• cümə, 29 Mart, 14:16
  • Baku Bakı 14°C

Parisdə “Bakı 2015” I Avropa Oyunlarının təqdimatı keçirilib

27.11.14 09:14 1049
Parisdə “Bakı 2015” I Avropa Oyunlarının təqdimatı keçirilib
Heydər Əliyev Fondundan APA-ya verilən məlumata görə, Azərbaycanın birinci xanımı, ilk Avropa Oyunlarının Təşkilat Komitəsinin sədri Mehriban Əliyeva mərasimdə iştirak edib.
Heydər Əliyev Fondunun təşkilatçılığı və Azərbaycanın Fransadakı səfirliyinin dəstəyi ilə keçirilən təqdimat mərasiminə Fransanın ictimai-siyasi dairələrinin nümayəndələri, mədəniyyət və idman xadimləri qatılıblar.
Qonaqlar əvvəlcə Azərbaycan heykəltəraşlarının “Bakı 2015”-ə həsr olunan bürünc heykəllərindən ibarət sərgiyə baxıblar. “Biz birlikdə” adlanan sərgidə 20-dən çox heykəltəraşın idmanın müxtəlif növlərinin təsvir olunduğu əsərləri sərgilənib. Sərgi çərçivəsində qonaqlara Heydər Əliyev Fondunun Azərbaycan haqqında müxtəlif nəşrləri, o cümlədən birinci Avropa Oyunlarına həsr olunan bukletləri təqdim edilib.
Tədbirin aparıcısı qeyd edib ki, ilk Avropa Oyunlarının Bakıda keçirilməsi Azərbaycana beynəlxalq miqyasda göstərilən maraqdan irəli gəlir.
Avropa Oyunlarının Təşkilat Komitəsinin sədri Mehriban Əliyeva mərasimdə çıxış edərək bildirib ki, oyunlara altı mindən çox idmançı qatılacaq və 20 idman növündə yarışlar keçiriləcək: “Şübhəsiz ki, Avropa Oyunları Avropa idman tarixində yeni səhifə açacaq və ilk Avropa Oyunlarını tarixdə birinci oyunlar kimi qalacaq yarışları hazırlamaq, qəbul etmək və keçirmək Azərbaycan üçün böyük şərəfdir, böyük məsuliyyətdir”.
Müstəqil Azərbaycanın artıq 23 ildir dünya xəritəsində öz layiqli yerini tutduğunu qeyd edən M. Əliyeva “Biz qədim tarix və mədəniyyətə malik olan xalqıq və əsrlər boyu arzuladığımız müstəqillik bizim ən böyük sərvətimiz. Müstəqillik dövründə əldə edilən uğurlar və nailiyyətlər Azərbaycan xalqı üçün çox vacibdir”, – deyə bildirib.
O, Azərbaycanın müstəqillik dövründə iqtisadi və siyasi islahatları bərabər apararaq demokratiya prinsiplərinə əsaslanan azad cəmiyyət və güclü iqtisadiyyat qurmağa nail olduğunu vurğulayıb: “Bu gün ölkəmizdə bütün azadlıqlar mövcuddur. Ölkədə azad internet fəaliyyət göstərir və əhalinin 70 faizindən çoxu bundan faydalanır.
Azərbaycan çoxmillətli və çoxkonfessiyalı dövlətdir. Əsrlər boyu müxtəlif dinlərin və millətin nümayəndələri ölkəmizdə qardaşlıq və qarşılıqlı anlaşma şəraitində yaşayıblar. Müstəqilliyimiz bərpa olunduqdan sonra bu meyllər daha da güclənib və təsadüfü deyil ki, Azərbaycan bu gün dünyanın multikulturalizm mərkəzlərindən birinə çevrilib və bu yaxınlarda ölkəmizdə Beynəlxalq Multikulturalizm Mərkəzi yaradılıb.
Azərbaycan son illər ərzində dünyanın ən sürətlə inkişaf edən ölkələrindən birinə çevrilib. Son on ildə Azərbaycanın iqtisadi artımı üç dəfədən çox, büdcə xərcləri iyirmi dəfə artıb, yoxsulluq və işsizliyin səviyyəsi beş faizə enib.
Bu gün biz təhsil sisteminin inkişafına çox böyük diqqətlə yanaşırıq. Təhsil sistemində mühüm islahatlar aparılır. Çünki hər bir ölkə üçün, hər bir xalq üçün onun gələcəyi, onun gələcək inkişafı və uğurları məhz insan amilindən, onun savadlı, bilikli gənclərindən asılıdır. Ölkəmizdə son on il ərzində üç mindən çox yeni məktəb inşa olunub və təmir edilib, yüzlərlə azərbaycanlı gənc dövlətin dəstəyi ilə dünyanın aparıcı universitetlərində və ali məktəblərində təhsil alır.
Azərbaycanın beynəlxalq arenada nüfuzu ildən ilə artmaqdadır və bu gün Azərbaycan dünyada etibarlı tərəfdaş kimi tanınır. Bunun sübutu olaraq 155 ölkənin səsi ilə Azərbaycan dünyanın ən mötəbər beynəlxalq qurumu olan BMT Təhlükəsizlik Şurasının 2012-2013-cü illər üçün qeyri daimi üzv seçilmişdi. İki həftə bundan əvvəl 2001-ci ildən üzv olduğumuz Avropa Şurasının Nazirlər Komitəsində Azərbaycanın sədrliyi uğurla başa çatıb.
Ölkəmiz Avropanın enerji təhlükəsizliyinin təmin olunmasına da öz töhfəsini verir. İki ay əvvəl “Cənub” qaz dəhlizinin təməli qoyulub və bir neçə ildən sonra Azərbaycan qazı Avropaya nəql olunacaq və beləliklə, Azərbaycan Avropanın enerji təhlükəsizliyinə daha da güclü töhfə verəcək.
Biz Avropanın beynəlxalq qurumları ilə əməkdaşlıq qurmuşuq və Avropa ölkələri ilə qarşılıqlı maraq və hörmət əsasında münasibətləri qururuq. Fransa Avropanın aparıcı dövlətidir və ölkəmiz müstəqilliyini bərpa etdikdən sonra Fransa-Azərbaycan əməkdaşlığı tamamilə yeni səviyyəyə qaldırılıb. Bu münasibətlər siyasi, iqtisadi, humanitar sahələri əhatə edir. Parlamentlərarası münasibətlər güclənir və çox şadam ki, mən Azərbaycan parlamentində Azərbaycan-Fransa dostluq qrupuna rəhbərlik edirəm.
Bu il Fransada Azərbaycanın Dostları Assosiasiyası bərpa olunub. Ölkəmizdə əllidən çox fransız şirkəti fəaliyyət göstərir, yüzlərlə azərbaycanlı tələbə Fransanın universitetlərində təhsil alır. Bakıda fransız liseyi artıq ilk şagirdləri qəbul edir və paytaxtımızda Fransa universitetinin açılması barədə danışıqlar aparılır.
Bakıda “Ağ şəhər” adlı yaşayış mərkəzi inşa olunur və burada aparılan tikintinin bir qismi fransız üslubunda, Parisin memarlıq üslubunda inşa edilir.
İdman sahəsində ölkələrimiz arasında olan əlaqələr də inkişaf edir və mən ümidvaram ki, Avropa Oyunlarına hazırlıq dövründə yaradılan bütün imkanlardan istifadə olunacaq və bu əlaqələr daha da güclənəcək”.
M. Əliyeva Azərbaycanda idmana, olimpiya hərəkatına dəstəyin dövlət siyasətinin əsas istiqamətlərindən biri olduğunu da qeyd edib: “Ölkəmizdə idman infrastrukturunun qurulmasına böyük diqqətlə yanaşılır və son on ildə Azərbaycanda 40-dan artıq yeni müasir olimpiya mərkəzləri inşa olunub. Müstəqil ölkə kimi Azərbaycan olimpiya oyunlarına 1996-cı ildən qatılıb və oyundan-oyuna qazanılan medalların sayı artmaqdadır. Son yay olimpiya oyunlarında yığma komandamız iki qızıl olmaqla, on medal qazanaraq bu nəticə ilə Avropa ölkələri arasında on beşinci, ümumi iştirakçılar arasında isə otuzuncu yeri tutub. Bu il Çində yeniyetmələr arasında keçirilən olimpiya oyunlarında gənc atletlərimiz beşi qızıl olmaqla on iki medal qazanaraq 200-ə yaxın iştirakçı ölkə arasında onuncu yeri tutublar. Əlbəttə bu, böyük nailiyyətdir. Bütün bu faktları, o cümlədən atletlərimizin bu uğurlarını, ölkə infrastrukturlarını, idmana dəstəyi və əlbəttə ölkənin inkişafını nəzərə alaraq Avropa Olimpiya Komitəsi ilk Avropa Oyunlarının Azərbaycanda keçirməyə qərar verdi. Hazırlığa cəmi iki il yarım vaxt ayrılmasına baxmayaraq, Avropa Oyunlarını yay olimpiya oyunları səviyyəsində keçirmək əzmindəyik. Bunun üçün bütün lazımi tədbirlər həyata keçirilir, təşkilat komitəsi beynəlxalq idman qurumları ilə birgə çalışır. İnşa olunan bütün idman obyektləri vaxtında tamamlanacaq və hər birində yoxlama yarışları keçiriləcək.
Bir neçə gün bundan əvvəl paytaxtımızda keçirilən Avropa Olimpiya Komitəsinin 43-cü Baş Assambleyasının iclası ilə bağlı ölkəmizə gələn qonaqlar bütün hazırlıq işləri ilə yaxından tanış olublar.
Ümidvaram ki, ilk Avropa Oyunları olimpiya hərəkatının prinsipləri olan dostluq, sağlam rəqabət və həmrəylik şəraitində keçiriləcək.
Sonda əziz dostlar, sizi bu tarixi oyunları izləmək üçün Azərbaycana dəvət edirəm”.
Daha sonra mərasim iştirakçıları “Bakı-2015”ə həsr olunmuş filmə baxıblar. Filmdə ilk Avropa oyunlarına hazırlıq işləri və digər tədbirlər haqda məlumatlar yer alır. Bildirilir ki, birinci Avropa Oyunları Bakıda 21 məkanda keçiriləcək. Bu məqsədlə şəhərdə yeni arenalar inşa edilir, mövcud məkanlar yenilənərək oyunlara hazır vəziyyətə gətirilir. Açılış mərasiminin baş tutacağı 65 min nəfərlik Bakı Olimpiya Stadionundan əlavə, Bakıda 7300 nəfərlik tutumu olan Olimpiya şəhərciyi də oyunlara hazırlanır.
Fransanın şəhər, gənclər və idman naziri Tierri Brayar Parisdə “Bakı-2015” birinci Avropa Oyunlarının təqdimatının keçirilməsindən məmnunluğunu ifadə edib: “Fransa da bu oyunlara böyük diqqət göstərir. Ölkələrimiz arasında idman sahəsində əlaqələr getdikcə genişlənir. Fransa bu oyunlarda yüksək səviyyədə təmsil olunacaq”.
Tədbirdə Fransa Milli Assambleyasının üzvü, ikiqat Olimpiya çempionu David Dövile də çıxış edib: “Avropa Oyunlarının keçirilməsi böyük zəhmət tələb edir və inanıram ki, təşkilat komitəsi öz işinin öhdəsindən layiqincə gələcək”. D. Dövile humanizm, sülh və bu kimi ideyaları təbliğ edən Avropa Oyunlarının Azərbaycanın dünyadakı müsbət imicini daha da yaxşılaşdıracağını söyləyib.
Tədbirin sonunda Qara Qarayev adına Azərbaycan Dövlət kamera orkestrinin skripkaçı xanımlardan ibarət qrupu konsert proqramı ilə çıxış edib.
banner

Oxşar Xəbərlər