• cümə, 29 Mart, 03:16
  • Baku Bakı 7°C

Pərakəndə və françayzinq biznesi üzrə Dəyirmi Masa keçirilib

21.04.14 13:21 1391
Pərakəndə və françayzinq biznesi üzrə Dəyirmi Masa keçirilib
Dubay Ticarət və Sənaye Palatasının sədr müavini Hişam Al Şiravinin rəhbərlik etdiyi nümayəndə heyətinin Azərbaycana səfəri çərçivəsində aprelin 21-də pərakəndə və françayzinq biznesi üzrə Dəyirmi Masa keçirilib. İqtisadiyyat və sənaye nazirliyinin (İSN) mətbuat xidmətindən “Kaspi”yə bildirilib ki, Dubay Ticarət və Sənaye Palatasının təşkilatçılığı, Azərbaycanda İxracın və İnvestisiyaların Təşviqi Fondunun (AZPROMO) dəstəyi ilə keçirilmiş tədbirdə hər iki tərəfdən iş adamları iştirak ediblər.
Qonaqları salamlayan İSN müavini Sahil Babayev Azərbaycanın davamlı və dayanıqlı iqtisadi inkişafı barədə məlumat verib, ölkəmizin etibarlı tərəfdaş, regionun iqtisadi və mədəni mərkəzi olduğunu qeyd edib. Deyib ki, Azərbaycanın əldə etdiyi uğurlar beynəlxalq təşkilatlar tərəfindən də müsbət qiymətləndirilir. Azərbaycan və Birləşmiş Ərəb Əmirlikləri arasında əməkdaşlıq barədə danışan nazir müavini bildirib ki, ölkələrimiz arasında möhkəm müqavilə-hüquq bazası yaradılıb, indiyədək 20-dən çox sənəd imzalanıb: “Hazırda Azərbaycanda xidmət, nəqliyyat, sənaye, tikinti, ticarət, bank və sığorta sahələrində BƏƏ sərmayələri əsasında 193 şirkət fəaliyyət göstərir. BƏƏ tərəfindən ölkəmizdə qeyri-neft sektoruna yatırılan birbaşa investisiyaların həcmi təqribən 465 milyon ABŞ dolları təşkil edir və xarici investisiya yatıran ölkələr arasında ilk beşlikdədir. Hazırda həyata keçirilən “Azərbaycan 2020: Gələcəyə baxış” İnkişaf Konsepsiyasına uyğun olaraq, ölkəmizdə 2020-ci ilə qədər iqtisadiyyatın qeyri-neft sektoru hesabına iki dəfə artırılması nəzərdə tutulur. Bu istiqamətdə pərakəndə və françayzinq sahəsinin inkişafı mühüm rol oynaya bilər. Bu baxımdan Birləşmiş Ərəb Əmirliklərinin pərakəndə və françayzinq sahəsində təcrübəsi bizim üçün əhəmiyyətlidir. Ümid edirik ki, bu sahənin genişləndirilməsi və inkişafı üçün BƏƏ ilə təcrübə mübadiləsi, həmçinin gələcək əməkdaşlıq perspektivlərinin müzakirəsi faydalı olacaq”.
Dubay Ticarət və Sənaye Palatasının sədr müavini Hişam Al Şiravi ölkəsinin Azərbaycanla əlaqələrin genişlənməsində maraqlı olduğunu vurğulayıb və bunun üçün hər iki ölkənin böyük potensiala malik olduğunu qeyd edib.
Dəyirmi Masada Azərbaycanda pərakəndə və françayzinq sahəsinin istiqamətləri mövzusunda təqdimat keçirilib, pərakəndə ticarət sektorunda aparıcı sahələr, Azərbaycanda və Dubayda daşınmaz əmlak bazarının inkişaf istiqamətləri, Azərbaycanda inkişaf edən istehlak bazarının françayzinq ehtiyacları, daşınmaz əmlak və pərakəndə ticarət idarəçiliyində Dubay təcrübəsi, Dubayın inkişaf etmiş brendlərinin və françayzinqlərinin Azərbaycana gətirilməsi və sair mövzularda müzakirələr aparılıb.
R.İSMAYILOV
banner

Oxşar Xəbərlər