Prezident İlham Əliyev Dəmirəlin ölümünə görə başsağlığı verdi

Prezident İlham Əliyev Türkiyə prezidenti Rəcəb Tayyib Ərdoğana Süleyman Dəmirəlin vəfatı münasibətilə başsağlığı verib.
Başsağlığında deyilir:
“Hörmətli cənab Prezident,
Əziz Qardaşım,
Görkəmli dövlət xadimi və ictimai-siyasi xadim, Türkiyə Respublikasının 9-cu Prezidenti Süleyman Dəmirəlin vəfatı xəbəri bizi olduqca kədərləndirdi.
Süleyman Dəmirəl bütün həyat və fəaliyyətini doğma Türkiyənin rifahına həsr etmişdir. O, Türkdilli xalqlar və dövlətlər arasında əməkdaşlığın dərinləşdirilməsinə böyük töhfələr vermişdir. Süleyman Dəmirəl eyni zamanda Azərbaycan xalqının əsl dostu idi. Azərbaycana qəlbən bağlılığı onun müstəqilliyimizə dəstəyində, Azərbaycan-Türkiyə qardaşlığının möhkəmlənməsi sahəsində xidmətlərində öz ifadəsini tapmışdır.
Bu ağır itki ilə əlaqədar Sizə, qardaş Türkiyə xalqına, eləcə də mərhumun ailəsinə və yaxınlarına dərin hüznlə başsağlığı verir və kədərinizi bölüşürük.
Allah rəhmət eləsin!”.
Prezident həmçinin Süleyman Dəmirəlin vəfatı ilə bağlı onun qardaşı Şevket Demirələ də başsağlığı verib. Başsağlığı məktubunda deyilir:
“Hörmətli Şevkət Dəmirəl,
Sizin böyük qardaşınız, Azərbaycan xalqının əsl dostu Süleyman Dəmirəlin vəfat etməsi xəbəri məni sarsıtdı.
Dünyada böyük hörmət və nüfuz qazanmış görkəmli dövlət xadimi, bütün gücünü qardaş Türkiyəyə fədakarcasına xidmətə həsr etmiş gözəl insan dünyasını dəyişmişdir.
Xalqlarımızın iki dahi oğlunun – Heydər Əliyevin və Süleyman Dəmirəlin böyük dostluğu bizim xatirəmizdə həmişəlik qalacaqdır.
Sizə və bütün ailənizə bu ağır itki ilə əlaqədar öz adımdan və bütün ailəmiz adından dərin hüznlə başsağlığı verirəm.
Allah rəhmət eləsin!”