“Professor dedi ki, bilirsənmi, mən Azərbaycan Prezidenti ilə eyni fakültədə təhsil almışam” - Soydaş
Zeyd Qarayev: "Yeməkdən əlavə, həm də
insanlarımızın qonaqpərvərliyi üçün darıxıram”
Beş ildən
çoxdur ki, Polşada yaşayır. Deyir ki, məktəbdə oxuyarkən xaricdə təhsil almaq
və yaşamaq arzusu olmayıb. Amma qəfildən Avropada oxumaq həvəsi yaranıb. Öz
istəyi ilə Avropaya getsə də, Bakı üçün darıxdığını söyləyir. Deyir ki, hətta
bir neçə ildən sonra vətənə qayıtmaq niyyəti var.
Müsahibim Polşanın Krakov şəhərində yaşayan və
"Accenture” şirkətində data analitik olaraq çalışan soydaşımız Zeyd Qarayevdir.
Zeyd deyir
ki, orta məktəbdə oxuyarkən xaricdə təhsil almaq haqqında düşünmürmüş: "Şirvan
şəhərindəki 20 saylı orta məktəbdə təhsil almışam. 9-10-cu sinifdə oxuyanda
4-cü qrupa, tibbə hazırlaşırdım. Amma 10-cu sinfin sonlarına yaxın anidən
fikrimi dəyişdim. Belə qərara gəldim ki, Avropada təhsil almalıyam. Ona görə də,
ingilis dilimi təkmilləşdirməyə başladım. Seçim zamanı bir neçə ölkə arasında
qərarsız qalmışdım. Amma mənim üçün ən münasib olanı Polşa idi. Əslində,
İtaliya və ya Almaniyada təhsil almaq istəyirdim. Bu ölkələrdə təhsil haqqı və
yaşayış xərcləri isə çox bahadır. Ona görə də, Polşanı seçdim. Bura gəlməzdən
əvvəl Polşada yaşayan tanışlarım var idi. Seçimimə bu amil də təsir etmişdi”.
"Burada tələbə həddən artıq
yüklənmir”
Andrey
Friç Modjevski adına Krakov Universitetindən yenicə məzun olan Zeyd, Polşanın təhsil sistemini çox bəyəndiyini söyləyir:
"Azərbaycan universitetlərində təhsil almadığıma görə, hansısa müqayisə apara
bilmərəm. Bir neçə universitet adı saymaq olar ki, Avropa ölkələri arasında ilk
sıralarda qərarlaşır. Mən bir neçə ay bundan öncə beynəlxalq əlaqələr üzrə
təhsilimi başa vurdum. İxtisasım beynəlxalq turizmdir. Burada təhsil almaq
istəyənlər nəzərə almalıdır ki, Polşada oxuyursansa, bir qədər çox oxumalı və
əziyyət çəkməlisən. Düzü, imtahanları vermək mənim üçün elə də çətin olmadı.
Dərs yükü o qədər də ağır deyil. Yəni burada tələbə həddən artıq yüklənmir və
özünə ayırmağa vaxtı qalır. Müəyyən səviyyədə oxuduqdan sonra imtahanları
vermək heç də çətin deyil”.
Həmsöhbətim
hazırda Polşanınt məşhur şirkətlərindən biri olan "Accenture” şirkətində data-analitik
olaraq çalışır: "İki ildir ki, bu şirkətdə işləyirəm. Bu işə qəbul olanda
ikinci kursda oxuyurdum və diplomum yox idi. İngilis dilini mükəmməl bildiyimə
və onlara lazım olan keyfiyyətlər məndə olduğuna görə bu işə qəbul olundum. Həm
oxuyub, həm işlədiyim dövrdə müəyyən çətinliklərim var idi. İşə başlayandan
sonra əsas çətinliyim vaxtla bağlı olurdu. Bəzən dərslərə gedə bilmirdim.
Dərslərdə iştirak edə bilmədiyim vaxtlarda bəzi professorlar bunu anlayışla
qarşılayırdı, bəziləri isə əksinə. İştirak etmədiyim dərslərin imtahanını
vermək heç də asan deyildi”.
"İşçinin rahatlığı ən mühüm
məsələlərdən biridir”
Deyir ki,
əslində, Polşada iş tapmaq o qədər də çətin deyil. Sadəcə olaraq, bəzi şeyləri
bilmək lazımdır: "Əsas məsələ sənin dil biliklərinin mükəmməl olmasıdır.
Həmçinin İT sahəsini bilmək üstünlükdür. İkinci dil kimi türk dilini bilirəm.
Əgər bu iki keyfiyyət sizdə varsa, asanlıqla iş tapa bilərsiniz. Əlbəttə ki, iş
tapmaqla hər şey bitmir. Burada işləməyin asan olduğu kimi, çətin tərəfləri də var. İşçilərin rahatlığı,
onlara qarşı rəftar şirkət üçün çox önəmlidir. Burada hər bir işçiyə böyük
hörmət var. İşçinin rahatlığı ən mühüm məsələlərdən biridir. Məsələn, iş vaxtı
başım ağrıyırsa, uzanıb istirahət edə, yata bilərəm. "Accenture” beynəlxalq
şirkət olduğuna görə, burada dünyanın müxtəlif ölkələrindən olan insanlar
işləyir. Hər bir millətin isə özünəməxsus xarakteri və öz dəyərləri var. Bəzən
qarşı tərəfi anlamaqda çətinlik çəkirsən. Dil, din, mentalitet fərqliliyi iş
prosesində çətinlik yaradır. Amma ümumilikdə götürdükdə, işini peşəkar şəkildə
görə bilirsənsə, ciddi çətinlik olmur”.
"Polyaklar həm də anlayışlı
xalqdır”
Həmsöhbətimi Polşada ən çox təəccübləndirən, ölkənin
iqlimi olub: "Polşanın iqlimi çox dəyişkəndir. Qış çox soyuq və sərt keçir. Bəzən temperatur mənfi 20 dərəcəyə
qədər düşə bilir. Hərdən burada bir gün
ərzində üç fəslin havası müşahidə edilir. Bəzən günəşli bir gündə
dostlarımızla piknikə çıxarkən, qəfildən yağış başlayır. Burada çoxlu dost və
tanışlarım var. Mən bura təzə gələndə, polyaklar Azərbaycanı o qədər də yaxşı
tanımırdı. Artıq 5 ildir ki, burada yaşayıram. İndi yavaş-yavaş Azərbaycanın
tanındığını görürəm. Beynəlxalq tədbirlərin təşkili Azərbaycanı daha da
tanıtdırdı. Artıq polşalı turistlər Azərbaycana səfər edirlər. Polyakları
xarakterizə etsək, deyə bilərəm ki, insansevər millətdirlər. Həmçinin humanist
xalqdırlar. Polyaklar həm də anlayışlı xalqdır. Amma hər yerdə olduğu kimi,
burada da pis və yaxşı nümunələr var. Təəssüf ki, burada bir qədər irqçidirlər.
Mən Krakov şəhərində yaşayıram. Bu şəhər Avropanın ən çirkli şəhərlərindən
biridir”.
Müsahibim
deyir ki, ilk illərdə təhsil və yaşayış
xərclərini valideynləri qarşılayıb: "Mən təhsilimi təqaüdlə deyil, öz
hesabıma alırdım. İşə başlayandan sonra təhsil xərclərimi özüm ödədim. Bir dəfə
imtahana girərkən professor məndən soruşdu ki, haralısan? Azərbaycandan olduğumu
deyəndə, gülərək soruşdu ki, prezidentiniz İlham Əliyev necədir? Bu sualının
qarşısında təəccübləndiyimi görən professor dedi ki, bilirsənmi, mən Azərbaycan
Prezidenti ilə eyni fakültədə təhsil almışam. Mənim onunla dostluq əlaqələrim
var. Hətta sizin prezident məni və digər fakültə yoldaşlarımızı bir dəfə
Azərbaycana dəvət etmişdi. Azərbaycana getdik və bizi orada çox gözəl
qarşıladılar. Azərbaycanın qonaqpərvərliyi mənim çox xoşuma gəlmişdi. Sizin
ölkənin prezidenti ilə mən çox yaxın dostam. Bu hadisə məni çox
təəccübləndirmişdi. Həmin imtahandan sonra həmin professorla münasibətlərimiz
daha da yaxşılaşdı. Bəzən hətta onunla görüşüb kofe içirdik”.
"Yəqin ki, öz ölkəmə qayıdacağam”
Polşa
mətbəxinin həddindən artıq bərbad olduğunu söyləyən müsahibim, beş il ərzində
yemək bişirməyi öyrənib: "Polşa mətbəxi ilə Azərbaycan mətbəxi müqayisə edilə
bilməz. Ən çox narazı qaldığım məqam məhz budur. Xarici ölkənin mətbəxinə
uyğunlaşmaq həqiqətən çox çətindir. Polşa mətbəxinə isə ümumiyyətlə,
uyğunlaşmaq olmur. Azərbaycanın yeməkləri və mətbəxi o qədər ləzizdir ki, Polşa
mətbəxinə uyğunlaşmaq çox çətin məsələdir. Bu, təkcə mənim üçün deyil, bütün
azərbaycanlılar üçün belədir. Ona görə də, əlimdən gəldiyi qədər çalışıram ki,
öz yeməyimi özüm bişirim. Burada yeməklərin çoxu donuz ətindən hazırlanır, mən
isə donuz əti yeyə bilmirəm. Azərbaycanda olanda heç vaxt yemək bişirmirdim.
Burada məcbur olub yemək bişirməyi öyrəndim. Yeməkdən əlavə, həm də Bakı,
insanlarımızın qonaqpərvərliyi üçün darıxıram. Bizim millətin istiqanlılığı
burada yoxdur”.
Sonda
Zeyddən gələcək planları haqda da soruşduq: "Təhsilimi artıq bitirmişəm. Amma
hələlik bir neçə il Avropada yaşamaq istəyirəm. Sonra Azərbaycana qayıda
bilərəm. Polşada qalmaq niyyətim yoxdur. Mən vətənpərvər insanam. Azərbaycanda
yaxşı iş tapan kimi yəqin ki, öz ölkəmə qayıdacağam. Bu günə kimi istədiyim bir
çox şeyə nail ola bilmişəm. Valideynlərim də hər zaman məni dəstəkləyib. Bura
mənim düşüncə və dünyagörüşümün formalaşmasında böyük rol oynadı. Amma artıq
burada qazandığım bilik və bacarıqlarımı öz ölkəmdə tətbiq etmək niyyətim var”.
Şəbnəm Mehdizadə