Baş nazir Nikol Paşinyan özünə əsas rəqib kimi
gördüyü sabiq prezident Robert Koçaryana qarşı hərtərəfli hücuma keçib. Ötən gün
Xüsusi İstintaq Komitəsinin əməkdaşları Koçaryana yaxınlığı ilə seçilən
Yerevan.Today saytının ofisində axtarışlara başlayıblar. Söhbət qalmaqallı
dinlənmədən gedir. Saytın ofisində aparılan axtarış onu deməyə əsas verir ki,
hakimiyyət Xüsusi İstintaq Komitəsi və Milli Təhlükəsizlik Xidməti rəhbərləri –
Sasun Xaçatryan və Artur Vaneçyan arasındakı telefon danışığının faş
edilməsində Koçaryan və yaxın ətrafını günahkar sayır. Qeyd edilir ki, bu
informasiya şəbəkəsi son vaxtlar Koçaryan haqqında çoxsaylı informasiyalar
yayır. Bu günlərdə isə Koçaryanın eksklüziv müsahibəsi məhz adıçəkilən saytda
dərc edilib. Paşinyanın yaxın ətrafı da sayta məhz bu səbəbdən təzyiq
göstərməyə çalışır. "1in.am” saytında dərc edilən məqalədə vurğulanır ki,
cəmiyyətin böyük bir qismi bu qənaətdədir ki, dinləmənin arxasında məhz
Koçaryan durur. Lakin məqalədə vurğulanır ki, bunun üçün mütləq konkret faktlar
ortaya qoyulmalıdır. Hüquqi dövlət qurmaq istəyirsənsə mütləq buna əməl
olunmalıdır. Sadəcə, bir faktdan tutublar ki, dinlənilmənin mətnini məhz ilk
olaraq Yerevan.Today və Nraparak.am saytları yayıblar. Yerevan.Today-ın rəhbəri
Sevak Akopyan öz növbəsində bildirir ki, kütləvi informasiya vasitələri siyasi
məqsədlərin hədəfinə çevrilib.
Paşinyan üçün belə bir mürəkkəb durumda erməni
mediası onu təşvişə salacaq sensasion bir məlumat da yayıb. Yayılan məlumata
görə, Rusiya prezidenti Vladimir Putin Ermənistana nəzərdə tutulan səfəri
çərçivəsində keçmiş prezidentlər Robert Koçaryan və Serj Sarkisyanla görüşəcək.
Bu barədə "Jamanak” qəzeti yazıb. Qəzetdə dərc olunmuş məqalədə deyilir:
"Deyəsən, Putin dəvəti qəbul edib və mətbuat katibi Peskov vasitəsilə Yerevana
gələcəyini bildirib, lakin səfərin tarixi barədə aydınlıq hələ ki yoxdur”. "Lakin
artıq məlumdur ki, tarixdən asılı olmayaraq, Putin Yerevanda Ermənistanın
ikinci və üçüncü prezidentləri Robert Koçaryan və Serj Sarkisyanla görüşmək
niyyətindədir”, - nəşr əlavə edir.
Xatırladaq ki, iyulun sonlarında Ermənistanın
keçmiş prezidenti Robert Koçaryan 2008-ci ildə baş vermiş hadisələrin
törədilməsində ittiham olunaraq həbs edilmişdi. Lakin avqustun 13-də Apelyasiya
Məhkəməsi birinci instansiya məhkəməsinin qərarını ləğv etmişdi. Hələlik Koçaryan
azadlıqdadır, lakin ittiham onun üzərindən götürülməyib. Hazırkı hakimiyyəti
şoka salan əsas fakt isə o oldu ki, son ildə ilk dəfə 10 ildə Rusiya prezidenti
Koçaryanı ad günü ilə bağlı təbrik edib.
Bununla yanaşı, Rusiya mediası Paşinyanın böyük
önəm verdiyi və bütün gücünü sərf etdiyi Yerevan Şəhər Şurasına seçkilərdə
məğlub olacağı barədə hesabat yayıb. Məlumata görə, "Çiçəklənən Ermənistan”
Partiyası seçkilərdə qalib gələcək. Bu nəticə Rusiyanın ROSA fondunun keçirdiyi
sorğudan sonra ortaya çıxıb. Sorğu iştirakçılarının 54 faizi seçkidə iştirak
edəcəyini, 34 faizi isə seçkiyə getməyəcəyini bildirib. 37 faiz "Çiçəklənən
Ermənistan” Partiyasına, 22 faiz İslahatçılar Partiyasına, 18 faiz hökumətin
dəstəklədiyi "Mənim addımım” blokuna, 11 faiz Yerevanlılar Blokuna səs
verəcəyini bildirib. Seçkidə iştirak edən digər birliklərə ümumilikdə 12 faiz
səs veriləcəyi müəyyən edilib. Qeyd edək ki, "Çiçəklənən Ermənistan”
Partiyasını dolayısı yolla iş adamı Qagik Çarukyan maliyyələşdirir. Sentyabrın
16-dan etibarən partiya ilə hökumət arasında münasibətlər gərginləşib. Partiya
hökuməti təzyiqlərdə ittiham edib.
"Çiçəklənən Ermənistan” Partiyasının da R.Koçaryanla
sıx əlaqələrə malik olduğu iddia edilir. İslahatçılar Partiyasına isə Vaqan
Babayan rəhbərlik edir. Babayan əvvəllər "Çiçəklənən Ermənistan” Partiyasının
üzvü olub və bunun sayəsində deputat seçilib. 2016-cı ildə partiyadan ayrılan
Babayan İslahatçılar Partiyasını yaradıb. Babayan sonuncu parlament seçkisinə
hakim Respublika Partiyası ilə birgə qatılıb.
Seçkilərdə Paşinyana ciddi rəqib ola biləcək"Luys” Blokunun lideri Aram Sarkisyan Yerevanda keçirdiyi
mitinqdə deyib ki, təmsil etdiyi blokun keçmiş rejimlə razılaşmaya gedib,
onları hakimiyyətə qaytarmaq üçün mübarizə aparacağını düşünmək yanlışlıqdır. "Mən
bilmirəm baş nazir niyə bizi nədəsə şübhəli bilir. Problem budur ki, cənab baş
nazirin ittihamlarına cavab verməyəndə bunu razılıq əlaməti kimi anlayırlar,
cavab verdikdə isə "niyə öz üzərinə götürürsən” deyirlər. Xalqa düşmənçilik
yox, sevgi və səbir lazımdır. Bu seçkidə hansısa qüvvəyə qarşı mübarizəyə
ehtiyac yoxdur. Biz hamımız keçmiş hökumətlə mübarizə aparırdıq və həmin rejim
də indi seçkidə iştirak etmir”.
Sarkisyan daha sonra birbaşa Paşinyana xitabən
deyib: "Baş nazir postunu kimə görə tutduğunuzu unutmayın. Sizi parlamentdə "Çiçəklənən
Ermənistan”, hətta Daşnaksütyun da dəstəkləyib. Siz yalnız öz
nöqteyi-nəzərinizi diqqətə alırsınız. Mənim sizə daha deyəcək sözüm yoxdur.
Adını çəkdiyim qüvvələr sizin yanınızda idi və növbədənkənar seçkinin tərəfdarı
olduqlarını bildirirdilər. İndi insanlar bunun nəyə lazım olduğunu düşünürlər.
Biz bu məsələni necə həll edəcəyik? Mən birmənalı şəkildə növbədənkənar
seçkinin tərəfdarıyam”.
Qeyd edək ki, Aram Sarkisyanın partiyası inqilab
zamanı Paşinyanı tam dəstəkləyib. Paşinyanın baş nazir seçilməsindən
münasibətlər pisləşib.
Bakı 23°C
