Pambıqçılıq sırf bazarın öhdəsinə buraxıla bilməz
Prezident İlham Əliyev Azərbaycanda
pambıqçılığın inkişafına dövlət dəstəyi haqqında sərəncam imzalayıb. Sərəncamla
müəyyən edilib ki, emal müəssisələrinə satılmış hər
kiloqram xam pambığa görə pambıq istehsalçılarına 0,1 manat subsidiya nəzərdə
tutulur.Sərəncamda
nəzərdə tutulan subsidiya 2016-cı ildə istehsal olunan və emal müəssisələrinə
satılmış xam pambığa da şamil edilir. Nazirlər Kabinetinə tapşırılıb ki, emal
müəssisələrinə satılmış hər kiloqram xam pambığa görə pambıq istehsalçılarına
subsidiyanın verilmə qaydasını Azərbaycan Respublikasının Prezidenti ilə
razılaşdırmaqla 15 gün müddətində müəyyən etsin, sərəncamdan irəli gələn digər
məsələləri həll etsin.Subsidiyalaşma
pambıqçılığın inkişafı üçün görülən işlərin tərkib hissəsidir. Bəs
subsidiyalaşma və dövlətin bu sektora dəstəyi sözügedən sahənin inkişafına nə
kimi kömək edəcək?
İqtisadçı ekspert Pərviz Heydərov qəzetimizə
açıqlamasında bildirdi ki, bəzi sahələrdə dövlət dəstəyinə ehtiyac var: "Dövlət başçısı Sabirabadda keçirdiyi müşavirədə dedi ki,
pambıqçılığın inkişafını bundan sonra ancaq biznes qurumlarının öhdəsinə
buraxmaq olmaz. Ümumiyyətlə, elə sahələr var ki, sırf bazarın öhdəsinə buraxıla
bilməz. Çünki bazar iqtisadiyyatı çox şeyi həll etmir. Bəzi sahələrə dövlət
dəstəyi lazımdır. Ona görə də pambıqçılığın bərpası və inkişafı üçün çox ciddi
dövlət siyasəti yürüdülməli və dövlət həlledici rol oynamalıdır. Bu rol müvafiq
qayğıdan və dəstəkdən ibarət olmalıdır. Ancaq həmin qayğı və dəstək bilavasitə
dünya bazarı ilə əlaqəli və xüsusən də qiymət sarıdan qarşılıqlı münasibətlər
əsasında həyata keçməlidir.Məlumdur
ki, pambığın satınalma qiyməti bu ildən artırılıb. Belə ki, 2016-cı ildən
birinci növ pambığın bir tonu üzrə satınalma qiyməti 500 manat, ikinci növü
üzrə 470 manat, üçüncü növü üzrə 440 manat, dördüncü növü üzrə isə 400 manat
edilib. Müqayisə üçün qeyd edək ki, keçən il, yəni 2015-ci ildə bu rəqəmlər
müvafiq olaraq 410 manat, 390 manat, 370 və 350 manat idi. Dünya bazarında 1
ton pambıq lifinin qiyməti isə 1500-1600 ABŞ dollarından yuxarı təşkil edir”.
İqtisadçı deyir ki, emal müəssisələrinə satılmış
hər kiloqram xam pambığa görə pambıq istehsalçılarına 0,1 manat subsidiya veriləcəyi
təqdirəlayiq haldır. Lakin o hesab edir ki, sözügedən sahədə tədarükçü
şirkətlər və emal müəssisələrinin dünya bazarındakı qiymətlərlə bağlı daha çox
gəlir götürəcəklərini nəzərə alsaq, bu istiqamətdə əlavə addımların atılmasına
da ehtiyac var: "Belə ki, gəlirlərin bölüşdürülməsində istehsalçı, emalçı və
dövlət əlaqələri düzgün təşkil olunmalıdır. Bütün bunlardan ötrü isə kompleks
stimullaşdırıcı tədbirlər həyata keçirmək lazımdır. İlk addım isə məhz qiymət
siyasəti ilə bağlı olmalıdır. Hesab edirəm ki, qiymət əsas şərtdir”.
İqtisadçı Rəşad Həsənovun sözlərinə
görə, dövlət hansı sahələrin inkişafında maraqlı olursa, o sahələrdə təşviqin
həyata keçirilməsi, subsidiyalaşma və digər mexanizmlərin tətbiq edilməsi
normaldır: "Düşünürəm ki, pambıqçılığın inkişafı daha çox ənənəvi potensiala söykənən
bir istiqamət olaraq müəyyənləşdirilib. Eyni zamanda, valyuta daxil olmasına
müəyyən qədər şərait yaradan alət olaraq düşünülür. Çünki pambıq dünya bazarına
çıxarılacaq məhsuldur. Bunun qarşılığında da ölkəyə valyuta axınını təmin etmək
mümkündür. Digər tərəfdən, bu sektorun kifayət qədər böyük əmək tutumluluğu
var. Bu baxımdan yanaşdıqda subsidiyalaşmanın tətbiq edilməsi müsbət haldır”.
R.Həsənov bildirdi ki, pambıqçılığın inkişafında intensiv inkişafa
nail olmaq üçün işlər görülməlidir. Subsidiyalaşma da bu inkişafın bir tərkib
hissəsi hesab oluna bilər: "Azərbaycanda 2015-ci ilin statistikasına görə 22
min hektardan təxminən 41 min ton pambıq istehsal olunub. Bu, bir hektar üçün
təxminən 800 kq məhsul istehsalı deməkdir. Bu prizmadan yanaşdıqda hökumətin bu
gün tətbiq etdiyi subsidiya şərtləri ilə bundan sonrakı dövrdə artıq pambıq
əkən vətəndaş bir hektar üçün hökumətdən təxminən 180 manata yaxın yardım
alacaq. Təbii ki, bu, müəyyən xərclərin qarşılanması üçün müsbət bir addım
hesab oluna bilər. Eyni zamanda, pambığın alışı ilə bağlı qiymətin artırılması
qarşıdakı dövrdə nəzərdə tutulur. Bütövlükdə bunların təşkil edilməsi gələcəkdə
bu sahəyə marağı nisbətən artıra bilər. Çünki təxminən 15-20 il bundan əvvəl
Azərbaycanda əkilən pambıq sahələri təxminən 110 min hektar idi. Amma bu gün
22-23 min hektara düşübsə, deməli, 5 dəfə azalma var.Məhsuldarlıqda nisbətən artım müşahidə olunur. Bu da onunla bağlıdır
ki, texnoloji avadanlıqların tətbiq olunması və s. kimi innovasiyanın tətbiqi məhsuldarlığa
müsbət təsir göstərir. Amma düşünürəm ki, hökumət daha çox pambıqçılıqda
intensiv inkişafa fokuslanmalıdır. Daha müasir metodların tətbiqi ilə
məhsudarlığın artırılması və bu sahənin gəlirliliyinin yüksəldilməsi yolu ilə
prosesin təşkili aparılmalıdır. Burada subsidiyalaşma alətlərdən biridir. Amma
eyni zamanda digər istiqamətlərdə də fermerlər üçün müəyyən qədər şəraitin
yaradılması, onlara logistik dəstəyin təmin olunması kimi məsələlərə də baxmaq
lazımdır”.
İqtisadçının sözlərinə görə, subsidiyalaşma dövlət büdcəsinə ciddi
yük deyil: "Subsidiyalaşmanın nə qədər müddət tətbiqini öncədən planlaşdırmaq
çox çətindir. Bu, dövlətin maliyyə dəstəyindən də asılıdır. Bu gün elə də ciddi
xərc yaratmır. 2015-ci ilin statistik təhlili ilə götürsək, ayrılan subsidiya
dövlət büdcəsi üçün əlavə yük yaradır. Amma 2016-cı il üçün əkilən sahələr
əvvəlki ilə müqayisədə 2 dəfə artıqdır. İki dəfə artıq məhsul yığımı olsa, 8-10
milyon manat dövlət büdcəsi üçün yük olsa da, çox ciddi yük deyil. Bu baxımdan
bu işin davamlılığını təmin etməklə prosesin daha da genişlənməsini, əkin
sahələrinin artmasını, intensiv təsərrüfatçılığın formalaşmasını dəstəkləmək
daha məqsədəuyğun olar. Amma növbəti dövlərdə dövlət büdcəsinin gəlirləri ilə
bağlı problemlər dərinləşərsə, büdcənin yükünün azaldılması məqsədi ilə bir çox
istiqamətlərdə subsidiyaların, əlavə yardımların, subvensiyaların
dayandırılması qərarı verilə bilər. Bunlardan biri də pambıqçılıq ola bilər.
Amma nəticə əldə olunana qədər yəqin ki, subsidiyalaşma prosesi davam
etdiriləcək”.
Aygün Asimqızı