləyən materiallar dərc
edir. Qardaş Türkiyənin dünyaca məşhur nəşrləri hər il olduğu kimi, bu il də
tariximizin qan yaddaşı ilə bağlı silsilə materiallar dərc edir. "Milliyet”də dərc olunan "Kanlı Ocak’ın 30. yıl dönümü” başlıqlı
məqalədə bildirilir ki, "keçmiş SSRİ silahlı qüvvələri tərəfindən 20 Yanvarda
günahsız azərbaycanlılara qarşı edilən vəhşiliklər bəşər tarixində qara bir iz
olaraq yer tapdı. Milli müstəqillik və ərazi bütövlüyü uğrunda küçələrə çıxan
insanlara qarşı silahlı hücum zamanı yüzlərlə azərbaycanlı şəhid oldu”. Əlavə
edilir ki, bütün dünya səhərini 20 Yanvar hadisəsinin xəbərləri ilə açdı. Sovet
ordusunun Bakıdakı və Azərbaycanın digər bölgələrindəki vəhşiliyi digər
ölkələrdə də reaksiyalara səbəb oldu. Xüsusilə dost və qardaş Türkiyə yaşananlara
biganə qalmadı. Dəstək mitinqləri ölkənin demək olar ki, bütün şəhərlərində,
xüsusən də İstanbul, İzmir, Kayseri və Qarsda edildi”. Sonda bildirilir ki, "bu
gün 20 Yanvar hadisələrinin 30-cu ildönümünü geridə qoyuruq. Müstəqillik
uğrunda yüzlərlə və minlərlə şəhidi olan Azərbaycan gündən-günə inkişaf edir və
dünyanın aparıcı ölkələri sırasındadır. Milli varlığını qorumaq və
müstəqilliyini bərpa etmək üçün 30 il əvvəl küçələrə çıxan insanlar bugünkü
qüdrətli Azərbaycanın möhkəm təməllərini öz qanları və canları ilə atdılar.
"Türkiyə”
qəzetində dərc edilən "Çarlara kan
gerek” məqaləsində köşə yazarı İrfan Özfatura yazır ki, "30 il əvvəl
Qırmızı Ordunun tankları 1 milyon Azərbaycan türkünün toplaşdığı "Azadlıq” meydanına
girdi, yüzlərlə ölü və itkiyə baxmayaraq, müqavimətlə rastlaşdı. "Və
Azərbaycan. 20 Yanvar. Mötədil kimi tanınan Qorbaçov, 30 il əvvəl bir yanvar
gecəsində "Azadlıq” meydanında toplaşanların üzərinə tankları yeritdi. Sonra
366-cı motoatıcı alay Qarabağda türkləri qırmağa başladı. Yalnız Xocalıda 1330
qətl edildi, 150 nəfər itkin düdü və 1275 nəfər girov götürüldü. Qəzetlərin
mürəkkəbi hələ qurumayıb. Şübhəsiz ki, ermənilər bunu qəbul etmirlər. Niyə meydanlara
çıxıb "hamımız türkük" deyə qışqırmırıq?”, -deyə müəlif yazır.
"Sabah” qəzetində dərc edilən "Azerbaycanda 30 yıldır dinmeyen acı Kara Ocaq! 20 Ocaq Yanvar Bakü
katliamı nedir? başlıqlı məqalədə isə bildirilir ki, 20 Yanvar Azərbaycanda
və bütün türk coğrafiyasında Sovet İttifaqının işğalından sonra müstəqilliyin
əldə olunmasına aparan prosesdə mühüm dönüş nöqtəsidir.
"Vatan”
qəzetində dərc edilən "20 Ocak 1990
Yanvar Azeri Katliamı. Kara Ocak olayı nedir, kim yapmıştır?” başlıqlı
məqalədə isə bildirilir ki, Azərbaycanda müstəqillik rəmzinə çevrilən və
tarixdə "Qanlı yanvar" adı verilən 20 Yanvar qırğınının qurbanları
yad edilir. Azərbaycanlılar 1990-cı ildə qırğında həlak olanların xatirəsini
yad etmək üçün Bakıdakı Şəhidləri Xiyabanına axın etdilər. Şəhidlik qarşısında
uzun növbələr qurularkən, qəbirlərdə qırmızı qərənfillər qalaraq şəhidlər üçün
dua edildi. Prezident İlham Əliyev də buradakı mərasimdə dövlət rəsmiləri ilə
birlikdə iştirak edib. Azərbaycan Dövlət Himninin səsləndirildiyi mərasimdə
Əliyev Əbədi Atəş abidəsi önünə əklil qoyub. Bundan əlavə, yerli vaxtla saat
12: 00-da bütün şəhidlər üçün bir dəqiqəlik sükut təşkil edildi. Bu vaxt Xəzər
dənizinin sahillərində gəmilər, metro qatarları və avtobusların fitləri
səsləndi.
"CNN Türk” də dərc edilən "Azerbaycan'da 'Kanlı Ocak' kurbanları anılıyor” başlıqlı məqalədə
də Qanlı Yanvar hadisələrinə toxunulub.
"Yeni şafak”
qəzetində dərc edilən "Azerbaycan'da 30
yıldır dinmeyen acı Kara Ocak: Yanvar-Bakü Katliamı”, Anadolu Agentliyi, "TRT HABER” kanalı, "Yeni
akıt”, qəzetində və digər kanallarda, qəzet və saytlarda yayılan materiallarda
1990-cı il yanvarın 19-dan 20-nə keçən gecə sovet qoşunlarının Azərbaycan
xalqına qarşı törətdiyi hərbi cinayətin səbəb və nəticələrindən bəhs olunur. 20 Yanvar hadisələrinin müstəqilliyə aparan
yol olduğunu vurğulayıb.
Öz növbəsində Rusiya mediası da qanlı Yanvar
hadisələrinin 30-cu ildönümü illə bağlı silsilə yazılar dərc edib. Məsələn, "Qazeta.ru” yazır ki, 30 ildən bundan
əvvəl sovet qoşunları Bakıya daxil oldular. Materialda xüsusi vurğulanır ki,
Moskva "20 Yanvardan sonra Azərbaycanı itirdi.
"Arqumentı i faktı”
qəzetində dərc edilən "Qara Yanvar-
Bakıda qanlı yanvarın tarixi” başlıqlı məqalədə bildirilir ki, qanlı Yanvar
hadisələri zamanı Sovet Ordusu tərəfindən qətlə yetirilən insanlar azadlıq
uğurunda mübarizə aparıblar. "Nyus.ru”
da dərc edilən məqalədə də Qanlı Yanvar hadisələrinin 30-cu ildönümündən bəhs
edilib. Müəllif sovet ordusunun Bakını necə işğal etməsindən bəhs edib.
Bildirib ki, "o zaman Bakıda proseslər sürətlə inkişaf edirdi. Lakin qanlı
ssenarinin qarşısını almaq mümkün idi. O vaxtkı rəhbər Mixail Qorbaçov sonralar
etiraf etmişdi ki, qoşunların müdaxiləsi siyasi karyerasının ən böyük səhvidir”.
"Lenta.ru”da
dərc olunan məqalədə isə bildirilir ki, qanlı hadisələrin kökü Dağlıq Qarabağa
gedib çıxır.
Yeri gəlmişkən, Türkiyə və Rusiya mediası ilə
yanaşı, İtaliya mediasında da qanlı hadisələrin 30-cu ildönümünə həsr edilən
məqalə dərc edilib. "Notizie
Geopolitiche” qəzetində dərc olunan "Azərbaycan:
Bakıda törədilmiş "Qara Yanvar” faciəsindən 30 il ötür” başlıqlı məqalədə
bildirilir ki, "Human Rights Watch” təşkilatı 1994-cü ilin dekabrında
"Azərbaycanda "Qara yanvar”” hesabatı dərc edib: "Sovet ordusunun yanvarın
20-nə keçən gecə yol verdiyi zorakılıq, həqiqətən də azərbaycanlıların
müqavimətinə nisbətdə böyük qəddarlıqla törədilmiş kollektiv cəza tədbiri idi.
Sovet rəsmilərinin bu qərarının, Sovet qoşunlarının Azərbaycana müdaxiləsinin
məqsədi Azərbaycandakı kommunist hökumətinin millətçi müxalifət tərəfindən
devrilməsinin qarşısının alınması olub. Bunun açıq şəkildə ifadə edildiyini
nəzərə alsaq, Sovet əsgərlərinin Bakıda həyata keçirdiyi cəza tədbiri nəinki
Azərbaycanda, hətta Sovet İttifaqına daxil olan digər respublikalarda da
millətçilərə xəbərdarlıq məqsədi güdüb”.
Bakı 24°C
