“Pinokkionun burnunun izi ilə” - Fotolar
Azərbaycan Dövlət Rus Dram Teatrında "Pinokkionun burnunun izi ilə”
tamaşası təkcə məktəbliləri deyil, onların valideynlərini, müəllimləri və ümumən
teatrsevərləri bir araya topladı. İtaliyanın "CompagniaBella" teatr
şirkəti və aktrisa Paola Kontininin rəhbərliyi ilə baş tutan tamaşada Yasamal
rayonunda yerləşən 158 saylı məktəbin şagirdlərinin iştirakı xüsusi maraq
doğurdu. Belə ki, Azərbaycan məktəblilərinin qısa müddətdə italiyalı aktyorların dəstəyi
ilə səhnələşdirdiyi tamaşa, iki ölkə arasında mədəniyyət və incəsənət əlaqələrinin
parlaq nümunəsinə çevrildi. İlk dəfə səhnəyə çıxan uşaqlar böyük şövqlə çıxış
etdilər.
Tamaşadan
öncə səhnəyə çıxan təhsil nazirinin
müavini Məhəbbət Vəliyeva 2019-2020-ci tədris ilindən 158 saylı məktəbin
müraciəti əsasında təhsil ocağının 5-ci siniflərində ikinci dil kimi italyan
dilinin tədrisinə başlandığını diqqətə çatdırdı: "Bakının
158 nömrəli məktəbi və İtaliya arasında əməkdaşlıq bu il, Azərbaycan hökumətinin
təşkil etdiyi Avropa Gənclər Olimpiya Festivalı zamanı yaranıb. 2019-cu ilin
sentyabr ayından etibarən Bakının 158 nömrəli məktəbinin şagirdləri İtaliya
Xarici İşlər və Beynəlxalq Əməkdaşlıq Nazirliyinin maliyyələşdirdiyi italyan
dilinin tədrisi layihəsinə cəlb edilib. Bu layihə Azərbaycan Respublikası Təhsil
Nazirliyi və Bakı Şəhəri üzrə Təhsil İdarəsinin dəstəyi və əməkdaşlığı sayəsində
başladılıb. Hər bir sevginin tarixçəsi olduğu kimi 158 saylı məktəbin
İtaliyaya sevgisinin tarixçəsi də burdan başlayır. "Pinokkionun burnunun izi ilə" tamaşası da İtaliyanın Azərbaycandakı
səfirliyinin təşkilatçılığı və İtaliyadan dəvət olunmuş aktyor və ssenaristlərin
iştirakı ilə birgə hazırlanıb”.
M.Vəliyeva
bu cür tədbirlərin iki ölkə arasında dostluq münasibətlərinin möhkəmləndirilməsinə
təkan verəcəyini qeyd etdi: "Azərbaycandan hər il İtaliyaya 400 nəfər tələbə təhsil
almağa gedir. Əminəm ki, bu gün zalda əyləşən və səhnədə çıxış edən uşaqların
arasında da italyan dilini öyrəndikdən sonra İtaliyada təhsil almaq arzusu
olacaq. Bu mənada Azərbaycan tələbələri
İtaliya universitetlərinin verdiyi yüksək təhsildən faydalanacaqlar”.
İtaliyanın ölkəmizdəki fövqəladə və səlahiyyətli
səfiri Auqusto Massari bu tamaşanın İtaliyan Dili Həftəsi çərçivəsində
əsas tədbirlərdən biri olduğunu qeyd etdi: "Biz İtaliyan Dili Həftəsini Bakıda
bu mövzu ilə keçiririk. Dünyada İtalyan Dili Həftəsi,
İtaliyanın Xarici İşlər və Beynəlxalq Əməkdaşlıq Nazirliyinin mədəniyyət və
diplomatik şəbəkəsinin hər il oktyabr ayında təşkil etdiyi və italyan dilini
klassik və müasir mədəniyyətin nəhəng dili olaraq təşviq etdiyi bir tədbirdir.
İtaliya Respublikasının Prezidentinin himayədarlığı altında 2001-ci ildə
başladılan həftə, ildən ilə daha da inkişaf etmişdir. Məqsəd italyan
dilini və mədəniyyətini təbliğ etməkdir. İtaliyan dili dünyada ən çox öyrənilən
dillər sırasındadır. Beynəlxalq səviyyədə ingilis, ispan, çin dilindən sonra
italyan dili 4-cü ən çox öyrənilən dildir. Son 10 ildə italyan dilinin tədrisinə
dünya səviyyəsində böyük maraq var. Bu, Azərbaycanda da müşahidə olunur”. Səfir
158 saylı məktəblə yaranan əlaqələrdən də məmnunluğunu ifadə etdi: "Bizim ən
çox marağımıza səbəb olan 158 saylı məktəblə dostluq əlaqələrinin qurulmasıdır.
"Pinokkionun burnunun izi ilə” tamaşası təkcə
kiçiklər üçün deyil, həm də böyüklər üçündür. Bizim hər birimizdə Pinokkiodan nəsə var. Bu, məhz həyat dərsidir”.
Qeyd edək ki, Dünyada İtalyan Dili Həftəsinin XIX nəşri bu il 21-27
oktyabr tarixlərini əhatə edəcək və mövzusu "İtalyan dili səhnədə"
adlanır. İtalyan Dili Həftəsi ərzində təklif olunan bir mövzuya həsr olunan
konfranslar, sərgilər və tamaşalar, yazıçılar və görkəmli şəxsiyyətlərlə görüşlərin
təşkili həyata keçiriləcək.
Qeyd edək ki, "İtalyan dili həftəsi” çərçivəsində
21-21 oktyabrda Rus Dram Teatrında "Pinokkionun burnunun izi ilə"
tamaşası, 27 oktyabrda Landmark kinoteatrında "Leonardo və onun çevrəsi” sənədli
filmi, 30 oktyabr - 1 noyabr tarixlərində Azərbaycan Memarlıq və İnşaat
Universiteti ilə Milan Dizayn Film Festivalının əməkdaşlığı çərçivəsində italiyan
dizaynının tarixi və inkişafı ilə bağlı filmlərə baxış keçiriləcək.
Təranə
Məhərrəmova