Pandemik depressiya
Dünyada koronavirusla bağlı gərginlik bir qədər səngisə də, xəstəlik hələ
də təhlükə mənbəyi kimi qalır. Dünyaca məşhur "Foreign Affairs” nəşrinin "Pandemik depressiya” başlıqlı məqaləsində
qeyd edilir ki, pandemiya dünya dövlətlərində görünməmiş formada müdafiə
reaksiyasını doğurdu. Bu vəziyyətdə hökumətlər səylərini gücləndirməli oldular
- izolyasiya rejiminin gücləndirilməsindən tutmuş səfərlərə qadağalara qədər.
Əhali arasında infeksiyasının sürətlə yayılmaması üçün əllərindən gələni
etməklə yanaşı, tibbi resursların əlçatan olmasına nail olundu. Əhalinin
sağlamlığının qorunması, bu və ya digər tədbirləri maliyyələşdirmək məqsədilə
hökumətlər görünməmiş dərəcədə öz iqtisadi resurslarını istifadə etməyə məcbur
oldular. Bununla belə, pandemiya əksər ölkələrin iqtisadiyyatına mənfi təsir
edir və etməkdədir. Koronavirus epidemiyası dünya iqtisadiyyatı və maliyyə
bazarları üçün əsas təhdidlərdən birinə çevrilib. Ümumdünya Səhiyyə
Təşkilatının (ÜST) məlumatına görə, dünyanın ən azı 110 ölkəsində insanlar
virusa yoluxub. Müəllif yazır ki, 2008-ci ildə başlayan maliyyə böhranı əsas
etibarilə 11 inkişaf etmiş ölkələrin bank sferasına zərbə vurdu. Pandemiya isə iqtisadiyyatın
irimiqyaslı ixtisarına gətirib çıxardı. Ən təhlükəlisi odur ki, bunun ardınca yeni
maliyyə böhranı baş verə, daha sonra korporasiyaların müflis olması, borclanmanın
artması reallaşa bilər. Dünya Bankının hesablamalarına görə, pandemiya nəticəsində
tam yoxsul vəziyyətinə düşən insanların sayı minimum 60 mln-a çatacaq. Proqnoz
belədir ki, bir çox ölkələrdə iqtisadi vəziyyətin ağırlaşması dünya
iqtisadiyyatının funksiyalaşmasında çətinliklərə və qloballaşma prosesinin
dayanmasına gətirəcək. Dünya Bankının analitik rəqəmlərinə görə, 2020-ci ildə
dünya iqtisadiyyatı 5,2 faiz azalacaq.
Koronavirus pandemiyasının əksər ölkələrin iqtisadiyyatına müəyyən
dərəcədə mənfi təsir göstərəcəyi artıq hamıya məlumdur. Bununla belə,
pandemiyanın hər gün daha geniş ərazidə yayılma tendensiyası post-pandemiya
dövründə dünya ölkələrinin iqtisadiyyatında yaranacaq problemlərin müxtəlifliyi
ilə bağlı suallar yaradır. Harvard Universitetinin iqtisadçısı Kennet Roqoff
pandemiya sonrası dünya iqtisadiyyatının 2008-ci ildə baş verən maliyyə böhranından
daha böyük bir böhrana gedəcəyini güman edir.
"JP Morgan” bankının Qlobal İqtisadi Araşdırmalar bölməsinin baş
iqtisadçısı Brus Kasman dünya ölkələrinin iqtisadiyyatını araşdıraraq,
pandemiyanın ən kəskin mənfi təsirlərinin müşahidə olunacağı ölkələri
açıqlayıb. Koronavirusun yayılması ilə bağlı narahatlıq bütün dünya bazarlarına
da təsir edir. Belə ki, səhmlərin qiyməti enir, istiqrazların gəlirliliyi
azalır və s. Koronavirus
epidemiyasının yayılmasına görə, böyük institutlar və banklar dünya
iqtisadiyyatının artması ilə bağlı proqnozlarını aşağı salıblar. Dünya
iqtisadiyyatı ilə bağlı proqnozunu aşağı salan son təşkilatlardan biri də OECD
(İqtisadi Əməkdaşlıq və İnkişaf Təşkilatı)
idi. OECD analitikləri mart ayında hazırladıqları hesabatda dünyanın bütün
iqtisadiyyatları üçün 2020-ci il böyümə proqnozlarını aşağı endiriblər. Dünyada istehsal fəaliyyətinin azalması neftə olan tələbin aşağı
düşməsinə səbəb oldu, eyni zamanda neftin qiyməti də endi. Analitiklər isə
deyir ki, qiymətlərdəki enmə OPEC+ ölkələrinin neft hasilatını azaltmaq üçün
yeni bir saziş üzərində razılığa gələ bilməməsindən əvvəl başlayıb. Virusun
əsas mərkəzi olan Çin, eyni zamanda dünyanın ən böyük neft idxalçısıdır. COVID-19
virusunun yayılması ilə əlaqəli qorxu və həyəcan investorların da düşüncəsinə
mənfi təsir edib, bu da əsas bazarlarda səhmlərin qiymətinin kəskin enməsinə
gətirib çıxarıb. Analitiklər deyirlər ki, epidemiyanın yayılması bazarlara üç
istiqamətdə təsir edə bilər: Çində işgüzar fəaliyyətin enməsi, yerli bazarda
fəaliyyətin azalması və maliyyə bazarlarında stress.
Turizm hazırda dünya iqtisadiyyatının ən böyük sahələrindən biridir,
onun gəlirləri 5,7 trilyon dollara çatır. Bu sferada 319 milyon insan çalışır,
bu isə planetin bütün işləyən əhalisinin 10%-i deməkdir. Elə buna görə də,
epidemiyanın yayılmasının ən böyük təsiri bu sektorda müşahidə olunub. İndi
turizm sektorunda ixtisarlar müşahidə olunur. Bu, istər işgüzar səyahət,
istərsə də əyləncə sektorunda səyahətlərin ləğvi ilə bağlıdır.
Yeri gəlmişkən, İtaliya, İspaniya və Fransa kimi üzv dövlətlərin
epidemiyaya qarşı mübarizə apardıqları Avropa İttifaqının iqtisadiyyatı da
pandemiyadan ağır zərbə alıb. Aİ iqtisadiyyatı koronavirus səbəbiylə 3,5 faiz
daralıb. Epidemiyaya məruz qalan ölkələrdən biri olan Fransanın iqtisadiyyatı
ilk rübdə 5.8 faiz enib. Fransadakı bu daralma İkinci Dünya Müharibəsindən
sonra ən sərt eniş sayılır. Koronavirusun təsiri uzaq Şərqi Asiya ölkələrində
fərqlidir. Birinci rübdə Sinqapur iqtisadiyyatı 10,6 faiz nisbətində daralsa
da, İndoneziya birinci rübü 2.97 faiz böyümə ilə yekunlaşdırıb. Sinqapurda
2009-cu ildən bəri ən pis ÜDM-in daralması qeydə alınıb. İlk rübü təxminən 3 faiz
böyümə ilə yekunlaşdıranİndoneziya vəziyyətindən məmnun deyil. Çünki
iqtisadi artımı epidemiya səbəbiylə 2.97-ə enən İndoneziya 2001-ci ildən bəri
ən zəif böyüməsini qeyd edib.Azər NURİYEV