Paşinyan odla oynayır
Son vaxtlar Ermənistanda
antirusiya əhval-ruhiyyəsi güclənməkdədir. Baş nazir Nikol Paşinyanın həyat
yoldaşı Anna Akopyanın rəhbərlik etdiyi media qurumlarında Rusiya əleyhinə
yazılar dərc olunmaqdadır. Ermənistanın Gümrü şəhərinə dislokasiya olunmuş
102-ci Rusiya hərbi bazasının 30-a yaxın hərbçisinin iyulun 18-də təlim
məqsədilə yaşayış məntəqəsinə daxil olması, havaya atəş açması, yerli əhalini
vahiməyə salması bu narazılığı bir qədər də artırıb. Belə ki, 102-ci bazanın
hərbçiləri bir neçə avtomobildən ibarət kalonla kəndə daxil olaraq xüsusi
taktiki təlim məşğələsi keçiriblər. Bu zaman rus hərbçiləri boş patronlarla
intensiv atəş açıb, heç nədən xəbəri olmayan kənd sakinləri güllə səslərini
eşidərək evlərindən qaçıb. Hətta bir çoxlarının qorxudan ürəyi gedib. Artik
bölgəsinin Panik kəndi yaxınlığında yaşanan hadisələrlə bağlı Şirak bölgəsinin
rəhbəri Karen Saruxyan hərbi bazanın komandir müavini Aleksey Palyuxaviçlə
görüşüb. Ümumiyyətlə, Ermənistanda bu hadisə çox sərt reaksiyalar doğurub.
İşğalçı ölkədə ciddi gərginlik yaranıb, mediada antirusiya əhvalı kəskinləşib.
Bundan əvvəl də Gümrüdə xidmət edən rus hərbçi Permyakovun bir erməni ailəsini
məhv etməsi xatırlanaraq, yerli mediada həm hərbi bazanın mövcudluğu, həm də
bütövlükdə Rusiya əleyhinə fikirlər səslənməyə başlayıb. Belə yazılar isə bir
qədər əvvəl vurğuladığımız kimi, daha çox A.Akopyanın rəhbərlik etdiyi media
qurumlarında dərc olunur. Maraqlıdır, Ermənistanın baş naziri N.Paşinyan həyat
yoldaşı A.Akopyan vasitəsilə nəyə nail olmaq istəyir?
Rufik İSMAYILOV
Mövzu ilə bağlı fikirlərini
"Kaspi”yə bölüşən politoloq Elxan
Şahinoğlu bildirib ki, N.Paşinyan belə davranışlarla Rusiyanın nəbzini
yoxlayır. Onun fikrincə, Kremlin tam asılılığında olan eks-prezidentlər Robert
Köçəryan və Serj Sarkisyandan fərqli olaraq, N.Paşinyan Qərblə yaxınlaşmaq,
Rusiya ilə məsafə saxlamaq istəyir. Politoloq deyib ki, Paşinyanın NATO
toplantısına qatılması, Ermənistan müdafiə nazirinin öz ölkəsinin sərhədlərini
qoruyan rus qoşunlarının statusunun dəyişdirilməsi barədə bəyanatı da buradan
qaynaqlanır: "Bütün cəhdlərə rəğmən, Paşinyanın istəyi alınmır. Ermənistan
Rusiyadan tamamilə asılı durumdadır. Buna görə də Rusiyadan qopa bilmir.
Vaxtilə prezident Ter-Petrosyan da bu cür məsafə saxlamaq eşqinə düşdü, amma
Rusiya dərhal onu devirdi. Yaxud 1999-cu ildə Ermənistan parlamenti müəmmalı
şəkildə gülləbaran edildi. Bu hadisə də Rusiyadan qopmağın cəzasının, bədəlinin
necə olacağı barədə verilən açıq mesaj idi. Təsadüfi deyil ki, Ermənistan
müdafiə nazirinin sərhəd qoşunlarının statusunun dəyişilə bilməsi barədə
bəyanatından dərhal sonra Rusiya prezidenti Vladimir Putin baş nazir Paşinyana
zəng vurub. Məhz bunun ardınca erməni müdafiə naziri sözlərini geri götürdü.
Bununla belə, Paşinyan və dəstəsi Qərblə təmaslarını intensivləşdirməyə
çalışır. O, bu yaxınlarda öz yardımçısını Amerikaya göndərdi ki, rəsmi
şəxslərlə görüşsün. Amma bu səfər çox böyük uğursuzluqlarla nəticələndi. ABŞ-da
heç bir ciddi rəsmi şəxs onu qəbul etmədi. Sıradan konqresmenlərlə keçirilən
görüşlərdə Paşinyanın yardımçısı yalvardı ki, sentyabrda BMT-nin toplantısında
iştirak edəcək Ermənistan baş nazirinin ABŞ prezidenti ilə görüşü təşkil
edilsin. Gülməli burasıdır ki, Paşinyanın köməkçisi bu xahişi prezident Donald
Trampın rəqibləri, ən qatı tənqidçiləri sayılan demokrat konqresmenlərdən edib.
Reallıqda Trampın rəqibi sayılan konqresmenlər heç vaxt buna getməz. Bayaq qeyd
etdiyim kimi, Paşinyan hakimiyyətinin bütün cəhdləri Rusiyadan asılılığı
azaltmağa, məsafə saxlamağa yönəlib. Ancaq onlar unudurlar ki, bu cəhdlər
Paşinyan hakimiyyətini laxlada, bumeranq effekti verə, Ermənistan üçün faciə
ilə yekunlaşa bilər”.
Politoloq
Mübariz Əhmədoğlu isə hesab edir ki, Ermənistan müstəqillik əldə
etdikdən bu yana daim antirusiya əhval-ruhiyyəsində olub. Ekspertin fikrincə,
ermənilərin antirusiya mövqeyində özəl xüsusiyyət var. Belə ki, onlar antirusiya
mövqeyi sərgiləyir, Rusiyanı söyür, ardınca Kremlin könlünü alır, hətta rəsmi Moskvadan
ənam da əldə edirlər: "Ermənistanda hər zaman antirusiya münasibət olub. Səbəb
kimi Qərbin müxtəlif adlar altında maliyyə yardımları etməsini, Rusiyanın isə
belə bir addım atmamasını göstərirlər. Digər tərəfdən, Ermənistanda uydurma bir
mif əsasında elə hesab edirlər ki, Rusiyanı məhz ermənilər yaradıb. Ona görə də
Rusiya hər zaman Ermənistana borcludur. Söhbət Bizans imperiyasında
Konstantinopl patriarxının qızı Annanın Vladimirə ərə getməsindən gedir.
Ermənilər düşünürlər ki, patriarx erməni olub. Bu izdivaca qədər ruslar
bütpərəstliklə məşğul olublar, vəhşi kimi yaşayıblar. Yəni, bu uydurma əfsanəyə
köklənən ermənilər ruslara yuxarıdan aşağı baxırlar. Paşinyan və arvadı Anna da
jurnalist kimi fəaliyyət göstərdikləri müddətdə daim antirusiya yazılarla çıxış
ediblər. Onlar heç zaman Rusiya barəsində müsbət fikir səsləndirməyiblər. Bu
kimi səbəblərdən Annanın nəzarətində olan media qurumlarında antirusiya əhval-ruhiyyəsini
yeni hadisə kimi qəbul etmirəm. Onlar öz yollarını indi də davam etdirirlər”.
Rufik İSMAYILOV