Paşinyanın məqsədi rəqiblərini sıradan çıxarmaqdır
Ermənistanın yeni baş
naziri Nikol Paşinyan sabiq prezident Serj Sarkisyan rejiminin ən qatı
tərəfdarlarından birini, müdafiə nazirinin keçmiş müavini, 1990-cı illərdə
Qarabağda quldurluqlar törətmiş separatçı hərəkatın veteranı, deputat Manvel
Qriqoryanı həbs etdirib. Buna səbəb onun mülklərinə keçirilmiş reyd zamanı çox
sayda silah-sursat,ərzaq vəErmənistan ordusu üçün
nəzərdətutulmuş başqa malların aşkar edilməsi olub.Aşkar edilmiş
mallar arasında Ermənistan Silahlı Qüvvələrinin əsgərləri üçün nəzərdə tutulmuş
alt paltarları, tibbi dərmanlar və konservlər olub. Buradakı mallar arasında
habelə 2016-cı il Qarabağ müharibəsi zamanı yerli icmalar, məktəblər və başqa
mülki təsisatlar tərəfindən ianə edilmiş əşyalar da aşkar edilib. M.Qriqoryanın
həbsi ilə yanaşı, Ermənistanda Mütəşəkkil Cinayətkarlıqla Mübarizə Baş
İdarəsinin Korrupsiya və İqtisadi Cinayətkarlıqla Mübarizə İdarəsi Yerevan meri
Taron Markaryana qarşı da cinayət işinin başladılması üçün ölkənin Baş
Prokurorluğuna müraciət edib. Onun böyük məbləğdə pul vəsaitlərinin
mənimsənilməsində, böyük həcmdə vergidən yayınmaqda, dövlət sənədlərinin
saxtalaşdırılmasında ittiham olunduğu vurğulanıb. Sabiq müdafiə naziri Seyran
Ohanyan isə 2014-2017-ci illərdə Ermənistan Müdafiə Nazirliyində baş vermiş
pozuntuları araşdıran vergi müfəttişləri tərəfindən dindirməyə dəvət edilib.
Bütün bunlardan göründüyü kimi, N.Paşinyan Ermənistanın sabiq prezidentlərinə
yaxınlığı ilə seçilən şəxslərin "ovuna çıxıb”. Bu "ovun” məqsədi, nə ilə
nəticələnəcəyi ilə bağlı fikirlərini "Kaspi”yə bölüşən politoloq Elxan Şahinoğlu bildirib ki, N.Paşinyan hər şeydən öncə
seçki ərəfəsində verdiyi vədləri yerinə yetirir. Onun sözlərinə görə,
N.Paşinyanın Ermənistanda başlatdığı həbslərdə digər məqsədi qarşıdan gələn
parlament seçkilərində güclü mövqeyə sahiblənmək, seçkilərdə qalib olmaqdır.
Politoloqun fikrincə, N.Paşinyan M.Qriqoryanı həbs etdirməklə S.Sarkisyan və ətrafında
olanların əsl mahiyyətini ortaya qoyur, üzə çıxan neqativliklər fonunda
rəqiblərini neytrallaşdırır.
Politoloq
Mübariz Əhmədoğlu isə hesab edir ki, indiyə qədər Ermənistanda kim
prezident olubsa, M.Qriqoryan məhz onun adamı olub. Siyasi şərhçi M.Qriqoryanın
keçmişini təhlil etməklə onun mahiyyətini ortaya qoyub: "Azərbaycan
torpaqlarının işğalında iştirak etmiş Vazgen Sarkisyan vaxtilə Manveli dartıb
gətirdi, onu "qəhrəmana” çevirdi. Halbuki, buna qədər Manvel heç bir malı-mülkü
olmayan, arxasız bir adam idi. Vazgenin sayəsində işğal prosesində iştirakçı
oldu, döyüşlərdə "qəhrəmanlıqlar” göstərdi, azərbaycanlı əsir və girovlara
qarşı qəddar rəftarı ilə "ad çıxardı”. Ümumən Manvel Vazgenin "sağ əli” idi.
Lakin sonradan eks-prezident Robert Köçəryanın mövqeyi gücləndikcə, Manvel onun
tərəfinə keçdi. Hətta belə bir versiya var ki, 1999-cu ilin oktyabr ayında
Ermənistan parlamentinin gülləbaran edilməsi planı xarici ölkədə hazırlansa da,
bu ideyanın reallığa çevrilməsində Manvel Qriqoryanın dəstəsi əsas rol oynayıb.
Təbii ki, bu qətliamla bağlı Ermənistan xüsusi-xidmət orqanları da məlumatlı
olublar. Bu hərəkətləri ilə Manvel baş nazir Vazgenə münasibətini göstərmiş
olub. Xatırlayırsınızsa, Ermənistanda baş nazir vəzifəsinin icrası bir müddət
Aram Sarkisyana həvalə edildi. Həmin vaxt Aram araşdırma aparıb oynanılan
oyunlardan məlumatlı olduqdan dərhal sonra Robert Köçəryana qarşı mübarizəyə
başladı. Robert buna cavab olaraq, Aramı Moskvanın adamı olmaqda, hərbi
proseslərə müdaxilə etməkdə günahlandırırdı. Bunun ardınca o, Manveli Aramın
üstünə qaldırdı, Baş nazirin istefa verməsi tələbini səsləndirdi. Hər ikisi
birləşib Aramı istefaya göndərdilər. Təsəvvür edin, heç bir malı-mülkü olmayan
Manveli Vazgen gətirib adam etdi. Manvel isə yerini möhkəmlədəndən sonra
mövqeyini dəyişməklə yanaşı, Vazgenin qardaşı Aramı vəzifədən uzaqlaşdırmağa
nail olmaqla, keçmiş himayəçisinə "təşəkkürünü” bildirdi”.
Politoloq qəzetimizə
açıqlamasında qeyd edib ki, sonradan özünə qarşı R.Köçəryandan soyuq münasibət
görən M.Qriqoryan eks prezident Levon Ter Petrosyana sığınıb: "Lakin 2008-ci
ilin 1 mart hadisələrində Manvel müttəfiqi Petrosyana da "atdı” və yeni
prezident Serj Sarkisyanın himayəsi altına keçdi. Məlumatlara görə, Sarkisyan
prezidentlikdən gedəndən sonra Manvel jurnalistlərə verdiyi açıqlamalarda hakim
partiyanın üzvü olmadığını, onları dəstəkləmədiyini dönə-dönə qeyd edirmiş.
Yəni o, belə bir xarakterin sahibidir. Başqa sözlə desək, məsləki, əqidəsi
olmayan, Azərbaycan xalqlarına qarşı çoxsaylı cinayətlər törədən, quldurluqlar
edən bir şəxsdir. Ermənistandakı son proseslər, aparılan araşdırmalar sübut
etdi ki, bu adam erməni xalqına qarşı da cinayətlər törədibmiş. Belə bir şəxsin
həbs edilməsində hazırkı baş nazir Nikol Paşinyanın iki məqsədi var. Birincisi,
Paşinyan Qriqoryanın xarakterini bilir və ondan istifadə etmək istəyir.
Manvelin vaxtilə rəhbərlik etdiyi "Yerkrapa İttifaqı”nın on minlərlə üzvü var
və onlar keçmiş hərbçilər, döyüşçülərdir. Bu, bir növ hərbiləşdirilmiş
qeyri-hökumət təşkilatıdır. Paşinyan Manveli həbs etdirməklə hərbi müxalifəti
neytrallaşdırır. İkincisi, Paşinyan Qriqoryandan lazımlı məlumatları almaqla,
bunun əsasında Robert Köçəryana, Serj Sarkisyana qarşı cinayət işi açmaq
məqsədi güdür. M. Qriqoryanın Ermənistanın sabiq prezidentləri əleyhinə ifadə
verəcəyi məlumdur. Beləliklə də Paşinyan qarşıdan gələn parlament seçkiləri
ərəfəsində həm hərbi müxalifəti, həm də Köçəryan və Sarkisyan kimi güclü
rəqibləri sıradan çıxarır”.
Rufik
İSMAYILOV