Panikdən başlayan “panika”
Ermənistanda
yerləşən Rusiya hərbi bazasının əsgərlərinin erməni kəndi - Panikdə törətdikləri
gülləboran qalmaqalı gündəmdə qalmaqdadır. Rusiyanın "Rosbalt” nəşri bu
qalmaqal və onu doğuran səbəbləri ətraflı analiz edib. Müəllif yazır ki, əslində,
Gümrüdəki erməni əhali hərbi bazadan elə də narazı deyil. "Baza müəyyən mənada
onların "müdafiəçisi” funksiyasını yerinə yetirir, həm də yerli sakinlər üçün iş yerləri deməkdir”,
- deyə müəllif vurğulayır. Lakin bununla yanaşı, bazanın qalmaqallı kriminal
reputasiyaya malik olduğunu xüsusi qeyd edir. Və belə bir təəssürat yaranır ki,
baza məqsədli şəkildə hər il bu "göstəricini” artırır. Artıq Ermənistanda açıq
şəkildə bu bazadan yaxa qurtarmağın vaxtının çatdığı bildirilir. Bir tərəfdən də,
bundan sonra ölkənin cənub sərhədlərini kimin qoruyacağı erməniləri narahat
edir. Müəllif, ardınca da qısa şəkildə kənddə baş verən insident barədə məlumat
verib. "Heç bir xəbərdarlıq edilmədən kənddə
sistemli şəkildə güllə səsləri gəlməyə başlayır. Atəş səsləri o qədər
güclü olur ki, kənd sakinləri elə bilirlər müharibədir.
Hətta qonşu kəndə belə
səslər gedib çıxır. Şahidlərin dediyinə görə, bir çox uşağın qorxudan hətta
huşu gedib. Kənd sakinlərini sakitləşdirmək üçün rus hərbçiləri patronların
döyüş xarakterli olmadığını bildirsələr də, sakinlər sakitləşməyiblər. Onlar
baş verənlər barədə Dövlət Təhlükəsizlik Xidmətinə məlumat veriblər. Hərbi
komandanlıq üzr istəsə belə, onlar narazı qalıblar”, - deyə müəllif yazır. Daha
sonra xatırladır ki, iki ölkələr arasında əldə olunan razılaşmaya görə, 102-ci
hərbi baza hərbi manevrlər və onun marşrutu barədə yerli hakimiyyət orqanlarını
əvvəlcədən xəbərdar etməlidir. Poliqon ərazisində hərbi təlimlər də qadağandır.
"Lragir” erməni nəşri yazır ki, bu qaydaya ümumiyyətlə, əməl edən yoxdur.
Rusiya hərbçiləri bu ölkədə özlərini tam
sərbəst, bir növ ağa hesab edirlər. Rus hərbçiləri döyüş silahı ilə ölkə ərazisində
sərbəst gəzir, atəş açır, insanları qorxudurlar. Nəşrin qənaətinə görə, dövlətlərarası
qalmaqal ortadadır və rəsmi Yerevan buna reaksiya verməlidir. Özü də bu,
birinci hal deyil. Məsələn, rus sərhədçiləri bir müddət əvvəl onlara aid
olmayan ərazidə erməni deputatın üzərində axtarış aparmağa cəhd ediblər. Bu
zaman onların günahı üzündən uşaqlar ölmüşdü. Rus hərbçinin erməni ailəsini qətlə
yetirməsindən isə danışmağa dəyməz. Ümumiyyətlə, rus hərbçilərinin əməlləri barədə
çox danışmaq olar.
Rusiya nəşri
ardınca rəsmi Yerevanın, daha dəqiq desək, baş nazir Nikol Paşinyanın baş verənlərə
reaksiyasını qəribə sayır. O bildirib ki, bu insident təxribat xarakterlidir,
ölkənin suverenliyinə qarşı yönəlib və bunu törədənlərin məqsədi iki ölkə
arasında münasibətləri pisləşdirməkdir. "Onda ortaya belə bir sual meydana
çıxır – kim bu təxribatı törədib? "Dost münasibətlərə” xələl gətirmək istəyən
kimdir? Ola bilməz ki, Rusiya hərbi bazası qəsdən belə bir insident törətsin.
Axı bununla əhali daha geniş formada hərbi bazanın çıxarılmasını tələb edə bilər.
Ya da hərbi bazada nizam-intizam ən aşağı həddə düşüb, adi qaydalar belə
qorunmur. Maraqlıdır ki, Paşinyana özünəməxsus formada cavab da verilib. Elə
ermənilərin özləri tərəfindən. Parlamentin xarici əlaqələr komitəsinin rəhbəri
Armen Aşotyan özünün "facebook” səhifəsində baş nazirin bu formada sərt
danışmasına lüzum olmadığını bildirib. Müəllif xüsusi qeyd edir ki, ermənilər
"qonaqların” onları belə formada təhqir etmələrinə artıq dözmək istəmirlər. Hətta
"müdafiəçi” rolunda çıxış edənlər olsa belə. Bu səbəbdən də, onlardan çıxıb
getmələrini xahiş edirlər. Lakin bu məsələdə ölkə daxilində ciddi fikir
ayrılığı var. Əvvəlki hakimiyyəti təmsil edənlər buna qarşıdır. Məsələn,
parlamentin vitse-spikeri Eduard Şarmazanov "Sputnik” agentliyinə Gümrüdəki hərbi
bazanın onlar üçün həyati əhəmiyyət kəsb etdiyini bildirib. Əlavə edib ki, bu məsələ
ətrafında spekulyasiya yolverilməzdir. Onlar antidövlət xarakterli olub və ölkənin
maraqlarından irəli gəlmir. Siyasətçi hərbi kontingent çıxarılacağı təqdirdə,
Türkiyə ilə sərhədlərin kimin qoruyacağını sual edib. "Onlar yaddan çıxarıblar
ki, aprel hadisələrində Türkiyə antierməni bəyanatla çıxış etdi. Bazaya
alternativ yoxdur”, - deyə vitse-spiker bildirib. Şarmazanov hesab edir ki, həm
hakimiyyət, həm də hərbi bazanın rəhbərliyi tez bir zamanda gərginliyi
azaltmalıdır. Beləliklə, çox maraqlı bir vəziyyət yaranıb. Bir tərəfdə
qoşunların çıxarılmasına çalışan baş nazir Paşinyanın antirusiya hökuməti, digər
tərəfdə hələ də güc rolunu ifadə edən Respublika Partiyası. Rusiya nəşri da bu
məsələyə toxunur. Qeyd edir ki, Paşinyan bir tərəfdən xarici siyasət kursunun dəyişməyəcəyini
- Avrasiya İqtisadi İttifaqı, Kollektiv Təhlükəsizlik üzrə Müqavilə Təşkilatından
çıxmayacağını, digər tərəfdən də Qərbdən qeyri diplomatik formada ölkəsinə
böyük diqqət tələb edir. Lakin Qərb də yeni erməni hökumətinə tam etimadsızlıq
göstərir. Yəni, ona inanmır. Paşinyanın Brüssel səfəri də bunu sübut etdi.
Məqalə müəllifi
daha sonra belə bir sualla çıxış edir. Bu insident sona çatdımı? "Əksinə, bu, əslində
Paşinyana Qərb ölkələri qarşısında Rusiya hərbi bazasının onlara necə bir bəla
olduğunu bəyan etməyə imkan vermiş olub. Məhz onun işarəsi ilə qərbyönümlü
hökumət üzvləri tərəfindən "müdafiəçi”
rolunda çıxış edən Rusiyaya qarşı hücumlara start verilib. Məsələn, Rusiyaya
qarşı açıq nifrəti ilə seçilən "1in.am” saytı və başqaları antirus xarakterli məqalələr
dərc edir, ekspertlərin fikirlərini çatdırırlar. Kampaniyanın başladığına dair
tək bir fakt: bir sıra ərazilərin rəhbərləri Rusiya səfiri qarşısında rus zirehli
texnikasının getdiyi ərazilərin təmir olunması tələbi ilə çıxış ediblər.
Bazanın statusu ilə də bağlı çağırışlar ara vermir. Son olaraq xüsusi qeyd
edilir ki, ermənilər bazanın, onların müdafiəçisi rolunda çıxış edəcəyinə
inanmırlar. Artıq heç kim şübhə etmir
ki, daha bir belə insident hərbçilərlə sakinlər arasında açıq qarşıdurmaya gətirib
çıxara bilər. Proseslərin gedişi göstərir ki, bu qarşıdurma qısa zamanda baş
verə bilər.
Azər