Pərvin Kərimzadə: “Ölkəmizin sabitliyi əbədi və daimidir”
"Azərbaycan bir sıra beynəlxalq tədbirlərə
ev sahibliyi edən, ictimai-siyasi sabitliyi təmin etmiş, günü-gündən müasirləşən,
beynəlxalq arenada söz sahibinə çevrilmiş ölkədir. Bu,
islamofobiya adı altında qruplaşan qüvvələri narahat edir.
Ona görə də ölkəmizin öz multikultural dəyərlərinə
sahib çıxması fonunda məkrli niyyətli
qruplaşmalara dəstək verən qüvvələr dini təhdidlər, çirkin kampaniyalar aparır”.
Bu barədə millət vəkili Pərvin Kərimzadə "Kaspi”yə
açıqlamasında bildirib. Qeyd edib ki, 2018-ci il iyul ayının 3-də Gəncə
şəhər İcra Hakimiyyətinin başçısı Elmar Vəliyevin və Gəncə şəhər Baş Polis İdarəsinin
əməkdaşı polis serjantı Qasım Aşbazovun silahlı
hücuma məruz qalması da məhz belə məqsədli şəkildə, əvvəlcədən hazırlanmış
terror aktlarından biridir: "Terror
aktını törədən Gəncə şəhərində anadan olmuş Yunis Səfərov Rusiya Federasiyasının vətəndaşıdır.
Fakt üzrə başlanılmış cinayət işi üzrə həyata keçirilən istintaq hərəkətləri və
əməliyyat-axtarış tədbirləri ilə müəyyən edilib ki, radikal meylli dindarların
təsiri altına düşən Yunis Səfərov 2016-cı ildə İran İslam
Respublikasına gedərək 8 ay Qum şəhərində yaşayıb. O, bu müddət ərzində
Azərbaycan vətəndaşı olan Rasim Əsədovla birgə Suriya Ərəb Respublikasının ərazisində
olan silahlı birləşmələrin tərkibində döyüş təlimi keçib. 2017-ci ildə Azərbaycana
qayıdaraq Gəncə şəhərinə gəlib, həmin ilin iyun ayında odlu silah əldə etmək
üçün "Kapitalbank"ın Gəncə filialında postda duran polis əməkdaşına
hücum edib, başına küt alətlə xəsarət yetirərək "Makarov" markalı
xidməti tapançasını ələ keçirib. Yunis Səfərov məkrli planını həyata keçirmək üçün
asayişin keşiyində dayanan polis əməkdaşının həyatına qəsd edib. Tibb işçilərinin
ciddi səyi nəticəsində
həyati təhlükəni adlayan iki uşaq atası olan polis əməkdaşı məhz Yunis Səfərovun əməli
nəticəsində hazırda əmək qabiliyyətini itirib. Sosial şəbəkələrdə belə əməllərin
sahibinin, məqsədli şəkildə sui-qəsd həyata keçirən şəxsin bəziləri tərəfindən "milli qəhrəman” obrazınən yaradılması
nə dərəcədə
doğrudur? Asayişi qoruyan polis əməkdaşına xəsarət yetirən, dövlət məmurunun həyatına
sui-qəsd edəni
"milli qəhrəman” adlandırmaq olarmı?”.
Millət vəkili bildirib ki, Y.Səfərovun terror aktı törətməkdə əsas məqsədi
ajiotaj, xaos, vahimə yaratmaqla, sabit ölkəmizin imicinə zərər vurmaq olub. Onun
sözlərinə görə, Azərbaycan artıq güclü dövlətdir və
bu terror aktının arxasında duranları ifşa etməyə, eyni zamanda bütün bu
qüvvələrə cavab verməyə qadirdir.